Read Siyin Chin 2 Samuel 5 Bible Online

2 Samuel 5 - Siyin Chin bible

2 Samuel 5

¹Tua zawkciang Israel namte theampo Hebron khua David kungah hong pai in ama munah, “Ko sia nangma ii chi le sa hi khu hi.

²A bosa hun sung Saul sia ih kumpipa ahi lai ngawngawn in, nangma in Israel mite ngal kidona sungah na lampui a, tuaciang TOPA in na mite na lampui natu le a ukpa na sua natu kamciam hong pia hi,” ci uh hi.

³Tuabangin Israel lampui theampo David Kumpipa kung Hebron ah hong pai uh hi. Ama in amate taw a thiangtho kipawlpuina vawt a, amate in ama sathau noai in, Israel kumpipa suak hi.

⁴David sia kumpipa a sua hunin kum 30 pha a, kum 40 sung uk hi.

⁵Ama in Hebron panin Judah te kum sali le lang sung uk a, Jerusalem panin Israel le Judah te theampo kum 33 sung uk hi.

⁶Kumpipa David le a mite ii Jerusalem sim tu in a kuan tu hun hong theng hi. Tua munah a teang Jebus te in tua khuapi sia David in zothal zo tu in um ngawl ahikom ama tung ah, “Hi lai ah nang hong tum ngeingawl tu ni hi; mittawte le peangbaite ngawngawn in hong nolh keak zo tu hi,” ci hi.

⁷(Ahihang David in amate Zion kulhpi suan takpi in tua hun pan kipan “David Khuapi” kici hi.)

⁸Tua ni in David in, a mite tungah, “Jebus mite kei ii ngaimawk za in a ngaimaw hi sungah na om uh ziam? Thalup nop dongin a ensan na om uh ziam? Tua ahile tui laakna lei tawlet sia zui in pai tavun a, tua a khuangai huai mittaw peangbaite sim tavun,” ci hi. (Tua hu in, “Mittawte le a peangbaite sia TOPA inn sungah tum thei ngawl tu hi kici hi.)

⁹Kulhpi a suan zawkciang a sungah David teang a, “David khuapi” ci in minvaw hi. Ama in tuasia ii kiimkot ah khuapi sa a, nisuana sang mualpangh ah lei a dipna pan hong pan hi.

¹⁰Ama thahat vaial tawntung hi, banghang ziam cile Vaanglianbelpa TOPA Pathian ama taw omkhawm hi.

¹¹Tyre khua a om Kumpipa Hiram in David kungah sum zuak sum lei vai taw in taangmi paisak hi; ama in a zak tu in kumpi inn sak natu cedar thingluangte, inn sa thiamte, suang ciang thiamte puak hi.

¹²Tuabangin David in TOPA ii ama Israel kumpipa tu in a kipsakna le, a mite atu in a kumpi ngam a khantosakna thu phawk hi.

¹³Hebron pan Jerusalem ah a kikhiin zawk uh ciang David in zinote le zite la thua in tapa tanu a tamzaw lai nei hi.

¹⁴Jerusalem ah a suak a tate hi bang teng hi: Shammua, Shobab, Nathan, Solomon,

¹⁵Ibhar, Elishua, Nepheg, Japhia,

¹⁶Elishama, Eliada, le Eliphelet te ahi uh hi.

¹⁷Philistine te munah David sia Israel kumpipa kisuaksak zo hi ci in kison ahikom amate ii ngalkaphonpi sia ama man tu in hong kuan uh hi. Hi thu David in a zaak ciangin ngalnanna kulh khat sungah tuaksuk hi.

¹⁸Philistine te Rephaim Kuam sung hong theng a tua mun laa uh hi.

¹⁹David in TOPA dongh a, “Philistine te ka sim tu ziam? Zawna kei nong pia tu ziam?” ci hi. TOPA in, “Hi hi, sim in! Zawna kong pia tu hi,” ci in zo hi.

²⁰Tua ahikom David sia Baal Perazim ah kuan a Phillistine te zo hi. Ama in, “TOPA in ka ngalte khuanawl tuipawm bangin nawk keak hi,” ci hi. Tua ahikom tua mun sia Baal Perazim kina hi.

²¹Philistine te a taikeak uh ciang a milimte nusia uh a, tuate David le a mite in laksak uh hi.

²²Tua zawkciang Philistine te in Rephaim Kuam ah heak kikin tua mun la kik uh hi.

²³Khatvei ma David in dongh lai a, TOPA in, “Hi sung panin sim heak in a, kot pai in, balsam thingkungte omna nai, a pang langkhat sang panin sim tu in kinging vun.

²⁴Thingkung dawn teng ah mihon khuasuan nging na zaak uh ciang sim vun, banghang ziam cile Philistine ngalkaphonpi a zo tu in keima noma mai ah a papai hi tu khi hi,” ci hi.

²⁵David in TOPA thupiak bangin ngamta a, tuaciang ama in Philistine te Geba pan lam tawntung Gezer dong not kik zo hi.