Read Siyin Chin 2 Samuel 6 Bible Online

2 Samuel 6 - Siyin Chin bible

2 Samuel 6

¹Khatvei ma David in Israel ngalkap phabel teng khawmtua a, a vekpi in 30,000 pha uh hi,

²tuaciang ama in amate Judah ngam Baalah ah paipui hi, tuaciang cherub te tungah kumpi in a kitosak, Vaanglianpipa TOPA ii min a pu, Pathian ii Thuciamna Thingkuang sia tua mun panin laak tu ahi hi.

³Amate in tuasia mualtung a om Abinadab inn pan la in, leangthak khat tungah suan uh hi. Aminadab ii tapate Uzzah le Ahio in khuileang lampui in,

⁴leang mai ah Ahio pai hi.

⁵David le Israel buppi sia a tha nei za uh taw TOPA patoaina in lasa in laam uh hi. Tengtongh, liamlo, khuang, nguasemh le daalkopsai te tum uh hi.

⁶Amate Nacon ii ancilna mun hong thet uh ciangin a khuitalte hong lutu a, Uzzah in Thuciamna Thingkuang hong zamh hi.

⁷Tua Thuciamna Thingkuang sia a thasia vawt ngawl hu in thakhat thu in Uzzah tungah TOPA Pathian thin uuk a, thatlum hi. Uzzah sia Thuciamna Thingkuang hui ah thi hi,

⁸tua ahiciang tua hun pan kipan tua mun sia Perez Uzzah kici hi. David sia a thinso hi, banghang ziam cile TOPA in Uzzah sia thin uukna taw daan a piak hang ahi hi.

⁹Tua zawkciang David in TOPA kiita a, “Bangbangin Thuciamna Thingkuang sia tu in keima in tonpui ngam nawn tu khi ziam?” ci hi.

¹⁰Tua ahikom ama in Jerusalem khua ah ciapui ngawl tu in khensat hi; tuasia taangin lampialpui a, Gath khua mi Obed Edom inn ah tun hi.

¹¹Thuciamna Thingkuang sia tua munah tha thum kitaamsak a, TOPA in Obed Edom le a bangkua thupha pia hi.

¹²Kumpipa David in Thuciamna Thingkuang hu in, TOPA in Obed Edom bangkua le a neisa theampo thupha pia hi ci in za a; tua ahikom ama in Thuciamna Thingkuang sia Obed inn panin la in, poai khaamna lianpi taw Jerusalem ah ciapui hi.

¹³Thuciamna Thingkuang a pua mihingte kal luk hong suan zawkciang David in tawlngasak a, khuital khat le khuino thau khat sangaw biakpiakna in pia hi.

¹⁴David sia a kawngah dial khat teang bekin, TOPA a patoaina in a tha neiza taw laam hi.

¹⁵Tuabangin ama le Israel mite theampo in Thuciamna Thingkuang Jerusalem ah lawpin auna le lemle aw te taw paipui uh hi.

¹⁶Tua thingkuang khuapi sung a kithetpui laitakin Saul ii tanu Michal in khelki panin khua a et le David kumpipa Pathian mai ah laamin tawnin a om a mu ciang, hoi maw sa hi.

¹⁷Amate in tua Thingkuang sia David ii tua atu a saksak Puanbuk sungah koi uh hi. Tua zawkciang ama in TOPA tungah sangaw biakpiakna le kipawlkhop biakpiaknate pia hi.

¹⁸Sangaw biakpiakna a man zawkciang David in Vaanglianbelpa TOPA min taw mipite thupha pia in,

¹⁹amate an hawmsak hi. Ama in Israel pasal le numei khat simin anluum khat tek, sa em bak khat tek le sapitko tawm tek pia hi. Tua zawkciang a kuama po inn ah cia uh hi.

²⁰Tua zawkciang David in a innkuanpuite nukset tu in hong cia ciang, Michal sia ama taw kisi tu in hong pusuak hi. “Tuni in Israel kumpipa in ama min let natu khat vawt hi! Ama uliante ii naseam numeite mu na ah a mawmaw bangin kipholaak hi!” ci hi.

²¹David in, “Na pa le ama ii bangkua taangin Israel lampui tu in kei hong teal, ka TOPA ka patoaina in laam khi hi,

²²tuaciang tu a sang zongin a nasia zaw lai in keima le keima kisimmawk vawt zaw lai tu khi hi. Nang na hile kei, bangma in hong heang ngawl tha tu ni hi, ahihang tua numeite in kei, hong thupi sim mama tu hi,” ci in zo hi.

²³Saul ii tanu Michal sia a khan sung ta nei ngawl hi.