Read Siyin Chin 2 Samuel 7 Bible Online

2 Samuel 7 - Siyin Chin bible

2 Samuel 7

¹Kumpipa David sia a kumpi inn sungah om a, tuaciang TOPA in a ngalte theampo kung panin keamcing hi.

²Tua zawkciang kumpipa in kamsaang pa Nathan munah, “Kei hi sungah cedar thing taw a kisa inn sungah teang khi hi, ahihang Pathian ii Thuciamna Thingkuang sia puanbuk sungah kikeam hi!” ci hi.

³Nathan in, “Na thinsung a om babangin vawt in, banghang ziam cile nangma taw TOPA hong omkhawm hi,” ci in zo hi.

⁴Ahihang tua zanin TOPA in Nathan munah,

⁵“Va pai ta'n a, ka naseampa David munah hi bangin ka ci teng va son ta'n, ‘Kei teen natu biakinn a sa tu sia nang hi ngawl ni hi.

⁶Egypt ngam panin ka mite ka suatak hun pan kipan tu hun dong biakinn sungah teang ngeingawl khi hi; puanbuk sungah teangin khualhaw kot khi hi.

⁷Israel mite taw ka khualhawna theampo ah a lampui in ka koite khat po tung zongh ah banghangin cedar thing taw a kisa biakinn hong saksak ngawl nu ziam, ci ngeingawl khi hi.’

⁸“Tua ahikom ka naseampa David munah na son in a, Kei, Vaanglianbelpa TOPA in, ‘Lo sungah tuu cingin na omna panin nang kong la a, Israel ka mite a uk pa kong suaksak hi.

⁹Na paina po ah nang taw kong omkhawm a, maisang na manaw ciang na ngalte theampo ka zo siat hi. Leitung ah lampui lianbel te bangin kong minthangsak tu hi.

¹⁰Ka mi Israel te ten natu mun khat ka teal zo a, tua munah amate kinengniam nawn ngawlin nungta tu uh hi. Ngam hisia sungah amate hong tum pan kipan mihing ngoltolte in sim tawntung ahihang hi bangte piang kik nawn ngawl tu hi. Na ngalte kung pan kong kepcing natu le suan le paal na nei natu in kamciam kong pia zo hi.

¹²Nang thi in na taanghpupite taw na kiphum khop zawkciang zong na tapate sung pan khat kumpipa ka suaksak tu a, a kumpi ngam ka thahatsak tu hi.

¹³Ama sia biakinn khat kei atu a sa tu pa hi tu a, a kumpi khangngui a tawntungin ka kizomsak tu hi.

¹⁴Keima in ama ii pa ka hi tu a, ama ka tapa hi tu hi. Sep khial vawt khial a nei ciangin pa ii tapa a daan a piak bangin ka tek tu hi.

¹⁵Ahihang nangma kumpipa na sua thei natu in Saul ka huna ka dawkeak bangin tua na tapa sia ka huna ka dawkkeak buatu hi.

¹⁶Nangma in suan le paal na nei tawntung tu a, na kumpi ngam ka khomsuansak tu hi. Na kumpi khangngui sia a mong ngei buatu hi,’ ” ci hi.

¹⁷Pathian ii a pualaak teng a vekpi in Nathan in David munah son hi.

¹⁸Tua zawkciang David kumpipa sia TOPA ompuina Puanbuk sung zuan a, to in hi bangin thungen hi: “Vaanglianpipa TOPA awng, kei tung ahizong ka innkuanpuite tung ahizong nong septe ka kiphu ka kilawmna uh om ngawl hi.

¹⁹Tua hi napi tu in a nasia zaw lai in hong seam ni hi, Vaanglianpipa TOPA awng; maisang hong pai lai tu kumte ah ka suan ka paalte atu dongin kamciam nong pia zo hi. Tuaciang hisia mihing khat in musak ni hi, Vaanglianpipa awng!

²⁰Nang tungah bang kong ci lalai thei tu ziam! Kei na naseampa hong he ni hi.

²¹Hi bang nong vawt tu sia nangma deina le tupna hi; nangma in hi na lianpite kei nong hil natu in na vawt ahi hi.

²²Bangza in lian ni ziam, Vaanglianpipa TOPA awng! Nang taw a kibang khat zongh om ngawl hi; nangma bekma Pathian na hi sia kong he tawntung uh hi.

²³Nangma mi tatak a suak tu in na suatak Israel bang peuma leitung ah a dang minam om ngawl hi. Amate atu in na vawt a lian le a lamdang nate in na minthanna leitung buppi kizelsak hi. Egypt ngam pan nangma mi tu in na suataksak na mite maisang a nawk ciangin minam dangte le a pathian te na notkeak hi.

²⁴Nangma in Israel te a tawntungin nangma mi na suaksak a, TOPA awng, tuaciang nangma sia amate ii Pathian suak zo ni hi.

²⁵“Tuaciang tu in, TOPA Pathian awng, kei le ka suan ka paalte atu kamciam na vawt sia a tawntung atu in hong taangtungsak ta'n, ka seam tu na ci te hong seam ta'n.

²⁶Na minthanna nasia tu a, tuaciang mite in a tawntungin, ‘TOPA Vaanglianbelpa sia Israel ii Pathian hi,’ hong ci tu uh hi. Tuaciang nangma in ka kumpi khangngui sia a tawntung nong kepsak tu hi.

²⁷TOPA Vaanglianpipa, Israel ii Pathian awng! Hi thungetna nang tungah hang takin kong ngen ngam hi, banghang ziam cile, nangma in kei na naseampa tungah hi teng nong lak zo a, tuaciang ka suan ka paalte kumpi na suasak tu sia nong son zo hi.

²⁸“Tuaciang tu in, Vaanglianpipa TOPA, nangma in Pathian na hi hi; na kamciamte na len tawntung a, hi a lamdang kamciam sia kei tungah nong pia zo hi.

²⁹Nangma piak hamphat nate taw a nopsak tan natu in ka suan ka paalte thupha nong piaksak natu kong ngen hi. Nang, Vaanglianpipa TOPA in, hisia nong kamciam zo a, na thupha sia ka suan ka paalte tungah a tawntungin kip tu hi.”