Read Siyin Chin 1 Kumpite 1 Bible Online

1 Kumpite 1 - Siyin Chin bible

1 Kumpite 1

¹Kumpipa David sia tu in pasal huai mama khat hi a, a naseamte in puanvante thuapin silhsak hikale a khualum thei ngawl hi.

²Tua ahikom a uliante in ama munah, “Kumpipa awng, nang taw om in hong ou tu numei khangmoi khat hong zonsak tu khu hi. Ama in nangma kungah lum tu a, na khua hong lumsak tu hi,” ci uh hi.

³Israel ngam bup ah ngaknu mealpha khat kizong a, tuabang a mealpha Abishag a kici khat Shunem ah mu a, kumpipa kungah kipaipui hi.

⁴Ama sia a mealpha mama a, kumpipa zongh ou hi, ahihang ama in nupa vai a nei pui bua hi.

⁵Tu in Absalom a thi tak ciang David ii Haggith taw a tapa Adonijah sia a nungta lai te sung pan a tapa lianbel ahi hi. Ama sia a mealhoi mama mihing khat ahi hi. David in ama sia bangma hunin teih ngeingawl a, tuaciang ama zongh kumpipa suak nuam mama hi. Ama atu in siphu ngalleangte, siphu te le ama a cing mihing 50 koi hi.

⁶

⁷Ama in Joab (A nu Zeruiah) le thiampi Abiathar taw thu kikum uh hi, tuaciang amate in ama panpui tu in lungkim uh hi.

⁸Ahihang thiampi Zadok, Jehoiada ii tapa Benaiah, kamsaangpa Nathan, Shimei, Rei le David a cing te sia Adonijah sangah a pang bua uh hi.

⁹Ni khat ni in Adonijah in Enrogel cik hui Ngul Suangpi a kicina munah tuute, khuitalte, khuino thaute taw sangaw biakpiakna khat nei hi. Ama in David kumpipa ii tapa dangte le Judah pan kumpipa ii uliante tua sangaw biakpiakna anneakpoai sungah sam hi,

¹⁰ahihang ama in a suapui sealh Solomon, kamsaangpa Nathan, Benaiah le kumpipa a cingpa sam ngawl hi.

¹¹Tua zawkciang Nathan in Solomon ii nu Bathsheba kungah pai in ama munah, “Haggith ii tapa Adonijah in ama le ama kumpipa a kisuasak hunlam za ngawl ni ziam? Tuaciang Kumpipa David in hi thu bangma he ngawl hi!

¹²Nangma le na tapa Solomon ii nuntakna na hu nuam le, ngaisutna hong pia khi hi,

¹³tu mama in Kumpipa David kungah pai in a, ‘Kumpipa awng, ciliap huai takin kei tungah kamciam nong piakna ah ka tapa Solomon in na kumpi za hong laih tu ci ka na ngawl ni ziam? Tua ahile Adonijah sia bangbangin kumpi suak thei ziam?’ ci in va dongh ta'n,” ci hi.

¹⁴Tuaciang Nathan in, “Tuasia ciang Kumpipa David taw na papau laitakin kei kong tum tu a, na thuson teng maan hi kong ci tu hi,” ci lai hi.

¹⁵Tua ahikom Bathsheba in kumpipa lupna inndoi sungah ama taw kimu tu in pai hi. Ama huai mama zo a, Shunem panin Abishag in ou hi.

¹⁶Bathsheba sia kumpipa mai ah a niamin hong kun a, tuaciang ama in, “Bang uuk ni ziam?” ci in dongh hi.

¹⁷Ama in, “Kumpipa awng, TOPA na Pathian ii min taw kei tungah ciliap huai takin kamciam nong piakna ah, nang zawkciang kumpi a suak tu sia ka tapa Solomon hi tu hi ci ni hi.

¹⁸Ahihang Adonijah sia kumpipa suak zo a, tuaciang hi thu huvau nang bangma he ngawl ni hi.

¹⁹Ama in khuital tam ma, tuute, khuino thaute sangaw biakpiakna in pia a, ama in biakpiakna poai ah na tapate, thiampipa Abiathar, na ngalkaphonpi ukpa Joab sam hi, ahihang ama in na tapa Solomon sam ngawl hi.

²⁰Kumpipa awng, Israel mite theampo in na kumpi za hong laih tu sia na son tu hong ngak tek hi.

²¹Tuabang na hi buale na thi pawpo ciang ka tapa Solomon le kei sia thumaan ngawlte a vawt bangin hong kivawt tu hi,” ci in zo hi.

²²Bathsheba a papau laitakin, kumpipa inn sungah Nathan tum hi.

²³Nathan a om hunlam kumpipa tungah kison a, kamsaangpa Nathan sungtangin kumpipa mai ah kun hi.

²⁴Tua zawkciang ama in, “Kumpipa awng, Adonijah sia nang hong laih tu kumpipa ci in taangko zo ni ziam?

²⁵Tu ni mama in ama pai a, khuital tam ma, tuu le khuino thaute sangaw biakpiakna in pia hi. Ama in na tapate theampo, na ngalkaphonpi ukpa Joab, tuaciang thiampipa Abiathar te sam a, tu in amate poai khaam in, ‘Kumpipa Adonijah a khansau tahen!” ci in au uh hi.

²⁶Ahihang ama in kei hong sam ngawl hi, topa awng, thiampipa Zadok ahizong, Benaiah ahizong, Solomon ahizong sam ngawl hi.

²⁷Hiteng sia kumpipa ii na thukim ma ziam, nang hong laih tu sia na uliante ngawngawn zongh na son ngawl ma ahi ziam?” ci hi.

²⁸Kumpipa David in, “Bathsheba hong tumsak kik tavun,” a ci ciang ama hong pai a, ama mai ah ding hi.

²⁹Tuaciang ama munah, “Ka ngim nga na theampo pan hong suatakpa, a nungta TOPA min taw nang tungah kamciam hong pia khi hi,

³⁰tu ni in TOPA Israel te ii Pathian min taw kamciam kong piak sia kholet tu khi hi, na tapa Solomon in keima kumpi za hong laih tu hi,” ci hi.

³¹Bathsheba kunsuk in, “Ka topa kumpipa nungta tawntung tahen!” ci hi.

³²Tua zawkciang David kumpipa in Zadok, Nathan le Benaiah samsak hi. Amate hong pai ciangin,

³³ama in, “Ka zum uliante keng vun a; ka tapa Solomon sia ka laa tungah tosak in, Gihon cik ah tha suk tavun,

³⁴tua munah Zadok le Nathan in Israel kumpipa tu in sathau noai tahen. Tua zawkciang lemle tum vun a, ‘Solomon kumpipa a khansau tahen!’ ci in au vun.

³⁵Ka kumpi tokhum tungah to tu in hi munah hong heak kik ciangin, a nung zui vun. Ama in ka kumpi za hong laih tu hi banghang ziam cile ama sia Israel le Judah uk tu in ka tealsa ahi hi,” ci hi.

³⁶Benaiah in, “Na dei bangin ka seam tu hi, tuaciangin TOPA in hong kipsak tahen.

³⁷TOPA in nang kumpipa hong ompui bangin Solomon taw zong hong omkhawm tahen, tuaciang ama ii kumpi maanna zongh nang sangin mainawt zaw lai tahen,” ci in zo hi.

³⁸Tua ahikom Zadok, Nathan, Benaiah le kumpipa a cingte in Solomon sia Kumpipa David ii laa tungah suan in, Gihon cik ah tha uh hi.

³⁹Zadok in TOPA ompuina puanbuk pan a paipui olive thau bung la in, Solomon sathau noai hi. Amate in lemle tum a, mipite theampo au in, “Kumpipa Solomon a khansau tahen!” ci uh hi.

⁴⁰Tua zawkciang amate theampo in ama nungzui kik a, lungdam in a auna le tamngai a tumna hu in, lei liing khop dongin a aw uh nging hi.

⁴¹Adonijah le a leangnate theampo a poai a man kuan ciang, tua awnging za uh hi. Tuaciang Joab in lemle aw a zaak ciang, “Khuapi sungah awnging sia bang khiakna nei ziam?” ci in dongh hi.

⁴²A pau a man ma in thiampi Abiathar ii tapa Jonathan hong theng hi. Adonijah in, “Hong pai ta'n, nang pasal pha khat ni hi, thupha khat hong puak hi nanak tu ni hi,” ci hi.

⁴³Jonathan in, “Thupha hong puak ngawl khi hi,” ci in zo hi. “Kumpi ahi David kumpipa in Solomon sia kumpipa suaksak hi.

⁴⁴Ama in Zadok, Nathan, Benaiah le kumpipa cingte in thasak hi. Amate in kumpipa laa tungah Solomon tosak uh hi,

⁴⁵tuaciang Zadok le Nathan in Gihon cik ah sathau noai in kumpi suaksak hi. Tua zawkciang amate lungdamna taw au kawmin khuapi sungah tum uh a, tuasia ciang tu in mipite ngamlum lialua uh hi. Tuasia, tu a na zaak uh awnging sia ahi hi.

⁴⁶Solomon sia tu in kumpipa suak zo hi.

⁴⁷Tua teng bek dom ngawlin kumpipa ii uliante pai a, Kumpipa David zatakna pia in, ‘Na Pathian in Solomon sia nang sang zongh in minthangsak zaw lai tahen, tuaciang Solomon kumpi maanna sia nang aa sangin nopci zaw lai tahen,’ ci uh hi. Tua zawkciang Kumpipa David in a lupna tungah kun in biakpiakna vawt a,

⁴⁸tuaciang in thungen hi, ‘Ka suan ka paalte khat tuni in kei hong laih in kumpi a suasak sia a mu tu in hong nungtasak Israel ii Pathian TOPA pok tek tawng,’ ” ci hi.

⁴⁹Tuasia ciang Adonijah ii leangnate lau in, a vekpi ding a, amate a sansak tek ah pai uh hi.

⁵⁰Adonijah in Solomon kiita mama ahikom TOPA ii ompuina puanbuk sungah pai a, biaknatau kiil lenin om hi.

⁵¹Adonijah in ama kiita ahikom biaknatau king lenin om a, ama in, “A masa phitbel in Kumpi Solomon in kei hong thalup ngawl natu kamciam hong pia le dei khi hi,” a ci teng Solomon tungah kison hi.

⁵²Solomon in, “Ama kei tungah hong thumaan po le a luzang samzam khat zongh kithutha ngawl tu hi; ahihang hong thumaan bua ahile thi tu hi,” ci in zo kik hi.

⁵³Tua zawkciang, Solomon kumpipa in Adonijah sia biaknatau panin samsak hi. Adonijah hong pai in kumpipa ii mai ah kun suk a, tuaciang kumpipa in ama munah, “Nang cia thei ni hi,” ci hi.