Read Siyin Chin 1 Kumpite 10 Bible Online

1 Kumpite 10 - Siyin Chin bible

1 Kumpite 10

¹Sheba kumpinu in Solomon minthanna za a, tuaciang thudokna haksa pawlkhat taw ama ze et tu in Jerusalem ah haw hi.

²Ama in a lalangte honpui khat, hel namtuite, suangmanpha le khamh tam ma a pua kalaoh te hong paipui hi. Ama le Solomon a kisik ciangin a ngaisut thei za taw thu doknate nei hi.

³Solomon in tua teng zo thei siat hi; ama a tu zo mawk tu a haksa leih bangma om ngawl hi.

⁴Sheba kumpinu in Solomon ii ciimna za a, kumpi inn a sak sia mu hi.

⁵Kumpinu in kumpipa sabuai ah a kilui ante, a uliante ii teenna innte, kumpi inn sung naseamte ii nasep hawm zia le a puansilhte, poaipi khaam ciang a sabuai ngak naseamte le Biakinnpi sungah a sangaw biakpiaknate mu hi. Ama in husamh liangin lamdang sa hi.

⁶Ama in Kumpipa Solomon munah, “Ka ngam panin na ciimna le nangma thu kong zaakte maan siat hi!

⁷Ahihang hong pai a keima tatak ma in ka mu mateng ka um thei bua hi. Ahihang a lang zongh za ngawl lai hi nginge khi hi; na ciimna le na hauna te kei tungah hong kiko za sangin nasia zaw lai hi.

⁸Na zite bangza in hampha uh ziam! Na ciimna kammalte hong za tawntung, na kung a om, na naseamte zongh hampha mama hi!

⁹TOPA na Pathian pok in! Ama in nang Israel kumpipa hong suasak ciang nang tungah a lungkimzia ama in lak zo hi. Ama ii Israel te hong itna kip tawntung ahikom, nang sia thukham le thutang khenna na kepcing thei natu in, amate kumpi hong suaksak zo hi,” ci hi.

¹⁰Ama in Solomon kumpipa tungah letsong hong paipui teng: khamh kilogramme 4,000 vaal, hel namtuite le suangmanpha tam mama pia hi. Tua hel namtui teng sia ama ii vanh saan ngei theampo sung pan a nasiabel ahi hi.

¹¹(Ophir panin khamh hong ciapui Hiram ii teambaw te in juniper thing le suangmanpha zongh hong ciapui hi.

¹²Solomon in tua thingte taw Biakinnpi le kumpi inn dalna te, tuaciang music thiamte atu tengtongh le liamlo vawtna in nei hi. Tuate sia Israel ngam sungah a kiciapui ngei juniper thing phabel teng po pan a phabel hi; hi bangte bangma hunin kimu kik ngei nawn ngawl hi.)

¹³Kumpipa Solomon in Sheba kumpinu sia ngo takin a kipiak ngei letsongte vaalin a nget theampo pia hi. Tua zawkciang ama le a lalangte Sheba ngam ah cia uh hi.

¹⁴Kum simin Solomon Kumpipa in khamh kilogramme 23,000 dektak nga hi,

¹⁵tua banah sumvawtte ii shia piakte, sumzuak sumleina tung pan a meet, le Arab kumpite le Israel ngamkhen uk mangte ii piak shia te zongh nga hi.

¹⁶Solomon in lum a lian 200 vawtsak a, khat simin khamh kilogramme 7 dektak taw veu zeamsak hi.

¹⁷Ama in lum a no zaw 300 zongh vawtsak a, khamh kilogramme 2 dektak taw veu zeamsak hi. Ama in hi lumte teng Lebanon Thingtaam Inndoipi sungah koisak hi.

¹⁸Ama in kumpipa tokhum lian khat zongh vawtsak hi. Tuasia ii khen khat sia saiha taw tuam a, a taanglai teng khamh phabel taw tuam hi.

¹⁹Kumpi tokhum kung thet to natu keallei dawl luk om in, a dawl khat ii mong sim ah tawpi lim khat veu taw a vekpi tawpi lim sawm le nii om hi. Kumpi tokhum ii nungsangah khuital lu ii lim suang a, a khut ngakna baan te nii pangh ah tawpi lim khat veve kivawt hi. Kumpi ngam koima dang ah hi bang kumpi tokhum om ngeingawl hi.

²¹Solomon ii hai theampo khamh taw kivawt hi, tuaciang Lebanon Thingtaam Inndoipi sung a, ankuang ankeau theampo khamh ciitak taw kivawt hi. Solomon hun lai in ngunn sia a manpha in kingaisun ngawl ahikom ngunn kizangh ngawl hi.

²²Ama in tuipi teambaw hon nei a, Hiram ii teambaw hon taw paikhawmsak hi. Kum thum simin ama teambaw hon sia heak kik in, khamh, ngunn, saiha, zawng te le mei nei ngawl zawngku puite ciapui hi.

²³Solomon kumpipa sia kumpi dang khat pawpo sangin hau zawin ciim zaw hi,

²⁴tuaciang, leitung bup in Pathian ii piaksa ama ii ciim kam pauna te ngai tu in hong pai nuam uh hi.

²⁵Hong pai peuma in ama letsong khat veu — ngunn le khamh taw a kivawt nate, puantualte, ngalhiam te, hel namtuite, siphute le laate puak hi. Kum khat zawk kum khat tuabangin kipia tan hi.

²⁶Solomon in siphu ngalleang 1,400, ngalsim siphu 12,000 nei hi. Tuate pawlkhat Jerusalem ah koi a, a dang teng khuapi dang ah koi kawkoai hi.

²⁷Ama ii uk hun sungin ngunn sia suang bangma in Jerusalem khua sungah om a, cedar sia sycomore thing thawthong za in Judah mualpeangte ah tam hi.

²⁸Kumpipa ii taang mite in Musri le Cilicia pan ngamdang a puak tu siphute,

²⁹tuaciang Egypt pan ngamdang a puak tu siphu ngalleangte saisak uh hi. Amate in Hit mite le Syria kumpipate atu, siphu le siphu ngalleangte vaihawmsak in, siphu ngalleang khat ciang ngunntang 600, siphu khat ngunntang 150 taw zuak uh hi.