Read Siyin Chin 1 Kumpite 17 Bible Online

1 Kumpite 17 - Siyin Chin bible

1 Kumpite 17

¹Gilead ngam Tishbe panin Elijah a kici kamsaangpa in Ahab kumpipa munah, “A na ka sepsak Israel te ii a nungta Pathian, TOPA min taw keima in nang tungah kong sonna pan keima ii kong son kik mateng kum nii ahibuale kum thum sung daaitui ahizong, nguatui ahizong hang tu hi,” ci hi.

²Tua zawkciang TOPA in Elijah munah,

³“Hi mun nusia in a, nisuana sangah pai in Cherith luino hui ah buu ta'n.

⁴Tua luino in na zak tu tui hong sik tu a, tuaciang va-akte in nangma tua munah an hong puak tu in thupia zo khi hi,” ci hi.

⁵Elijah in TOPA ii thupiakna zui in, Cherith luino ah pai in tua munah taam hi.

⁶Ama in Luitui dawnin, va-akte in zing sim nitak simin anluum le sa puak hi.

⁷Tawm vei zawkciang nguatui kisap hu in lui sia kang hi.

⁸Tua zawkciang TOPA in Elijah munah,

⁹“Tu in Sidon nai ah a om Zarephath khua ah pai in a, tua munah om ta'n. Tua munah meingong nupi khat nang an hong vaak tu in thupia zo khi hi” ci hi.

¹⁰Tua ahikom Elijah sia Zarephath ah pai a, khua kongpi a thet ciang, meingongnu khat thingtom in om mu hi. Ama in, “Tui neak khat hong puak ta'n,” tua nu tungah ci hi.

¹¹Tui laksak tu in a pai ciang, “Nong hesuakna in anluum zongh hong paipui ta'n,” ci thua hi.

¹²Ama in, “Anluum nei ngawl het khi hi ci in a nungta TOPA na Pathian min taw ka kiciam ngam hi. Ka nei theampo sia kuang sungah anvui khut hum khat le thawl sungah olive thau tawmcik bek hi. Hi sungah kong pai sia thing tawm tom a ciapui in, ka nei sun teng ka tapa le keima neak tu in vawt tu khi hi. Tuasia koma an neak khakbel hi tu a, tua zawkciang pukthi tu khu hi,” ci hi.

¹³Elijah in, “Thintoi heak in, va pai ta'n a, an na vawt ta'n. Ahihang a masa phitin na nei sung pan kei atu anluumno khat hong vawtsak ta'n a, kei hong puak ta'n, tua zawkciang nang le na tapa atu a om lai teng vawt in.

¹⁴Banghang ziam cile hisia sia TOPA, Israel te ii Pathian ii pauna hi: ‘Kuang sungah anvui thot ngeingawl tu a, thawl sungah sathau sia, keima TOPA ii nguatui ka puak ni mateng kang ngeingawl tu hi,’ ” ci hi.

¹⁵Meingong nu in Elijah sawl bangin pai in ngamta a, tuaciang amate in ni tam mama sung a khom tu an nei uh hi.

¹⁶TOPA ii Elijah tungtawn a kamciam a piak bangin, kuang sungah anvuite thot ngawlin, thawl sungah sathau a kang bua hi.

¹⁷Tua zawk tawmvei ciangin meingong nu ii tapa a ci na hi; ama zawm vaial in a khakbel ciang thi hi.

¹⁸Ama in Elijah munah, “Pathian mipa awng, banghangin hi bangin kei hong vawt ni ziam? Hi sungah nong pai sia ka mawna teng Pathian in phawksak a, ka tapa thi natu in hong vawt ni ziam?” ci hi.

¹⁹Elijah in, “Patang sia keima hong pia ta'n,” ci hi. Ama in patang sia a khut sung pan la a, ama ii omna inn tung inndoi ah toai to in, lupna tungah sial hi.

²⁰Tua zawkciang nging takin thungen a, “Oh, TOPA ka Pathian awng, banghangin hi bang meingongnu tungah a lauhuai mama in vawt ni ziam? Ama dik a kei hong vaak kasap tu in a tapa thalupsak ni hi!” ci hi.

²¹Tua zawkciang Elijah in patang sia tungah thumvei bokin kizalh a, “Oh, TOPA ka Pathian awng, hi patang a nuntakna pia kik in!” ci in thungen hi.

²²TOPA in Elijah ii thungetna zo a; patang sia a hu hong sang kikin hong nungta kik hi.

²³Elijah in patangpa sia inn nuaidawl a nu kungah paipui suk kikin a nu munah, “En in, na tapa nungta hi!” ci hi.

²⁴Ama in, “Tu ahile nang sia Pathian ii mi khat hi a, tuaciang TOPA in nang tungtawnin hong pau takpi hi, ci in hong he khi hi,” ci in zo hi.