Read Siyin Chin 1 Kumpite 18 Bible Online

1 Kumpite 18 - Siyin Chin bible

1 Kumpite 18

¹Nguatui a hanh zawk kum thum a phak zawk hiat ciangin TOPA in Elijah munah, “Va pai ta'n a, Kumpipa Ahab mai ah kilak ta'n, tuaciang ngua kong zusak tu hi,” ci hi.

²Tua ahikom Elijah hong kipan hi. Samaria a kialpi tung sia a nasia bel laitak ahi hi,

³tua ahikom Ahab in kumpi inn a uk pa Obadiah sam hi. (Obadiah sia TOPA a bia thu um khat hi a,

⁴Jezebel in TOPA ii kamsaangte a thalup lai in, Obadiah in tua kamsaangte zakhat la in, suanghawng sungah pawl khat ciang 50 veu khen in pawl nii in seal a, an le tui sik hi.)

⁵Ahab in Obadiah munah, “Ih siphute le laate a nungta in ih kep thei natu in lopa a kicing ih mu zo ziam maw, ngamsung tuinaak theampo le ngun omna theampo ah pai in zong sin tawng. Ih ngannote khat zongh ih thalup kul ngawl tha tu hi,” ci hi.

⁶Amate ngamsung koisungsan ah akua pai in zong tu ziam ci in thukimna vawt a, mun tuatuam ah vaiding tek uh hi.

⁷Obadiah in a paina lam tungah thakhat thu in Elijah taw kisi hi. Ama in tel a, ama ii mai ah a niamin kunsuk a, “Topa awng, nangma tatak ma ni ziam,” ci in dongh hi.

⁸Ama in, “Hi khi hi, keima Elijah khi hi” ci in zo hi. “Pai in a, na topa, kumpipa munah hi sungah ka om hunlam va son ta'n,” ci hi.

⁹Obadiah in, “Kumpipa Ahab ii hong thalup tu launa sungah nong koi natu in bang khialna nei khi ziam?

¹⁰A nungta TOPA, na Pathian taw kiciam ngam khi hi, leitung ngam theampo ah kumpipa in nang hong zongsak zo hi. Ngam khat a ukpa in nang sia ama ii ngam sungah om ngawl hi ci in thu a puak le Ahab in tua ngam ah nang hong kimu zawk ngawlna thu sia tua ngamukpa kiciamsak hi.

¹¹Tuaciang tu in nang hi sungah na om sia son tu in ama kungah pai le hong oai ni ziam?

¹²Ka pai po ciang Pathian ii thaa in nang sia heak ngeingawlna mundang khat pawpo ah hong tua luilam le bang law tu khi ziam? Tuasia ciang Ahab munah nang hi sungah om hi ka ci ciang, ama in hong mu zo buale kei hong thatlum tu hi. Ka no ciang a thu um, TOPA a biapa ka hi hunlam sia ciamtee in.

¹³Jezebel in TOPA kamsaangte a thalup lai in amate suanghawng sungah 50 veu pawl nii sua in, zakhat ka seal a, an le tui ka vaakna thu za ngeingawl ni ziam?

¹⁴Tua ahikom bangbangin nang hi sungah na omna thu kumpipa kungah son tu in hong sawl thei ni ziam! Ama in kei hong that tu hi!” ci in zo hi.

¹⁵Elijah in, “A na a seam keima in a nungta TOPA taw kiciam khi hi, kumpipa mai ah tu ni kilak tu in kiciam khi hi,” ci in zo hi.

¹⁶Tua ahikom Obadiah in Ahab kumpipa kungah pai in a son ciang, Ahab sia Elijah taw kimu tu in vaiding hi.

¹⁷Ahab in a mu ciangin ama munah, “Zialai ah nang — Israel ngam sungah ngimna a nasiabel a piangsak pa om na hi ziam!” ci hi.

¹⁸“Kei ngimna a piangsak pa hi ngawl khi hi,” ci in Elijah in zo hi. “Nangma ni hi — nangma le na pa na hi uh hi. Nangma in TOPA ii thupiakte zui ngawlin Baal milimte bia ni hi.

¹⁹Tu in Israel mite theampo kei taw Carmel mual ah kisi tu in thupia in. Baal kamsaang 450 le numeipathian Asherah kamsaang 400, kumpinu Jezebel ii a vaak teng hong paipui tavun,” ci hi.

²⁰Tua ahikom Ahab in Israel mite theampo le Baal kamsaangte sia Carmel Mual ah sam hi.

²¹Elijah in mite kungah paito in, “Na thin uh na khensat natu in bang tanvei hai lai tu nu ziam? TOPA sia Pathian ahile ama bia vun; ahihang Baal sia Pathian ahile bia vun!” ci hi. Ahihang mite in kam khat zongh pau ngawl uh hi.

²²Tuasia ciang Elijah in, “TOPA kamsaang sia kei bekma taanglai khi hi, ahihang Baal kamsaangte sia 450 om hi.

²³Khuital nii hong paipui tavun; Baal kamsaangte in khat lasak vun a, tua sia ngoin, semneen in thingkangte tungah koisak vun — ahihang meitaw heak vun. Keima in khuital dang khat sia tuabang ma in ka vawt tu hi.

²⁴Tua zawkciang Baal kamsaangte in amate ii pathian tungah thu ngen hen, tuaciang keima in TOPA tungah thu ka ngen tu a, tuaciang meikuang hong puakna taw thunget hong zo pa — ama sia Pathian hi,” ci hi. Mipite lungkim in au uh hi.

²⁵Tuaciang Elijah in Baal kamsaangte munah, “No tam mama na hi uh ciang, noma khuital khat la in kinging khol masa vun. Noma pathian tungah thungen vun, ahizong thingkang te tungah meitaw heak vun,” ci hi.

²⁶Amate kungah a kipaipui khuital sia amate in la a, a vawt tu bang vawtin nisun dong Baal tungah thu ngen uh hi. Amate in, “Hong zo ta'n, Baal awng!” ci in au a, amate ii a sak biaknatau sia ii kiimkot ah laam top uh hi. Ahihang zona hong pai bua hi.

²⁷Sun hun ciang Elijah in amate nunau tu hong kipan hi: “A nging zaw in thungen ve vun! Ama sia pathian khat hi! Ama mangngai in om ziam, awnghaw ziam, tua ahibuale khualhaw ziam khat hi thei tu hi! Tua ahibuale zong a mut laitak hi thei tu hi, na phok uh kul tu hi!” ci hi.

²⁸Tua ahikom kamsaangte in nging zaw lai in thu hong ngen in, amate ii zeksa ngeina om bangin naamte, naamzumte taw amate le amate chisan a luan dongin ki at uh hi.

²⁹Sun ni kaai dongin amate au lialua in om top lai uh hi; ahihang zona hong pai ngawl a, aw khat zongh kiza ngawl hi.

³⁰Elijah in mipite munah, “Ka kung nai hong neak zaw tavun,” a ci ciang amate in ama kiimkot ah kikhawm uh hi. TOPA biaknatau a kibaltham sia hong pua kik hi.

³¹Israel ci in TOPA ii Israel min a piakpa Jacob tate min a kivaw nam sawm le nam nii sim atu in suangtum sawm le nii la hi.

³²Hi suangte taw ama in TOPA biak natu biaknatau sa kik hi. Ama in tua kiimkot ah tui litre 14 dektak a ta thei tu dum to hi.

³³Tua zawkciang ama in thingkangte biaknatau tungah koi in, khuital sia semneen a, thingkangte tungah koi hi. Ama in, “Tui pheal li hong dim tavun, a biakpiakna tung le thing tungah hong sung tavun,” ci hi. Amate in tuabang ma in vawt a,

³⁴tuaciang ama in, “Hi kik vun,” ci hi — amate in sung kik hi. Ama in, “Khatvei ma hi lai vun,” ci hi — tuaciang amate in tuabang ma seam uh hi.

³⁵Tui sia biaknatau kiim ah hong luang a, dum sung hong dim hi.

³⁶Nikai sang sangaw biakpiakna hun tak ciang Elijah in biaknatau neak in thungen hi. “Oh TOPA, Abraham, Isaac le Jacob te ii Pathian awng, tu in nang Israel ii Pathian hi a, tuaciang kei sia na naseampa ka hina taw nong sawl bangin hi bang teng ngamta ka hina thu sia hong lak ta'n.

³⁷Hong zo ta'n TOPA, kei hong zo ta'n, tua hile hi mite in nang TOPA Pathian hi a, tuaciang amate nang kungah heak kiksak tu ni hi,” ci hi.

³⁸TOPA in meikuang hong puaksuk a, sangaw biakpiakna, thingkangte, suangtumte kaanghtham in, lei zongh kaangh upsak a, dum sungah tuite kosak hi.

³⁹Mipite in hisia a mu uh ciang amate le amate lei ah hong bok suk a, “TOPA sia Pathian hi; TOPA bekma Pathian hi!” ci in au uh hi

⁴⁰Elijah in thupia a, “Baal kamsaangte man vun; kuama suaktasak heak vun!” ci hi. Mipite in amate man siat a, tuaciang Elijah in Kishon Ngun ah paipui sukin amate thatlum hi.

⁴¹Tua zawkciang Elijah in Kumpipa Ahab kungah, “Tu in va pai ta'n a, an va ne ta'n. Nguazu nuam kisa in a hawk bangza khi hi,” ci hi.

⁴²Ahab an ne tu a pai laitakin Elijah sia Carmel Mualdawn ah kaato a, lei ah kun sukin, a khup sungah a lu phum hi.

⁴³A naseampa munah, “Va pai ta'n a, tuipi sang va en ta'n,” ci hi. A naseampa pai a hong heak kik in, “Bangma mu bong,” ci hi. Salivei vaset Elijah in a naseampa pai in en a sawl hi.

⁴⁴A sali veina ciangin ama hong heakkik a, “Meeikaai no khat mihing khut saang a lianzaw ngawl khat tuipi panin hong paito ka mu hi,” ci hi. Elijah in a naseampa thupia a, “Kumpipa Ahab kungah va pai ta'n a, ama siphu ngalleang sungah to in, ngua ii khaktan ma inn ah a ciakik natu va son ta'n,” ci hi.

⁴⁵Hun tawm no sungin van sia meeivom dim in, vui va a, ngua nasia takin zuk tu kipan hi. Ahab zongh siphu ngalleang sungah to in, Jezreel ah cia kik hi.

⁴⁶TOPA ii thahatna Elijah tungah hong theng a; ama in a puante a kawng ah ngat takin sawmin, Jezreel a thet dong Ahab ii mai ah tai hi.