Read Siyin Chin 1 Kumpite 19 Bible Online

1 Kumpite 19 - Siyin Chin bible

1 Kumpite 19

¹Kumpipa Ahab in a zi Jezebel munah, Elijah ii ngamtatna theampo son a, Baal kamsaang theampo a thalup na thu teng son siat hi.

²Tua nu in Elijah kam khat thaak hi: “Kamsaangte tungah na vawt bang keak in zing ciang tu hunin nang tungah kong vawt bua tale pathiante in kei hong vaatlum tahen,” ci hi.

³Elijah lau a, a nuntakna kihuk natu in, a naseampa taw Judah ngam Beersheba zuan in tai hi. A naseampa tua munah nusia a,

⁴Elijah sia nitangtum duisung ah a peangin pai hi. Ama in thinglim nuai khat ah tawlnga in to a, tuaciang thithei le uuk hi. “Nasia leih hi, TOPA awng, ka nuntakna hong laaksak ta'n; thi leng zong phazaw tu hi,” ci in thungen hi.

⁵Ama in thingkung nuai ah lumin mu hi. Thakhat thu in vantunglalang khat in tham a, tuaciang, “Tho in a ne in,” ci hi.

⁶A kiimkot a et ciang a luthung ah anluum khat le tuidam thawl khat mu hi. Ama in tuate ne a, tua zawkciang lum kik hi.

⁷TOPA ii vantunglalang heakkik in a nii veina in phong a, “Tho in a, an ne in, tua ahibuale na khualhaw natu sia nang atu haksa lei tu hi,” ci hi.

⁸Elijah tho in a neak ciang tua an in ni 40 sung mual thiangtho Sinai dong a pai khom natu thangui thatang nguan hi.

⁹Tua munah zan ngiak tu in suanghawng khat ii sungah tum hi. Thakhat thu in TOPA in, “Elijah, hi sungah bang vawt ni ziam?” ci hi.

¹⁰Ama in, “TOPA Pathian Vaanglianbelpa awng, nangma ii na — nangma bekma ii na hong sepsak tawntung khi hi. Ahihang Israel mite in nang taw a thuciamna paltan in, na biaknataute baltham a, na kamsaangte thatlum siat hi. Keima bekma taanglai khi hi — tuaciang amate in kei hong that nuam in hanciam uh hi!” ci in zo hi.

¹¹TOPA in ama tungah “Pusuak in a, mualdawn keima mai ah hong ding ta'n,” ci hi. Tua zawkciang TOPA in kaantan a, vuipi nasia mama khat vasak in, mualnote kikhenthamsak a, suangtumpuite neenthamsak hi — ahihang tua vui sungah TOPA om ngawl hi. Vui vak thim a, tua zawkciang zinliing hi — ahihang zinliing na sungah TOPA om ngawl hi.

¹²Zinliin zawkciang meikuang khat om a, — ahihang tua meikuang sungah TOPA om ngawl hi. Tua meikuang sia zawkciangin kihuauna awneal no khat za hi.

¹³Elijah in tua a zaak ciang a maitang a puantual taw sealin pusuak a suanghawngkua mai ah ding hi. Aw khat in ama tungah, “Elijah, hi sungah bang hi ni ziam?” ci hi.

¹⁴Ama in, “TOPA Pathian Vaanglianbelpa nangma ii na — nangma bekma ii na hong sepsak tawntung khi hi. Ahihang Israel mite in nang taw a thuciamna paltan in, na biaknataute baltham a, na kamsaangte thatlum siat hi, Keima bekma taanglai khi hi — tuaciang amate in kei hong that nuam in hanciam hi,” ci hi.

¹⁵TOPA in ama munah, “Damascus naina duisung ah heak kik ta'n a, khuapi sungah tumin, Hazael sia Syria kumpipa tu in sathau noai ta'n;

¹⁶Nimshi ii tapa Jehu sia Israel kumpipa tu in sathau noai ta'n, tuaciang Abel Meholah pan a, Shaphat ii tapa Elisha sia nang hong laih kamsaang tu in sathau noai ta'n.

¹⁷Hazael ii thalup natu pan a suakta a om le Jehu in thatlum tu a, Jehu ii thalup tu pan a suakta a om le Elisha in thatlum tu hi.

¹⁸Ahihang Israel ngam ah a nungta in mihing tulsali khe lai tu khi hi — tuate sia kei tungah hong thumaan theampo le Baal mai ah a kun ngawl, a milim a namh ngawlte ahi uh hi,” ci hi.

¹⁹Elijah in tua mun nusia in a pai le Elisha sia khui kap taw lotho in a om mu hi; ama mai ah kap sawm le kap khat om a ama sia a khakbel kap sia taw lotho hi. Elijah in a puantual suut a Elisha silhsak hi.

²⁰Tuasia ciang Elisha in a khuitalte nusia in Elijah del a, “Ka pa le ka nu ka vaithakna in va namh phot tong, tua zawkciang nangma taw tonkhawm tu khi hi,” ci hi. Elijah in, “Pha hi, cia kik ta'n. Hong khaam ngawl khi hi,” ci in zo hi.

²¹Tua zawkciang Elisha sia ama ii khuikaapte ngoin, a khui hakkolte mei thuna thingin zangh in a sa huan hi. Ama in a sa sia mipite hawmsak a, ne uh hi. Tua zawkciang ama in Elijah ii hupa in a nungzui hi.