Read Siyin Chin 1 Kumpite 20 Bible Online

1 Kumpite 20 - Siyin Chin bible

1 Kumpite 20

¹Syria kumpipa Benhadad in a ngalkap theampo khawm a, ngam uk 32 te ii huna siphu le siphu ngalleang te taw kuanto in Samaria khuapi uumci in sim hi.

²Ama in khuapi sungah kamtaite paisak in Israel kumpipa Ahab munah, “Kumpipa Benhadad in

³ama tungah na ngunn, na khamh, na numeite le na tate a hatbel teng taw na lut tu hong tangkal hi,” ci hi.

⁴Ahab in “Kumpipa Benhadad ka topa munah ka lungkimna thu son tavun; ama in kei le ka neisa theampo tang thei hi,” ci in zo hi.

⁵A zawkciang kamtaite in, Benhadad tung pan ngetna dang khat taw Ahab kungah hong heak kik uh hi. “Na ngunn, na khamh, na numeite le na tate nong aap natu kam hong thaak khi hi.

⁶Ahizong tu in, ka uliante kong paisak tu a, na kumpi inn le na uliante ii innte tok in, manpha a sak theampo la tu hi. Amate zing ciang tubang hun khawngin hong theng tu hi,” ci hi.

⁷Kumpipa Ahab in ngamsung a lampui theampo samin, “Na mu uh hi a, hisia pa in ei hong susia nuam hi. Ama in kam hong thaak a, ka zite ka tate le ka ngunn ka khamh teng hong ngen hi, tuaciang kei lungkim khi hi,” ci hi.

⁸Lampuite le mipite in, “Ama bangma awlmaw heak in; lut heak in!” ci in zo hi.

⁹Tua ahikom Ahab in Benhadad ii kamtaite munah, “Hong nget masak teng thukim khi hi, ahihang a niina sia thukim zo ngawl khi hi, ka topa kumpipa munah va ci tavun,” ci in zo kik hi. Kamtaite va pai a, tua zawkciang hong heak kikin

¹⁰Benhadad tung pan kamthaak dang khat hong keng hi: “Na khuapi hisia a susia zo tu le amate khut tek taw suangbek teng a vawk siat zo tu mihing a khom kong paipui tu hi. Tuabangin ka ngamta bua ta le pathiante in hong vaatlum tahen!” ci hi.

¹¹Kumpipa Ahab in, “Kumpipa Benhadad munah son tavun a, ngalkap citak khat in ngal kido zawkciang kisuangtaak pheang a, kido ma in kisuangtaak ngawl hi,” ci in zo hi.

¹²Benhadad in Ahab ii zona kam sia ama le a kipawlpui ngamuk dangte taw a puanbukte sungah zu a neak laitakin kison hi. Ama in a mite, khuapi sim tu kinging in sawl a, tua ahikom amate sia dinmun la tu in kuan uh hi.

¹³Tua laitakin kamsaang khat Kumpipa Ahab kungah hong pai a, “TOPA in, ‘Tua ngalkap hon lian sia kiita heak hen! Tuni in tuasia nangma in kong zosak tu hi, tuasia ciang keima TOPA ka hi hunlam nong he tu hi,’ ” ci in son hi.

¹⁴Ahab in, “Akua in kidona lampui tu ziam?” ci in dongh hi. Ngamkhen uk mangte ii nuai ah a seam khangmoi ngalkapte in lampui tu hi “TOPA in ci hi,” ci in kamsaangpa in zo hi. Kumpipa in, “Ngalkaphonpi sia akua in uk tu ziam?” ci in dongh hi. “Nangma,” ci in kamsaangpa in zo hi.

¹⁵Tua ahikom kumpipa in ngamkhen uk mangte ii nuai a ngalkap khangmoi te sam a, a vekpi sia 232 pha hi. Tua zawkciang ama in Israel ngalkaphonpi sam a, a vekpi in 7,000 pha hi.

¹⁶Kisimna sia sun laitakin kipan a Benhadad le a pawlpui 32 te a puanbukte sungah zu khamin a om laitak ahi hi.

¹⁷Ngalkap khangmoite kuan masa uh hi. Benhadad ii paisak ngalvilte in Samaria pan ngalkap pawlkhat hong pai hi ci in ama tungah ko uh hi.

¹⁸Ama in thupia a, “Hong sim tu in hong kuan ahizong, kilemna ngen nuam in hong pai ahizong, amate a nungta in pummat siat vun,” ci hi.

¹⁹Ngalkap khangmoite in kisimna lampui in, Israel ngalkaphonpi in zuisak a,

²⁰tuaciang mi simin ama ii kido pui tek that hi. Syria te tai in, Israel te in del ngawp paih ahihang Benhadad sia siphu tung to in tai a suakta hi, ama sia siphu ngalkap pawlkhat in tonpui hi.

²¹Kumpipa Ahab sia ngalphual ah hong kuan a, siphute le siphu ngalleang te manin, Syria te in nasia takin lel hi.

²²Tua zawkciang kamsaangpa zongh kumpipa Ahab kungah pai a, “Cia kik in a, na ngalkapte puuapha in, tuaciang a pha takin ngealkhol in, banghang ziam cile Syria kumpipa in mai khaal kipat ciang hong sim kik tu hi,” ci hi.

²³Kumpipa Benhadad ii uliante in, “Israel ii pathiante sia mualpi pathiante hi a, tua hu in Israel te in ei hong zo hi. Ahizong, zaangtam ah simin hi leang zo nanak tu hi hing ci uh hi.

²⁴Tu in ngamukmang sawmthum le nii te tawpsak in a, ngal a sim ngalkap maangte taw theak in.

²⁵Tuaciang nang hong taisan sa ngalkapte za in a tam ngalkaphonpi sam in, siphute le siphu ngalleangte zongh tua za ma sam in. Israel te zaangtamna ah ih sim tu a, tu sia ciangin amate ih zo tu hi,” ci hi Kumpipa Benhadad in amate ii ngaisut piakna sia thukim a, tuabangin ngamta hi.

²⁶Khaal kipat hun hong thet kik ciangin ama in ngalkapte sam a, Aphek khuapi ah Israel te sim tu in kuan uh hi.

²⁷Israel te sia kisam a, ngalvanh a cing in a kinguan sa hi; amate a kuan ciang pawl nii in kikhen a. Syria te taw kimaingat in ngiaphual saat uh hi. Israel ngalkapte sia Syria te ngamsung theampo ah a kizel te taw teengat ciang keal hon tawmno nii bang ahi hi.

²⁸Kamsaang khat Kumpipa Ahab kungah hong pai a, “TOPA in hi bangin ci hi: ‘Syria te in kei sia mualte pathian khat hi a, zaangtam te ii pathian hi ngawl hi hong ci hu in, hi ngalkap hon lian sia kong zosak tu a, tuasia ciang nang le na mite in keima TOPA ka hi hunlam nong he tu uh hi, ci hi,’ ” ci in son hi.

²⁹Ni sali sung Syria te le Israel te sia kimaitua in a ngiaphual tek ah om uh hi. A ni sali ni ciang amate a kido kipan a, Israel te in Syria te tul zakhat thatlum hi.

³⁰A suakta lai teng sia Aphek khuapi sungah tai a, a khuapi luphung cimh in, tua 27,000 te tung san ah taak suk hi. Benhadad zongh khuapi sungah suakta a, inn nung inndoi khat sungah om hi.

³¹Uliante ama kungah pai in, “Israel kumpipate sia ngual hesuak thei hi ci in za khu hi, Koma kawng ah khau-ip puan teangin ka ngawng uh ah khauhual te aw in, Israel kumpipa kungah ko hong paisak ta'n, tua hi le ama in na nuntakna hong khoaikhe tha tu hi,” ci uh hi.

³²Tua ahikom amate in a kawngah khau-ip puan teang uh a, a ngawng ah khauhualte vial in Ahab kungah, “Na naseampa Benhadad in a nungta in a suatak natu hong maangkaa hi,” ci uh hi. Ahab in, “Ama nungta lai ziam? Pha hi! ama sia ka suapui khat bangma hi!” ci in zo hi.

³³Benhadad ii uliante in limpha khat ngaingam in a om laitak Ahab in “suapuipa” a ci poma ciang, amate in thakhatin zawp in, “Na ci bangma in Benhadad sia na suapui pa hi!” ci uh hi. “Ama keima kungah hong paipui tavun,” ci in Ahab in thupia hi. Benhadad hong thet ciang Ahab in siphu ngalleang sungah a tokhawm tu in sam hi.

³⁴Benhadad in ama munah, “Ka pa ii na pa tung pan khua a laak teng hong pia kik tu khi hi, tuaciang Damascus khua ah nangma atu sumzuak sum leina phual khat zongh ka pa ii Samaria ah a koi bangin koi thei tu ni hi,” ci hi. Ahab in, “Hi thukimna tungtawnin nang hong suatak tu khi hi,” ci in zo kik hi. Ama in kiciamna khat vawtin, Benhadad paisak hi.

³⁵TOPA ii sawlna bangin kamsaang pawlkhat sung pan khat in a kamsaang pui khat mun ma ah, ama vua in sawl hi. Ahihang tua pa in nial hi,

³⁶tua ahikom ama in tua pa tungah, “TOPA ii thupiakna nial na hikom kei nong nusiat po ciang tawpi khat in nang hong thatlum tu hi,” ci hi. Tuaciangin a nusiat po ciang tawpi khat in zui paih a, ama that hi.

³⁷Tua zawkciang tua kamsaangpa ma in a dang khat ii munah, “Hong vua ta'n!” ci hi. Hi sia pa in vua hi; ama in nasia takin vua a liamsua hi.

³⁸A kimealseal natu in kamsaangpa in a maitang puan taw tuamin pai a, lampi hui ah Israel kumpipa hong kaantan tu ngakin ding hi.

³⁹Kumpipa hong kaantan ciang kamsaang pa in biakpui a, “Kumpipa awng, ngal ka do laitakin ngalkap khat in a ngal mat khat kei kungah hong paipui a, ‘Hi sia pa cing in; a suakta napo le na nuntakna taw lul tu ni hi, tua ahibuale zong ngunntang tulthum liau tu ni hi,’ hong ci hi.

⁴⁰Ahihang vai dang taw komla ka hikom tua pa suakta hi” ci hi. Kumpipa in, “Nangma le nangma thu kikhen ni hi, daan na thuak kul tu hi,’ ci in zo hi.

⁴¹Kamsaangpa in a maituamna puan eaukeak a, thakhat thu in kumpipa in kamsaang khat ahi hunlam tel paih hi.

⁴²Tuasia ciang kamsaangpa in kumpipa munah, “Hi sia TOPA ii kammal hi: ‘Thalup tu in kong thupiak pa suaktasak na hikom nangma in na nuntakna taw lul tu ni hi, tuaciang ama ii ngalkaphonpi na suataksak hu in nangma ngalkaphonpi kisusia tu hi,’ ” ci hi.

⁴³Kumpipa sia Samaria a inn ah cia kikin thinngim in a thin kiam hi.