Read Siyin Chin 1 Kumpite 22 Bible Online

1 Kumpite 22 - Siyin Chin bible

1 Kumpite 22

¹Israel te le Syria te kilaklaw ah tua zawk kum nii sung ngal kilemna om hi,

²ahihang a kum thumna ciang Judah kumpipa Jehoshaphat in Israel kumpipa Ahab taw kisi tu in hong pai hi.

³Ahab in a uliante munah, “Banghangin Syria kumpipa tung pan Gilead ngam Ramoth khua laak kik natu bangma seam ngawl hi ziam? Tuasia eima neisa hi!” ci in dongh hi.

⁴Tuaciang Ahab in Jehoshaphat munah, “Ramoth sim tu in kei taw nong paikhawm tu ziam?” ci in dongh hi. Jehoshaphat in, “Nangma ii kingin hunin, kei zongh kinging sa in om khi hi,” ci in zo hi, “Ka ngalkapte le ka siphu ngalkapte zongh tuabang ma hi,

⁵ahizong TOPA dongh phot tawng,” ci hi.

⁶Tua ahikom Ahab in kamsaangte 400 bang samin, “Kei pai in Ramoth sim tu khi ziam maw, sim ngawl tu khi ziam?” ci in dongh hi. Amate in, “Sim in, TOPA in zawna hong pia tu hi,” ci in zo hi.

⁷Ahihang Jehoshaphat in, “TOPA ih dok thei natu in kamsaang dang om nawn ngawl ziam?” ci in dongh hi.

⁸Ahab in, “Khat om lai hi, Imlah ii tapa Micaiah hi. Ahihang ama ensan khi hi, banghang ziam cile ama in kei atu a pha bangma sonkhol ngeingawl hi; a pha ngawl khat veu hi tawntung hi,” ci in zo hi. Jehoshaphat in “Tuabangin ci heak in!” ci in zo kik hi.

⁹Tuasia ciang, Ahab in zum uliante khat sam a, Micaiah thakhatin hong paipui ta'n, ci in sawl hi.

¹⁰Kumpipate nii sia kumpi puantualte silh a, Samaria kongpi pua sang ancilna ah kumpi tokhumte tungah a to laitakin, kamsaang theampo in amate mai ah thusuakte son uh hi.

¹¹Amate sung pan khat, Chenaanah ii tapa Zedekiah in thik kiite vawt a, Ahab munah, “Hisia TOPA ii pauna hi: ‘Hite taw Syria te na sim tu a, na zocip tu hi,’ ” ci hi.

¹²Kamsaang dang theampo in tuabang vive ma in ci uh hi. “Ramoth a sim tu kuan tavun, zo tu nu hi,” ci uh hi. “TOPA in zawna hong pia tu hi.”

¹³Tua laitakin Micaiah sam tu in a pai ulian pa in, “Kamsaang dangte theampo in kumpipa zawna tu bebek son zo hi, nang zongh tuabang ma son hamtang lete pha tu hi,” ci hi.

¹⁴Ahihang Micaiah in, “A nungta TOPA min lo in kamciam ka piakna pan ama ii son a hong sawl teng son tu khi hi!” ci in zo hi.

¹⁵Ama Kumpipa Ahab mai ah hong kipaipui ciang, kumpipa in, “Micaiah awng, Kumpipa Jehoshaphat le kei Ramoth ah kuanin sim tu khu ziam maw, sim ngawl tu khu ziam?” ci in dongh hi. Micaiah in, “Sim vun! Noma zo tu nu hi. TOPA in zawna hong pia tu hi,” ci in zo hi.

¹⁶Ahihang Ahab in, “TOPA min taw kei tungah nong pau ciangin thumaan thutak son in! Bang tanvei tuabangin hong ci tu khi ziam?” ci in zo kik hi.

¹⁷Micaiah in, “Israel ngalkapte sia mualtung tengah tuu cing pa om ngawl a tuute kithezau bangin ka mu hi. Tuaciang TOPA in, ‘Hi mite in lampui nei ngawl hi; inn ah thinnuam takin cia hen,’ ” ci hi.

¹⁸Ahab in Jehoshaphat munah, “Ama in kei huvau peuma a pha khat zongh hong sonkholsak ngeingawl hi, kong ci sa hi ka na ngawl ziam; a sia khat veu hi tawntung hi!” ci hi.

¹⁹Micaiah in zomto a, “Tu in TOPA pauna teng ngai vun! TOPA sia vantung a kumpi tokhum tungah to a, ama ii vantunglalangte a kiim ah a ding ka mu hi.”

²⁰TOPA in, ‘Ramoth ah Ahab pai in a kithalup natu in akua in ama theam tu nu ziam?’ ci in dongh hi. Vantunglalang pawlkhat in son khat nei a, a dangte in thudang khat a son uh hi,

²¹a khakbelin thaa khat sia mai ah hong pai a, TOPA kung zuanin, ‘Keima in ama theam tu khi hi,’ a ci hi.

²²TOPA in ‘Bangbangin maw?’ ci in dongh hi. Tua thaa in, ‘Keima pai in Ahab ii kamsaangte theampo leilot thu ka sonsak tu hi!’ ci in zo kik hi. TOPA in, ‘Va pai ta'n a, va theam ta'n, theam zo tu ni hi,’ ” ci hi.

²³Tuaciang Micaiah in thu khup a, “A piang thu in hisia hi. TOPA in na kamsaang hite nang tungah leilot thu hong sonsak hi. Ahihang ama mama in nang tuasiatna nga tu in a thutan sa hi!” ci hi.

²⁴Tuaciangin kamsaangpa Zedekiah in Micaiah kungah paito in, a maitang beang hi, tuaciang, “Bang hun pan kipan TOPA thaa in kei hong nusia a, nang tungah hong pau ziam?” ci in dongh hi.

²⁵Micaiah in, “Inn nungsang inndoi sung khat ah a buu tu in na pai ciangin mu tu ni hi,” ci in zo kik hi.

²⁶Tua zawkciang Kumpipa Ahab in a uliante khat munah, “Micaiah man in a, khuapi ukpa Amon le Kumpipa tapa Joash tungah paipui vun.

²⁷Amate in ama thong sungah koi hen a, bangma tat ngawlin kong heak kik dong anluum le tui bek taw na vaak hen, ci in son in,” ci in thupia hi.

²⁸“Bangma tat ngawlin nong heak kik le TOPA in kei tungtawn a hong pau ngawl hi tu hi,” ci in Micaiah in ci ngaw hi. Tuaciang ama in, “Ka ci sa teng kuama po in hong ngai tavun!” ci lai hi.

²⁹Tua zawkciang Israel kumpipa Ahab le Judah kumpipa Jehoshaphat te in Gilead ah Ramoth khuapi sim tu in pai uh hi.

³⁰Ahab in Jehoshaphat munah, “Ngal kisim ciangin kei kong kimealseal tu a, nang na hile kumpi puan teng ma nong silh tu hi,” ci hi. Tuabangin Israel kumpipa kidona phual ah kimealseal in pai hi.

³¹Syria kumpipa in a siphu ngalleang uk 32 te munah, Israel kumpipa ngawlpo a dang khat zong sim ngawl tu nu hi ci hi.

³²Tua ahikom amate in Kumpipa Jehoshaphat a mu uh ciangin a vekpi ma in Israel kumpipa sa ahiciang ama sim tu in kiheak uh hi. Ahihang ama hong au keak ciangin

³³ama sia Israel kumpipa ahi ngawl hunlam phawk uh hi, tuaciang amate in sim nawn ngawl uh hi.

³⁴Ahizong Syria ngalkapte khat ii kap thaltang khat in Kumpipa Ahab ii thikpuan kipeena pan kha luilam hi, “Kei liam khi hi! Ngalphual panin kiheam in!” ci in a siphu ngalleang hawlpa oksan hi.

³⁵A kido saan lai tengin Kumpipa Ahab sia a siphu ngalleang sungah kikhuangkho in to a, Syria te maingat hi. A liamna ma pan chi luang in siphu ngalleang nuai tawdap teng tuam a, a nitak sang ciangin ama thi hi.

³⁶Nitum kuan ciangin Israel ngalkapte a lian a no tungah thupiakna hong pai a: “Mi simin a ngam le a khuapi tek ah cia hen!,” ci hi.

³⁷Tuabangin Kumpipa Ahab thi hi. A luang Samaria ah kiciapui a, kiphum hi.

³⁸TOPA ii piang tu hi a ci bangma in, a siphu ngalleang sia Samaria tuili no ah kisil a, tua munah a chi ui in liak a, pumpi kizuak numeite kisil hi.

³⁹Saiha taw a zep a kumpi inn le ama ii a sak khuapite thu a kihel Kumpipa Ahab ii a sep a vawt dangte theampo sia Israel Kumpipate Taanghthu sungah kikhum hi.

⁴⁰Ama ii thi ciangin a tapa Ahazia in a kumpi za laih hi.

⁴¹Israel kumpipa Ahab ii maan zawk a kum lina ciang, Asa ii tapa Jehoshaphat sia Judah kumpipa suak hi,

⁴²ama kum 35 pha a, Jerusalem panin kum 25 sung uk hi. A nu sia Azubah hi a, Shilhi ii tanu ahi hi.

⁴³Ama mai ah a pa Asa bangma in ama in TOPA muna ah a maanin ngamta hi; ahihang doai biakna munte sia kisusia ngawl a, mipite in tua munah sangaw biakpiaknate le ngimnamtui halna in zangh suak uh hi.

⁴⁴Jehoshaphat in Israel kumpipa taw kilemna vawt hi.

⁴⁵Jehoshaphat ii a sep a vawt na dangte theampo, a hanna, a ngal donate theampo Judah Kumpipate ii Taanghthu sungah kikhum hi.

⁴⁶Ama in doai biate ii biaknataute ah a pa Asa hun panin a taanglai numei ahizong, pasal ahizong pumpizuakte heam siat hi.

⁴⁷Edom ngam in kumpi nei ngawl a; Judah kumpipa ii koi a khutdawn khat in uk hi.

⁴⁸Kumpipa Jehoshaphat in Ophir ngam pan khamh pua in a pai natu tuipi teambawte vawt hi; ahihang tua teambawte Eziongeber ah lal a, tuipi sungah hong pai ngeingawl hi.

⁴⁹Tua zawkciang Israel kumpipa Ahaziah in ama mite le Jehoshaphat ii mite tuipi sungah khualhaw khawm tu in paisak hi, ahihang Jehoshaphat in saang ngawl hi.

⁵⁰Jehoshaphat thi a, David Khuapi sung kumpite thaan ah kiphum hi, tuaciang a tapa Jehoram in a kumpi za laih hi.

⁵¹Judah kumpipa Jehoshaphat ii maan zawk kum sawm le kum sali kumin Ahab ii tapa Ahaziah sia Israel kumpi suak hi, tuaciang ama in Samaria panin kum nii sung uk hi.

⁵²Israel te sia mawna sungah a then, a pa Ahab ii seksol ngamtatna bang le, a nu Jezebel le Kumpipa Jeroboam bangma in ama in TOPA tungah maw hi.

⁵³Ama in a mai a, a pa bangma in Baal bia in, a na sepsak hi, ama in Israel ii Pathian TOPA a thin uuksak hi.