Read Siyin Chin 1 Kumpite 3 Bible Online

1 Kumpite 3 - Siyin Chin bible

1 Kumpite 3

¹Solomon in Egypt kumpipa tanu a teenpuina taw ngal vai a kipawlna khat nei hi. Ama in tua nu sia a kumpi inn, Biakinnpi le Jerusalem khua uumna luphungte a sak man dong David khuapi ah a teang tu in ciapui hi.

²TOPA atu in biakinn kisa ngawl lai hi, tua ahikom mipite in sangaw biakpiaknate mun tuatuam ah vawt uh hi.

³Solomon in TOPA it a, a pa David ii hil bangin ngamta hi, ahihang ama in ngannote ngo a, biaknatau tuatuamte ah sangaw biakpiaknate zongh nei hi.

⁴Khatvei, ama sia Gibeon ah sangaw biakpiakna vawt tu in pai hi, banghang ziam cile tua munah biaknatau a minthangbel sia om hi. Ama in hun bosa sungah tua munah meihal biakpiaknate a za simin pia zo hi.

⁵Tua zanin TOPA sia a mang sungah hong kilaak a, “Bang kong piak tu na uukbel ziam?” ci in dongh hi.

⁶Solomon in, “Nangma in ka pa David, na naseampa sia itna lianpi na lak tawntung hi, tuaciang ama pha a, thutakin nang taw a kizopna sungah thumaan hi. Tuaciangin ama panmun ah tu ni in ngam a uk nangma in a kizom paisuakin tapa khat na piakna taw a lian na itna kip na lak hi.

⁷Oh TOPA Pathian, keima sia ka khanmoi mama in ngam ukzia he ngawl ka hihang, nangma in ka pa ii kumpi za nong laihsak zo hi.

⁸Hi sungah nangma atu na tealsa mite tam leihin a kisim zo ngawlte sungah om khi hi.

⁹Tua ahikom na mite thutang khenna taw ka uk thei natu le a pha le a sia ka khentel thei natu in ciimna hong pia ta'n. Tua ahibuale bangbangin hi na mihonpite uk thei tu khi ziam?” ci hi

¹⁰Solomon ii hisia a nget sia TOPA lungkim hi,

¹¹tua ahikom ama munah, “Nangma atu in khansauna ahizong, hau natu ahibuale na ngalte thi natu ahizong, hong ngen ngawlin thutang takin uk thei natu ciimna hong ngenzaw na hikom,

¹²nong nget bangin kong pia tu hi. Ciimna le tel theina sia tu masia le maisang zong kuama peuma ii a tamzaw in a nei ngeingawl tu za kong pia tu hi.

¹³Nong nget ngawlte zongh hong pia si tu khi hi: na khan tawntung hauna le minphatna zongh kumpipa dang khat pawpo sangin tamzaw nga tu ni hi.

¹⁴Tuaciang na pa David bangin kei thu nong ni a ka thukhamte le ka thupiakte na keamcing le khansauna hong pia tu khi hi,” ci hi.

¹⁵Solomon khanglo a, Pathian in a mang sungah a paupui hunlam phawk hi. Tua zawkciang ama Jerusalem ah pai in Thuciamna Thingkuang mai ah dingin TOPA tungah meihal biakpiakna le kipawlkhop biakpiakna vawt hi. Tua zawkciangin a uliante theampo atu anneak poai khat vawt hi.

¹⁶Ni khat ni in pumpi kizuak numei nii hong pai a, Kumpipa Solomon mai ah amate ii thu teng son uh hi.

¹⁷Khat sia in, “Kumpipa awng, hi numei le keima sia inn khat sungah teang khawm khu hi, tuaciang keima in ama om sung ma in inn ah nausen pano khat ka nei hi.

¹⁸Ka nau a sua zawk ni nii ciang ama zongh in nau pano khat nei hi. Koma nii bekma tua inn sungah teang a — kuama dang om ngawl hi.

¹⁹Tua zawk zan khat ciangin ama in a nau tungah kilumliik tha in, a nau dellum hi.

²⁰Ama zan lai in tho a, ka mut lanin ka tapa sia ka pangh pan hong la a, ama ii lupna ah paipui hi; tua zawkciang ama in nausen thisa sia keima ii lupna ah koi hi.

²¹A zing ciang zingsang ka khanlaw ciangin ka nau noai pia tu ka hile a thisa ahi sia ka mu hi. Nausen pha takin ka etcian ciang ka ta ahi ngawl sia ka mu hi,” ci hi.

²²Ahihang nupi dang khat sia in, “Hi ngawl hi! Nau thisa sia nang aa hi a, a nungta sia kei aa hi!” ci hi. Nupi a pau masa sia in, “Hi ngawl hi! Nau a thi sia nang aa hi a, a nungta sia keima aa hi!” ci kik hi. Tuabangin kumpipa mai ah kinial uh hi.

²³Tua zawkciang Kumpipa Solomon in, “Na nii uh ma in, nau a nungta sia kei aa hi ci in a thisa sia ahile ama aa hi ci nu hi,” ci hi.

²⁴Ama in namsau khat lasak a, hong thet ciang,

²⁵ama in, “Nau a nungta sia phalbat in a, nupite a lang veve hawmsak in,” ci hi.

²⁶A nu tatak sia in a tapa a itna taw kidim ahikom kumpipa munah, “Kumpipa awng, nong hesuakna in nau sia that heak in! Ama pia in!” ci hi. Ahihang nupi dang khat sia in, “Koma khat zongh hong pia heak in; khen nii ma hong suasak po ta'n,” ci hi.

²⁷Tuasia ciang Solomon in, “Nau sia that heak in! Nupi a pau masa sia pia in — ama sia a nu tatak hi,” ci hi.

²⁸Israel mipite in Solomon ii thu khenna a zaak uh ciang ama ii tungah zatakna nasia tak nei uh hi, banghang ziam cile tuasia tak ciang ama sia thu kituu te tang takin a khen thei natu Pathian in ciimna pia hi, ci in he uh hi.