Read Siyin Chin 1 Kumpite 4 Bible Online

1 Kumpite 4 - Siyin Chin bible

1 Kumpite 4

¹Solomon sia Israel ngam bup ii kumpipa hi a,

²tuaciang hite sia a uliante ahi uh hi: Thiampi: Zadok ii tapa Azariah

³Zum thuzeakpite: Shisha tapate Elihoreph le Ahijah Thu ciamtee pipa: Ahilud tapa Jehoshaphat

⁴Ngalkaphonpi ukpa: Jehoiada tapa Benaiah Thiampite: Zadok le Abiathar

⁵Ngamkhen uk mangte a ukpipa: Nathan tapa Azariah Kumpi thudokpa: Nathan tapa thiampi Zabud

⁶Kumpi inn sung naseamte a ukpa: Ahishar Zawthawk thu taw na a kiseam sakte a ukpa: Abda ii tapa Adoniram ahi hi.

⁷Solomon in Israel ngam sungah ngamkhen uk mangte sawm le nii koi hi. Kumpipa le a bangkua ii kum khat bup a neak tu sia tua mangte khat simin a uk sung ngamkhen tek panin tha sim a banin piasak hi.

⁸Tua ulian sawm le niite le amate ii ukna ngamkhente sia hi bang ahi hi: Benhur: Ephraim mualtung ngam teng

⁹Bendeker: Makaz, Shaalbim, Beth Shemesh, Elon le Beth Hanan khuapite

¹⁰Benhesed: Arubboth le Socoh khuapite le Hepher ngam theampo

¹¹Solomon tanu Taphath ii pasal Benabinadab: Dor ngamkhen buppi

¹²Ahilud tapa Baana: Taanach le Megiddo khuapite le Jezreel khua thangsang, Beth Shan le Zarethan nai khuate ah a om ngamkhen theampo, Abel Meholah khuapi le Jokmeam khuapi dong

¹³Bengeber: Gilead ngam Ramoth khuapi, tuaciang Manasseh ii suan ahi Jair ii bee le phung neisa Gilead ah khuanote le Bashan ngamsung Argob ngamkhen, a vekpi in khua lian sawmluk hi a, luphung taw a ki uum le kongpite taau taw a kikalh te

¹⁴Iddo tapa Ahinadab: Mahanaim ngamkhen

¹⁵Solomon ii tanu dang khat Basemath ii pasal Ahimaaz: Naphtali ngam

¹⁶Hushai tapa Baana: Asher ngamkhen le Bealoth khua

¹⁷Paruah tapa Jehoshaphat: Issachar ngam

¹⁸Ela tapa Shimei: Benjamin ngam

¹⁹Uri tapa Geber: Amor kumpipa Sihon le Bashan kumpipa Og ii a ukna sa Gilead ngamkhen Hi ngam uk sawm le niite ii tungsia ah ngam bup a uk mang khat om hi.

²⁰Judah le Israel mite sia tuipivaal a senmal za in tam hi; amate in ne in, dawnin, lungdam uh hi.

²¹Solomon ii kumpi ngam sia Euphrates ngun pan Philistia le Egypt te ngamngi dong ngam theampo kihel hi. Amate in shia pia in, ama nuntak sung tawntung a khutnuai ah om uh hi.

²²Solomon ii ni sim a tulmawk ante sia, zungtaang vui neal litre 5,000, an litre 10,000,

²³sangai, saza, sanang le akte bek dom ngawlin, inn ah a kivaak khui sawm, ngam sungah a kitha khui kul le tuu zakhat te ahi uh hi.

²⁴Solomon in Euphrates Ngun ii nitumna sang ngam theampo, Tiphsah khua omna Euphrates pan nitumna sang Gaza khuapi dong uk hi. Tuaciang Euphrates ii nitumna sang kumpipate theampo sia ama khutnuai hi a, ngamngi kizawng ngamte theampo taw kilem hi.

²⁵Ama nuntak lai tengin Judah le Israel ngamsung a teang mite ngammuangin, innkuan simin a sapitkungte le a thei kungte taw nuamsa uh hi.

²⁶Solomon in ngalleang kai siphute atu siphu buk 40,000 le siphu ngalkap 12,000 nei hi.

²⁷Ngamuk mang sawm le niite in Solomon le a kumpi inn sungah an ne theampo atu an sia tha simin a piak tu za tek pia uh hi; amate in a kisamh theampo a tawntungin pia uh hi.

²⁸Ngamkhen uk mang khat simin a kisamh babang taangpi le taangphawte zongh, ngalsimna siphute le naseam nganhingte an tu sik uh hi.

²⁹Pathian in Solomon sia a tuampian ciimna le thuthuk mu theina, a kitee thei ngawl heakna lianpi pia hi.

³⁰Solomon sia Nisuana sang a miciimte ahibuale Egypt miciimte sangin ciim zaw hi.

³¹Ama sia mihing a minpiang a ciimbel ahi hi: Ezrah mi Ethan, tuaciang, Mahol ii tate ahi Heman, Calcol le Darda, sangin ciimzaw a, ama ii minthanna sia kiim le paam ngam theampo dongin kizel hi.

³²Ama in paunak 3,000 le la ngui tul vaal phuak hi.

³³Ama in thingkung le lopate thu thusonin nei a, Lebanon a cedar te pan pang tung a po hyssop te thu dong son thei hi; ama in ngamsate, vacimte, awmtaal nganhingte le ngasate ii thu son hi.

³⁴Leitung bup a kumpite in a ciimna za a, a thuson ngai tu in thataak mite paisak uh hi.