Read Siyin Chin 1 Kumpite 5 Bible Online

1 Kumpite 5 - Siyin Chin bible

1 Kumpite 5

¹Tyre kumpipa Hiram sia David ii lawm khat hi tawntung a, tuaciang Solomon in a pa David ii kumpiza laih zo hi ci in a zaak ciang tongciinte ama kungah paisak hi.

²Solomon in Hiram tungah hi kamte thaak kik hi:

³“Na heak bangma ka pa David in a kiim a om ngam theampo taw ngal kisim tawntung ahi hu in TOPA in a ngalte theampo tungah zawna a piak mateng ama in TOPA a Pathian a biak natu biakinn a sa thei bua hi.

⁴Ahihang tu in TOPA ka Pathian in ka ngamngi dung theampo ah kilemna hong pia zo hi. Ngal nei nawn ngawl khi hi, tuaciang hong kisim tu zongh lau om ngawl hi.

⁵TOPA in ka pa David munah, ‘Nang zawkciang kumpi ka suasak tu na tapa in kei atu biakinn hong saksak tu hi,’ ci in kamciam pia hi. Tuaciang tu in TOPA ka Pathian a kibiak natu tua biakinn khat sak tu ka khensat zo hi.

⁶Tua ahikom kei atu Lebanon ah cedar kungte phuk tu in na mite na paisak in. Keima mite zongh amate taw diangkhawm tu a, tuaciang nangma ii khensat babang thaman pia tu khi hi. Na heak bangma, ka mite in thingphuzia sia na mite thiam bangin thiam ngawl hi,” ci hi.

⁷Solomon ii kam thaakte a saan ciang Hiram lungkim mama a, “Ngamlian tuasia uk tu in David a laih tu kumpi tapa ciim khat a piak hu in TOPA tu ni in pok vun!” ci hi.

⁸Tua zawkciang Hiram in Solomon munah hi bangin kam thaak hi: “Na kam hong thaak nga khi hi, tuaciang nong nget bangin seam tu kithoai zo khi hi. Cedar thing le taakthing teng hong sik tu khi hi.

⁹Ka mite in thingluangte Lebanon panin tuipi dong hong paipui tu a, tuate sawmkhawm in phong ka vawtsak zawkciang nangma tealna tuipi vaal mun khat ah hong taaisuksak tu khi hi. Tua munah ka mite in phel in, tuaciang na mite in vaipuak la tu hi. Nangma in ka mite nguai an nong piaksak tu ka dei hi,” ci hi.

¹⁰Tua ahikom Hiram in Solomon sia cedar luang le taak luang a dei za sik hi,

¹¹tuaciang, Solomon in Hiram sia kum simin a mite a vaak natu zungtaang taan 2,000 le olive thau thiang litre 400,000 sik hi.

¹²TOPA in a kamciam lenin Solomon sia ciimna pia hi. Hiram le Solomon kilaklaw ah kilemna om hi, tuaciang amate ngeal sia khat le khat kihu natu thukimna lai kho khat vawt hi.

¹³Kumpipa Solomon in Israel ngam bup panin zawthawk thu taw a kisawl naseam tu 30,000 khon hi,

¹⁴tuaciang Adoniram sia tuate uk tu in koi hi. Ama in tua mi teng sia pawlkhat ciang mihing 10,000 veu pawl thum in khen a, Lebanon ah thakhat veu diangsakin, tha nii veu ciasak hi.

¹⁵Solomon in mualtung ngam ah suang to tu mihing 80,000, tua suangte a pua tu mihing 70,000 nei a,

¹⁶ama in tuate ii nasep a encik tu in a uk 3300 koi hi.

¹⁷Solomon ii thupiakna taw Biakinnpi tawdap atu a hoi suangtum liante tosak hi.

¹⁸Solomon le Hiram ii naseamte le Byblos khuapi pan pasalte in suangtum le thingte Biakinnpi sak natu in pua pha hi.