Read Siyin Chin 1 Kumpite 6 Bible Online

1 Kumpite 6 - Siyin Chin bible

1 Kumpite 6

¹Israel mite ii Egypt a nusiat zawk kum zali le kum sawmliat zawk, Solomon ii maan zawk kum lina, a tha niina, Ziv tha sungah Solomon in Biakinnpi sak kipan hi.

²A sungsang a sauna metre 27 pha a, metre 9 zai in, metre 13.5 saang hi.

³A tumna inndoi sia metre 4.5 saangin, a zaina metre 9 hi a, biakinnpi cia ma zai hi.

⁴Biakinnpi ii pangte ah a om a hawngvang te sia a sungsang sangin a puasang ciakzaw hi.

⁵Biakinnpi ii panghte le a nungsangah inn pepna inndawl thum khat sia a pang puasang nealin sa a, dawl khat simin metre 2.2 veu saang hi.

⁶A dawl nuainungbel ii a inndoi khat sim metre 2.2 veu zai a, a dawl laizang sia metre 2.7 zai in, a dawl tungnungbel sia metre 3.1 zai hi. Suatte tungah om biakinn pang sia a nuai suat ah omte sangin pazaw ahiciang a inndoite sia pang sungah suatthal phum kul ngawl a, pang tungah kinga thei hi.

⁷Biakinnpi a sak tatak ciang sek, hei, le thik vanhzakte ii ngin a kizaak ngawl tu in, Biakinnpi sak natu suangtumte sia suangkhuk sungah kivawt khol hi.

⁸Innpi pepna ii a dawl nuainungbel tumna sia Biakinnpi ii thang sangah om a, tua mun panin a dawl niina le a thumna pai natu kealleite kithung hi.

⁹Tuabangin Solomon kumpipa in Biakinnpi a sak man hi. Ama in innciingdap sia cedar thingpheakte le innsunhte taw vawt hi.

¹⁰Dawl thum a pha inn pepna sia metre 2.2 saang a, inndoi simin Biakinnpi pang pua nung sia neal in kisa a, cedar innsunhte taw kipee-awsak hi.

¹¹TOPA in Solomon munah,

¹²“Ka thukhamte le ka thupiak te na zui le na pa David tungah sep tu a ka kamciam teng nang atu seam tu khi hi.

¹³Tu a na sak hi Biakinnpi sung, Israel ka mite sungah kong teang tu a, tuaciangin amate ka nusia ngei buatu hi,” ci hi.

¹⁴Tuabangin Solomon in Biakinnpi a sak man hi.

¹⁵Biakinnpi sung sang pangte sia suat tung pan innciingdap dong cedar thing pheakte taw kituam a, tuaciang a suat teng taakthing kizangh hi.

¹⁶A sung sang inndoi khat, Thiangtho belh Mun a kici sia Biakinnpi ii nungsangah kisa hi. Tua sia metre 9 sau in, cedar thingpheak a kilhkhopte taw kidoi a, suat tung panin innciingdap dong phato hi.

¹⁷Thiangthobel Mun ii mai ah a om inndoi sia metre 18 sau hi.

¹⁸Cedar thingpheakte sia uum ngate le paak a kikhuak limte taw kizeam hi; a sungsang bup sia cedar thingpheak taw kituam a, tua hu in pangin a kiciang suangte kimu thei ngawl hi.

¹⁹Biakinnpi nungsangah TOPA ii Thuciamna Thingkuang koi natu in inn sungnung inndoi khat kisa hi.

²⁰Hi inn sungsang inndoi sia metre 9 sau a, metre 9 zai in, metre 9 saang hi, a buppi in khamh ciitak taw kituam hi. Biaknatau sia cedar thingpheakte taw kituam hi.

²¹Biakinnpi sungsang sia khamh taw kituam a, khamh taw ma a kituam a inndoi sungnung tumna sia khaamtan in khamh kual kipeete kithung hi.

²²Biakinnpi sungsang buppi khamh taw kituam a, Thiangthobel Mun aa biaknatau sia zongh khamh taw kituam hi.

²³Meter 4.4 veve a saang Cherub lim nii sia olive thing taw kivawt a, Thiangthobel Mun ah kikoi hi.

²⁴Tuate ngeal a letna le a lim a meal kibang hi. Khatsimin tha nii tek nei hi. Tuaciang a thate khat ciang metre 2.2 sau hi, tua ahikom a kiphal a tha dawn khat pan dawn khat dong metre 4.4 pha hi.

²⁷Tuate ngeal sia Thiangthobel Mun ah a kicial in kikoi in, a tha kiphalte dawn veve a inndoi laizang santak ah kiphasak a, tuaciang a tha dangte nii in pangte pha uh hi.

²⁸Cherub te a nii in khamh taw kituam hi.

²⁹A inndoipi pangte le a sungnung inndoi pangte sia a khetkuak cherub te ii limte, palm thingkung limte le paak limte taw kizeam siat hi.

³⁰A suat ngawngawn khamh taw kituam hi.

³¹Olive thing taw a kivawt bangkua a kipee nii te sia Thiangthobel Mun tumna ah kikoi hi; a kongbiang tung santak sia a tung zumin a kawn khat hi.

³²Kongkhate sia cherub lim te, palm thingkung limte le paak limte taw kizeam a, khamh taw kituam hi.

³³Inndoipi sung tumna kongkhamung sia siik li nei in olive thing taw kivawt hi.

³⁴Kongkha kithep thei nii sia taakthing taw kivawt a,

³⁵cherub limte, palm thingkung lim le paak lim te taw kizeam hi, tuate sia a kibang kim in khamh taw kituam hi.

³⁶Zum sungnung sia Biakinnpi ii mai ah kisa a, pangte taw ki uum in, tuate atu in suang ngual thuap thum simin cedar thingpim ngual khat veu kician nelh hi.

³⁷Biakinnpi ii tawdap sia Solomon kumpi maan zawk a kum lina a tha niina Ziv tha sungah kiciang hi.

³⁸Solomon ii maan zawk a kum sawm le kum khat a tha liatna Bul tha sung ah, a kingeal bang lianin kiman thiang hi. Solomon atu tuasia a sak na in kum sali hai hi.