Read Siyin Chin 1 Kumpite 7 Bible Online

1 Kumpite 7 - Siyin Chin bible

1 Kumpite 7

¹Solomon in ama atu zong kumpi inn khat sa si a, kum sawm le kum thum hai hi.

²Lebanon Thingtaam Inndoipi sia metre 44 sau a, metre 22 zai in, metre 13.5 saang hi. Cedar khuam sawm le nga veu ngual thum om a, tuate khat sim tungah a kinga zawlliang kithung hi. Innciingdap sia cedar hi a, vanh kholna inndoite tung liap hi, tuate sia khuamte taw kinang hi.

⁴A pangte ngeal ah khelki ngual thum veu om hi.

⁵Tua kongbiangte le a khelkite sia a pangh kikim king li nei veu hi a, tuaciang pang khat sim tungah khelki ngual thumte in a langkhat ngualte maingat hi.

⁶Khuamngual te ii Inndoipi sia metre 22 sau a, metre 13.5 zai hi. A tung siin nei a, khuamte in nang hi.

⁷Kumpi Tokhum omna Inndoi sia Thukhenna Inndoi zongh kici a, Solomon ii a thukhenna mun ahi hi, tuasia suat tung panin tuukpite dong cedar thingpheakte taw kivawt hi.

⁸Solomon teenna inn sia Thukhenna Inndoi ii nungsangah inn dangte sak bangma in kisa hi. A zi, Egypt kumpipa ii tanu atu zongh tua taw kibangin inn saksak hi.

⁹Hi innte theampo le a suum lianpi sia a tawdap pan kipan bitha dong suangphate taw kivawt hi. A suangte sia a suangkhuk ah a pha tu cia kivawt khol a, a sungsang le a puasang panghte sia thingatnam taw kingiamh hi.

¹⁰A tawdap tu sia suangtum liante taw suangkhuk ah kivawt a, pawlkhat sia metre 3:5, pawlkhat sia metre 4 sau hi.

¹¹Tuate ii tungah a phabek tu a at sa suang dangte le cedar thingpim te taw kisa hi.

¹²Kumpi inn suum, Biakinnpi suum sungnung le Biakinnpi tumna inndoite ii pangte sia suang tansa ngual thum simin cedar thingpim ngual khat veu thekin kisa hi.

¹³Solomon kumpipa in taau taw nasep a thiam Tyre khuapi ah a teang, khutthiamna a nei Huram a kici pasal khat sam hi.

¹⁴A thi zo a pa sia Tyre pan hi a, ama zongh taau taw nasep a thiam khat ma hi; a nu sia Naphtali nam pan ahi hi. Huram sia a pil, khutthiam nasep a seam ngeisa ahi hi. Ama in taau taw nasepna theampo a uk tu in Solomon kumpipa ii sapna a saang hi.

¹⁵Huram in taau khuampi nii vawt hi, khat simin metre 8 saang a, a kiimkot sia metre 5.3 pha hi, tuate sia Biakinnpi tumna munah koi hi.

¹⁶Ama in tua khuampite ii tungkhu tu in taau metre 2.2 veve a sau zongh vawt si hi.

¹⁷Khuampite ii a dawn veve sia thikkhau kipheakte ii lim la in

¹⁸taau taw a kivawt talee nga lim ngual nii veve taw zongh zeam hi.

¹⁹A tung khu sia unok paak bangin kivawt in, metre 1.8 sau a,

²⁰tuate sia a kawnin a kivawt a tungkhu thikkhau pheak bang ahi sia ii tungah kikoi hi. A tungkhu khat sim ii kiim ah talee nga ngual nii in a kingual pum 200 om hi.

²¹Huram in hi taau khuampite nii sia Biakinnpi tumna mai ah koi hi: a thangsang a sia Jachin ci a, a saksang a sia Boaz kici hi.

²²Unok paak taw kibang taau tungkhute sia tua khuampite dawn ah kinga hi. Tuabangin khuampite taw kisai nasepna kiman hi.

²³Huram in tuikuang khat sia a beamin vawt hi, metre 2.2 thuk a, a khuangmai sia metre 4.4 ahi hi, a kiimkot sia metre 13.2 ahi hi.

²⁴Tuikuang ii a ngong puasang kiil kiim theampo taau uum nga lim ngual nii om a tuikuang taw sakhat suak in taau kisung hi.

²⁵Tuikuang sia a puasang a ngaa, khuital lim sawm le nii te ii nungzaang ah tosak hi, thum veu khen in mun khat sang tek ngaa sak hi.

²⁶Tuikuang ii pangh sia millimetre 75 saa hi. A ngong sia hai ngong taw kibang a, a pua sangah paal in, unok paakpalh bang ahi hi. Tua tuikuang sungah litre 40,000 bang taa hi.

²⁷Huram in taau taw leang sawm vawt si hi; khat simin metre 1.8 sau a, metre 1.8 zai in, metre 1.3 saang hi.

²⁸Tuate sia a paona nei kiing li kikim taau a pheakte taw kivawt a,

²⁹tawpi lim, khuital lim le cherub limte tua taaupheakte tungah kingelh hi; a paona mungte tungah a om tawpi le khuital limte ii tung le, a kivial limte om hi.

³⁰Leang khat simin taau mui li veu, taau zawlte tungah kibul hi. A leang ii king li simin kuangpui nanna, taau taw a kivawt khuam note om a; tuate sia a kivial limte taw kizeam hi.

³¹Tua tungah kuangpui ngak natu valh kawn khat om hi. Tuasia in leang tungah centimetre 45 dok to a, tuasia sungah centimetre 18 tum suk hi. Tuasia ii kiim ah thing ngelhte kivawt hi.

³²Leangmuite sia centimetre 66 saang hi; Tuate sia taaupheakte nuai ah om a, a leang zawlte sia a leangte taw sakhat in kivawt hi.

³³Leangmuite sia siphu ngalleangmuite taw kibang hi; leangzawlte, a mui kiil te le a mui letna ciangte le a mui kamhnate sia taau vive ahi hi.

³⁴Leang khat ii a king sim ah a nuai pan a nannate zongh leang taw sa khat ma ahi hi.

³⁵Centimetre 22 a beak taau kual khat veu leang khat sim tungah om hi; tua ii nannate le taaupheakte sia leang taw sa khat ahi hi.

³⁶A nannate le taaupheakte sia cherubim, tawpite le palm thingkung limte taw a awng napo ah kizeamin, lim a kivialte taw a kiimkot theampo ah kizeam hi.

³⁷Tua hi a, hi bangin leangte kivawt hi; tuate khat le khat kibang hi, a phakcia le a pianzia kibang kim hi.

³⁸Huram in leang khat atu khat veu kuangpui sawm vawt si hi. Kuangpuite khat sim ii a khuangmai metre 1.8 veu zai a, tuaciang kuang simin litre 800 taa hi.

³⁹Ama in leang nga sia Biakinnpi thang sangah koi a, a om lai nga teng saksang ah koi hi; tuikuang sia nisuana thang sang king ah koi hi.

⁴⁰Huram in bealte, leiluana kawkeaute le kuangte zongh vawt hi. Ama in Solomon kumpipa atu in TOPA Biakinnpi atu a nasep theampo khuangkhim zo hi. Hi sia ama ii vawt teng ahi hi; Khuampi niite Khuampi dawn ah kuangno taw a kibang khuam tungkhu nii, Khuam tungkhu khat sim tungah a kipheak thikkhau Khuam tungkhu kiimkot ah 100 veu ngual nii in a kisuai, talee nga lim 400 Leang sawmte, Kuangpui sawmte Tuikuang Tuikuang ngakna khuital sawm le nii Bealte, kawkeaute le kuangte Hi Biakinnpi vanh zak tu in Huram ii Solomon kumpipa atu a vawtte sia a kinawt sa taau taw kivawt hi.

⁴¹

⁴²

⁴³

⁴⁴

⁴⁵

⁴⁶Kumpipa in tuate theampo sia Jordan Kuam sung Sukkoth le Zarethan kilaklaw ah a om thikseakna munah vawtsak hi.

⁴⁷Solomon in hi taau vanh te khaitee sak ngawl hi, banghang ziam ci le tam lei ahikom a ngitna kituat ngeingawl hi.

⁴⁸Solomon in Biakinnpi atu khamh vanhzakte zongh vawtsak hi: biaknatau, Pathian tung anluum piakna sabuai,

⁴⁹Thiangthobel Mun ii mai ah a ding meivak khuam sawm, a saksang ah nga, a thang sangah nga a koite; paakte, meiinnte le taiteete;

⁵⁰haite, taitee, kuangte, meikam toaina bealte; Thiangthobel Mun kongkhate le Biakinnpi puasang kongkhate ii pattaate ahi hi. Hi na zakte theampo sia khamh taw kivawt hi.

⁵¹Kumpipa Solomon in Biakinnpi tungtaang ah nasep tu teng a man ciangin a pa David ii TOPA tungah a aap tuamsa na teng — ngunn, khamh le a dang nate sia biakinn vanh kholna inndoite sungah koi hi.