Read Siyin Chin 1 Kumpite 8 Bible Online

1 Kumpite 8 - Siyin Chin bible

1 Kumpite 8

¹Tua zawkciang Kumpipa Solomon in TOPA ii Thuciamna Thingkuang sia David ii khuapi Zion panin Biakinnpi ah a tua tu in Israel ngamsung namte le, bee le phungte ii lampui theampo Jerusalem ama kungah hong pai tu in sam hi.

²Amate teng in Ethanim tha, a tha sali tha Buk Poai hun sungin kikhawmtua uh hi.

³A lampuite theampo a kikaikhop zawkciang, thiampite in Thuciamna Thingkuang laamto uh a,

⁴tuaciang Biakinnpi ah hong pua uh hi. Levi te le thiampite in TOPA ii ompuina Puanbuk le tua taw kisai vanh teng zongh Biakinnpi ah khiin uh hi.

⁵Kumpipa Solomon le Israel mite theampo Thuciamna Thingkuang ii mai ah hong kikhawmtua in, khui le tuu tam mama sangaw biakpiakna in nei uh hi — tam lei ahikom kisim zo ngawl hi.

⁶Tua zawkciang thiampite in Thuciamna Thingkuang sia Biakinnpi sungah hong tum pui in, cherub te ii nuai Thiangthobel Mun sungah koi uh hi.

⁷A thakhui kizalhte in thingkuang le a puakna molte siin uh hi.

⁸Thiangthobel Mun ii mai san tak ah a dingte bek in tua molte ii mongte mu thei a, koima dang pan kimu thei ngawl hi. (Molpumte sia tu ni in tua munah om lai hi.)

⁹Thuciamna Thingkuang sungah, Egypt ngam panin Israel mite a pusua lai in Sinai mual tungah TOPA in amate taw thuciamna a vawt ciangin Moses ii koi tua suangpheak nii te simngawl, nadang bangma om ngawl hi.

¹⁰Thiampite in Biakinnpi a nusiat laitak thakhat thu in tuasia meeikaai taw kidim in,

¹¹TOPA ii ompuina hu in khuavak taang velvol sia taw kidim a, amate sia a vaipuakte seam tu in pai kik thei nawn ngawl hi.

¹²Tua zawkciang Solomon in thungen hi: “Nang, TOPA in van ah ni na koi hi, tua hi napi nang in meeikaai sung le khuazing sungah om tu na teal zo hi.

¹³Tu in a tuanngen biakinn khat nang atu kong saksak zo hi, a tawntungin na ten natu mun ahi hi.”

¹⁴Mipite tua munah a din uh ciangin Kumpipa Solomon in amate maingat tu in kihei a, tuaciang ama in mipite atu in Pathian thupha ngetsak hi.

¹⁵Ama in, “Israel ii TOPA Pathian pok vun! Ama in ka pa David tungah hi bangin a ci, a kamciam kholet a,

¹⁶‘Egypt ngam panin ka mite ka paipui hun pan kipan, Israel ngam bup sungah kei hong kibiak natu in biakinnpi sak natu khuapi khat zongh ka teal bua hi. Ahihang, ka mite uk tu in David nang kong teal hi,’ ” a ci hi.

¹⁷Tuaciang Solomon in a thuson zom a, “Ka pa David in Israel ii TOPA Pathian a biak natu biakinn khat sak tu ngeal hi,

¹⁸ahihang TOPA in ama munah, ‘Kei atu biakinn na sak nop sia maan ni hi,

¹⁹ahihang nang in na sa ngei buatu hi. Na tapa, nangma ii tapa tilteal in ka biakinn sa tu hi,’ a ci hi.

²⁰“Tu in TOPA in a kamciam kholet hi. Israel kumpi suak in ka pa za ka laih zo hi, tuaciang Israel ii TOPA Pathian biak natu in Biakinnpi ka sa zo hi.

²¹Egypt ngam panin ih taanghpupite a pusua pui lai in TOPA in amate taw thuciamna suangpheak nii a om Thuciamna Thingkuang koi natu mun khat zongh Biakinnpi sungah ka vawtsak hi,” ci hi.

²²Tuaciang mipite omna biaknatau mai ah Solomon ding a, a khut laamin,

²³thu ngen hi, “Israel ii TOPA Pathian awng, a tungsang vantung ah ahizong, a nuaisang lei tungah ahizong nang taw a kibang pathian om ngawl hi! Na mite taw na thuciamna na kholet a, amate in thin theampo taw na thu hong ni in a nuntak ciangin na itna na lak hi.

²⁴Ka pa David tungah na kamciam sia na kholet hi; tu ni in na kammalte theampo taangtung zo hi.

²⁵Tuaciang tu in Israel ii TOPA Pathian awng, ka pa tungah kamciam na vawt dang khat ahi, ama ii na thu hong nit bangin amate in kidopna taw thuni pole, ama suan le paalte sung pan khat in Israel kumpi in maang tawntung tu hi, na ci sia zongh nong taangtunsak natu thu kong ngen hi.

²⁶Tua ahikom tu in Israel ii Pathian awng, na naseampa ka pa David tungah kamciam na piakte theampo zongh taangtungsak in.

²⁷“Ahihang, Oh Pathian awng, nang leitung ah teang thei takpi tu ni ziam? Vantung theampo zongh nang hong huam tu in lian tham ngawl hi, tua ahikom hi Biakinnpi kei ii sak sia lian khom thong tu ziam?

²⁸TOPA ka Pathian awng, kei sia na naseampa khi hi. Ka thungetna hong za ta'n a, tu ni a kong ngetnate hong pia ta'n.

²⁹Hi Biakinnpi, nang hong kibiak natu in na tealsa hi mun sia a sun a zanin na cing in. Hi mun maingat in thu kong nget ciangin hong za ta'n.

³⁰Kei ii thungetna le na mite ii hi mun maingat in thu hong nget ciang hong za ta'n. Vantung na inn sung panin hong za ta'n a, kote hong maisak ta'n.

³¹“Mihing khat sia midang khat tungah khial hi ci in a kimawsiat ciangin, a khial ngawlna thu a kilangh natu in kiciamna nei tu in hi Biakinnpi sung na biaknatau ah a kipaipui ciang,

³²Oh TOPA, vantung pan na ngai in a, na naseamte tungah thu hong khen ta'n. A maw sia tungah a kiphu bangin daan na pia in, a maw ngawl sia na tha in.

³³“Na Israel mite sia nangma tungah hong maw hu in a ngalte in zo hi, tuaciang amate in nang sang hong heak a, kiniamkhiakin maw maisak natu in thu hong ngen le,

³⁴vantung panin na ngai in. Na mite ii mawna khialnate maisak in a, tuaciang a taanghpupite tungah na piak ngam le lei ah na ciapui kik in.

³⁵Na mite in nang tungah hong maw zo ahi hu in nguatuite na hansak ciang le, amate kisiik in hi Biakinnpi sang nga in kiniamkhiakin thu hong nget ciang,

³⁶vantung pan na ngai in. Kumpipa le Israel mite ii mawna khialna te, na maisak in. A maan bang a ngamtat natu amate na hil in. Tuaciang, Oh TOPA, na mite ii a tawntung a neisa tu in na piak hi na leitang tungah nguatui na puak in.

³⁷“Ngam sungah kialpi, ahibuale natsia tungin, ahibuale ankungte vuisa, ahibuale khaumaw hon in a lalsak ciang, tua ahibuale na mite a ngalte in a sim ciang, tua ahibualaile amate sungah natna satna a om ciang,

³⁸amate ii thungetna na ngai in. Israel na mite khat pawpo in thin heena tatak lakin, hi Biakinnpi sangah a khut uh zan in thu hong ngen le,

³⁹ama te thungetna za in. Vantung na inn sung panin amate ngetna na ngai in a, a mawna maisak in, na hu in. Nangma bekma in mihing thinsung ngaisutna te he ni hi. Mi simin ama taw a kiphu bangin a tungah na vawt in,

⁴⁰tua hile koma a taanghpupite tungah na piak ngam le lei tungah amate ii teen sung tawntung na thu hong ni tu hi.

⁴¹“A khuala a om ngamdang mi khat in na minthanna le, na mite atu na lianpi na sepna te za in, hi Biakinnpi ah nangma bia tu hong pai in thu hong ngen le,

⁴²

⁴³a thungetna na ngai in. Vantung na teenna pan za in a, vawtsak tu in hong nget teng vawtsak in, tua hile leitung mite theampo in Israel na mite ii hong heak bangma hong he thei in, na thu hong ni tu uh hi. Tuasia ciang amate in hi Biakinnpi ka sak sia nangma biak natu mun ahi hunlam he tu uh hi.

⁴⁴“A ngalte uh taw kido tu in kuan a, na sawl ciang na mite in nang tungah thu hong ngen a, koisung po ah a om zong na tealsa hi khuapi le nang atu ka sak Biakinnpi te maingat in thu hong nget ciangin

⁴⁵amate ii thungetna na ngai in. Vantung panin na za in a, zawna na pia in.

⁴⁶“Na mite in khialna vawtin nang hong langpan ciang — a maw ngawl khat zongh om ngawl ahiciang — na thin uukin a, a ngalte in zosak in ngamdang ah thongtaak tu in amate a paipui ciang bangza po in tua ngam sia a khuala ta zong,

⁴⁷na mite ii thungetna ngai in. Tua ngam pan amate kisik kikin na tungah a seksolna le a mawna pualaak in thu hong ngen le, amate thungetna na ngai in, Oh TOPA awng.

⁴⁸Tua ngam ah amate in thin tak le thu maan takin kisiik a, ka taanghpupite tungah na piak sa, hi ngam, na tealsa hi khuapi le nang atu ka sak hi Biakinnpi sia maingat in thu hong ngen le,

⁴⁹tuasia ciang amate ii thungetna na ngai in. Vantung na inn sung panin tuate za in a, amate tungah hesuakna na nei in.

⁵⁰Amate ii mawna khialna le hong le do na sia maisak in a, tuaciang a ngalte sia amate tungah dikna na laksak in.

⁵¹Amate sia na mihingte hi a, tua meiphual lingh na Egypt pan na pusuasakte ahi hi.

⁵²“Vaanglianpipa TOPA, na Israel mite le a kumpipa tungah maipha na pia tawntung in a, amate in hu ngen in hong sap simin a thungetna uh na za in.

⁵³Koma taanghpupite Egypt pan na pusuapui lai in na naseampa Moses tungah na sonsa bangma in mihing theampo sung pan amate sia nangma mi tu in na teal hi,” ci hi.

⁵⁴Solomon in TOPA tungah a thunget a man zawkciang khut laamin khupdin a, a om na biaknatau mai pan dingto hi.

⁵⁵Ama in tua munah a kikhawm mite theampo tungah Pathian ii thuphate a tun natu in awnging tak taw ngen hi. Ama in,

⁵⁶Ama mite munah ngal kilemna a piak tu in, a kamciam bangma ngal kilemna hong pia “TOPA pok vun. A naseampa Moses tungtawnin ngo takin a piak kamciam theampo len hi.

⁵⁷TOPA ih Pathian in ih taanghpupite taw a omkhop bangin ei taw hong omkhawm tahen; hong nusia ngei heak hen a, hong taisan heak hen;

⁵⁸ama dei bangin ih nuntak tawntung thei natu le ih taanghpupite tungah a piak thukhamte le thupiakna te theampo ih kepcing thei natu, ama ii thu a ni thei tu in hong vawt tahen.

⁵⁹TOPA ih Pathian in ama tungah hi thu ngetna le thuumna ka vawtte a tawntungin hong tepteesak tahen. Israel mite le a kumpipa tungah ni simin a kitaangsap uh bangin ama in hong hesuak tawntung tahen.

⁶⁰Tuabangin leitung minamte theampo in TOPA ama bek Pathian hi a — a dang Pathian om ngawl hi ci in he tu uh hi.

⁶¹No, ama mite in TOPA ih Pathian tungah thumaan tawntung vun a, a thukhamte le a thupiakte tu ni a na zui uh bangin zui thei tawntung tavun.”

⁶²Tua zawkciang Kumpipa Solomon le mite theampo in TOPA tungah sangaw biakpiakna vawt uh hi.

⁶³Ama in khui 22,000 le tuu 120,000 sia kipawlkhop biakpiakna in pia hi. Tuabangin kumpipa le a mite theampo in Biakinnpi aaptuam uh hi.

⁶⁴Tua ni ma in ama in Biakinnpi mai leitual laizang sia, thiangthosak hi, tua munah ama in pum bup a kihal sangaw biakpiaknate, antang biakpiaknate le nganno ii thau te taw kipawlkhop biakpiaknate vawt hi. Ama ii hi bangin a vawtna sia hi biakpiakna theampo atu, taau biaknatau teng sia biakpiak natu in no leih ahihang hi.

⁶⁵Tua mun Biakinnpi ah Solomon le mite theampo in a Buk Poai sia ni sali sung vawt uh hi. Tua munah saksang Hamath Mualciangh pek pan le thangsang Egypt ngamngi pan hong pai mihon tam mama om hi.

⁶⁶A ni liat ni ciang Solomon in mipite ciasak hi. Amate theampo in ama pok a, lungdam in cia uh hi, banghang ziam cile TOPA in a naseampa David le a mi Israel te thuphate a piak hu ahi hi.