Read Siyin Chin 1 Kumpite 9 Bible Online

1 Kumpite 9 - Siyin Chin bible

1 Kumpite 9

¹Solomon kumpipa in Biakinnpi, kumpi inn le a dang a sak nop teng a sak zawkciang,

²Gibeon ah TOPA a kilaak bangin ama tungah kilaak kik hi.

³TOPA in ama munah, “Na thungetna hong za zo khi hi. A tawntungin kei hong kibiak natu in na sak, hi Biakinnpi koituam khi hi. Ka encik tu a ka keamcing tawntung tu hi.

⁴Thumaanna le phinciingna taw na pa David ii sep bangin keima ii na seamin, ka thukhamte na zui a, kong thupiak theampo na vawt le,

⁵na pa David tungah kamciam ka piak, Israel sia ama ii suan le paalte in uk tawntung tu hi, ka ci sia ka kholet tu hi.

⁶Ahihang nangma ahibuale na suan na paalte in kei nong zui nawn bua uh a, ka thukhamte le kong thupiakte zui ngawlin pathian dangte na bia uh le,

⁷tuasia ciang ka Israel mite sia ka piaksa ngam panin ka heam tu hi. Kei hong kibiak natu in ka koituam sa, hi Biakinnpi zongh ka nusia tu hi. Mun theampo pan mihingte in Israel sia nunau tu a, simmaw tu hi.

⁸Hi Biakinnpi sia zaanciim in kisengneng tu a, a kaantan in a pai theampo liinglawng tu uh a lamdang sa in, ‘Banghangin TOPA in hi ngam le hi Biakinnpi tungah hi bangin ngamta ziam?’ ci in kidongh tu uh hi.

⁹Mihingte in ‘Banghang ziam cile Egypt ngam panin a taanghpupite a pusua, a Pathian a nusiat uh hu hi. Pathian dangte tungah kinga a, a biak hu in TOPA in hi tuasiatna amate tungah tungsak hi,’ ci in kizo tu hi,” ci hi.

¹⁰Biakinnpi le ama kumpi innte a sak hun kum kul ngei hi.

¹¹Tyre kumpipa Hiram in hi nasepna atu a kisamh cedar thing le taakthing teng ahizong, khamh theampo ahizong sik siat hi. Tuasia a kiman zawkciang Solomon kumpipa in Hiram sia Galilee ngamkhen sungah khua kul pia hi.

¹²Hiram pai in a mu ciangin tua khuate dei ngawl hi.

¹³Tua ahikom ama in Solomon munah, “Tua ahile, suapui awng, kei nong piak khuate hi teng ahi ziam!” ci hi. Hi sia hu in tua mun le ngam teng Cabul kici lai hi. [1]

¹⁴Hiram in Solomon khamh kilogramme tul li vaal pia hi.

¹⁵Kumpipa Solomon in Biakinnpi sak natu, kumpi inn sak natu le khuapi ii nisuana sang teng lei vuk natu le khuapi luphung cian natu in, zawthawk thu taw a kisawl naseamte zangh hi. Amate in khuapite ahi Hazor, Megiddo, le Gezer khuate saat natu in tuate ma zangh hi.

¹⁶(Egypt kumpipa in Gezer simin la zo a, a teang khua mite thatin, a khuapi haltum hi. Tua zawkciang tua khuapi sia a tanu le Solomon hong kiteen uh ciang mo thaakna letsong in pia hi.

¹⁷Tuaciang Solomon in sa kik hi.) Zawthawk thu taw a kisawl naseamte ma zangh a, Solomon in Beth Horon khua Nuainung zongh saat kik hi.

¹⁸Baalath, Judah duisung ah a om Tamar,

¹⁹a anneak a vanh zakte kholna khuapite, a siphute le a siphu ngalleangte kholna khuapite, inn a sak nopna dang theampo ah Jerusalem, Lebanon le a uk sung mun dangte sung zongh ah tua naseamte zangh hi.

²⁰Solomon in zawthawk thu taw a kisawl nasep seam tu in Israel mite ii a ngam a suan lai in a thalup mong Canaan mite ii suan le paalte zangh uh hi. Hite sungah Amor te, Hit te, Periz te, Hiv te le Jebus te kihel in, tuate ii suan le paalte sia tu ni dong sila ahi uh hi.

²²Solomon in Israel te sila in a khoai bua hi; amate in a ngalkap no, ngalkap bu, ngalkap uk, siphu ngalleang uk le siphu ngalkap veu seamsak uh hi.

²³Solomon ii inn sak natu nasep tuatuamte sungah ulian 550 in zawthawk thu taw a kisawl naseamte uk uh hi.

²⁴Solomon in a zi, Egypt kumpipa tanu atu a saksak kumpi inn ah David khuapi pan a khiin zawkciang, khuapi ii nisuana sang teng lei vuksak hi.

²⁵Kum khat sung thumvei veu Solomon in meihal biakpiakna le kipawlkhop biakpiaknate TOPA atu a sak sa biaknatau tungah pia hi. Ama in TOPA atu ngimnamtuite zongh hal hi. Tuabangin ama in Biakinnpi sakna man hi.

²⁶Solomon in Edom ngam Aqaba Tuidok vaal ah a om Elath taw kinai, Eziongeber ah teambaw honkhat vawt hi.

²⁷Kumpipa Hiram in a teambaw naseam thiam sa pawlkhat Solomon mite taw seam khawm tu in puak hi.

²⁸Amate in Ophir ngam ah teambaw taw pai in khamh kilogramme 14,000 bang Solomon kungah cia pui uh hi.