Read Siyin Chin 2 Kumpite 10 Bible Online

2 Kumpite 10 - Siyin Chin bible

2 Kumpite 10

¹Samaria khuapi ah Ahab ii suan le paalte mihing 70 om uh hi. Jehu in khuapi ukte, khuapi sungah lampuite le Ahab ii suan le paalte a keamte munah lai at a thaak hi. A laithak sungah:

²“No sia kumpipa ii suan le paalte a keam te nu hi, tuaciang na uuk po na zak tu uh siphu ngalleang te, siphute, ngalhiamte le kulh taw a ki uum khuapite nei nu hi. Tua ahikom hi laithak na nga uh po ciang

³kumpipa ii suan le paal sung pan a kilawmbel khat teal in, kumpipa suaksak vun a, tuaciang ama hung tu in ngal do vun,” ci in at hi.

⁴Samaria ukpite sia lau mama uh hi. “Kumpipa Joram le kumpipa Ahaziah ii zaw ngawl Jehu sia ei in bangbangin nalh zo tu hi ziam?” ci uh hi.

⁵Tua ahikom kumpi inn ah vaipuak neite, khuapi tungah vaipuak neite kikopin, ngammite lampuite le kumpipa bangkua a keamte in hi kamthaak sia Jehu tungah puak uh hi; “Ko sia na naseamte khu hi, nangma ii ci po a seam tu in kinging khu hi. Ahihang kuama kumpipa in koi ngawl tu khu hi; phabel na sak bangin hong seam ta'n,” ci uh hi.

⁶Jehu in laithak dang khat puak hi: “Kei sangah nong pang uh a, tuaciang ka thupiak babang zui tu na hi uh le, zing ciang tu hunin Kumpipa Ahab ii suan le paal teng ii lutang hong puak tavun,” ci hi. Kumpipa Ahab ii suan le paal 70 teng sia Samaria ngammi lampuite ii kep le ou ahi hi.

⁷Jehu laithak a kinga ciangin, Samaria lampuite in Ahab ii suan le paal 70 teng thatlum in a lutang uh bawm sungah heangin Jehu omna Jezreel ah puak uh hi.

⁸Ahab ii suan le paalte ii lutang teng hong kipaipui zo hi ci in Jehu tungah a kison ciang ama in tua lutangte khuapi kongpi hui ah kholh nii in sengin a zingsang kik dong tua munah a kinusiat tu in thupia hi.

⁹A zingsang ciangin ama khuapi kongpi ah pai in, tua munah a om mite munah, “Kumpipa Joram suam tu a sawm sia keima khi hi; no sia tua tungtaang ah bangma vaipuak nei ngawl nu hi. Ahihang hite sia akua in thatlum ziam?

¹⁰Hi sia in Ahab ii suan le paalte huvau TOPA ii kamsaang Elijah ii tungtawnin a pau teng taangtung hi,” ci in lak hi.

¹¹Tua zawkciang Jehu in Ahab ii bee le phung dangte, Jezreel a om theampo le a uliante, a ngualtamhte, a thiampite, khat zongh a nungta in kikhoaikhe ngawl hi.

¹²Jehu in Samaria khua ah pai tu in Jezreel khua nusia hi. Lampi tung mun khat, “Tuucingte Ngiaphual” a kicina munah,

¹³A thisa Judah kumpipa Ahaziah ii mealheakte pawlkhat taw kisi in amate tungah, “A kuate nu ziam?” ci in dongh hi. Amate in, “Ahaziah ii mealheakte khu hi! Kumpinu Jezebel tate le kumpi innkuanpui a taanglaite zatakna pia tu in Jezreel ah pai tu khu hi,” ci in zo uh hi.

¹⁴Jehu in, “Hing mat siat vun!” ci in a ngalkapte thupia hi. A ngalkapte in amate manin Jehu in dum khat ii hui ah that siat hi. A vekpi in mihing 42 pha a, khat zongh khoaikhe ngawl hi.

¹⁵Jehu vaiding kik a, lampi ah Rechab ii tapa Jonadab taw kisi uh hi. Jehu in paupui a, “Nang le kei ih khua ngaisutna kibang hi, Kei nong panpui tu ziam?” ci in dongh hi. Jonadab in, “Hong panpui tu khi hi,” ci in zo hi. “Na khut hong thaak ta'n,” Jehu in ci hi. Amate kilen uh hi, tuaciang Jehu in ama sia siphu ngalleang tungah a kaato zawk natu kaito in,

¹⁶“Keima taw paikhawm tawng, TOPA tungah bangza in kipia khi ziam nangma ma in hong mu ta'n,” ci in son kawm hi. Tuaciang amate Samaria ah leang taw paikhawm uh hi.

¹⁷Tua mun a thet ciang Jehu in Ahab ii mealheak theampo khat zongh khoaikhe ngawlin thatlum siat hi. Hi sia in TOPA ii Elijah munah piang tu hi ci in a sonsa teng ahi hi.

¹⁸Jehu in Samaria ngammite kaikhawm in hi bang ci hi, “Kumpipa Ahab in Baal pathian sia tawmno bia hi, ahihang keima in tua sangin a nasia zaw in ka bia tu hi.

¹⁹Baal ii kamsaangte theampo le ama a biate theampo, ama thiampite theampo a vekpi hong sam siat tavun. Kuama kamzong thei ngawl tu hi; Baal tungah sangaw biakpiakna nasia takin vawt tu khi hi, tuaciang hi sungah hong kihel ngawl peuma kithisak tu hi,” ci hi. (Hi sia in Jehu ii a theamna hi a, Baal a biate theampo a thalup nopna hi.)

²⁰Tua zawkciang Jehu in thupia a, “Baal zatak piak natu biakna ni khat thangsak vun,” ci hi. Thu thansakna kivawt a,

²¹tuaciang Jehu in Israel ngam bup ah kam zasak hi. Baal a bia theampo hong pai uh hi, hong pai ngawl khat zongh om ngawl hi. Amate theampo Baal biakinn sungah tum uh a, biakinn monglang pan monglang dong dim uh hi.

²²Tuaciang Jehu in puantual thiangtho a keam thiampipa munah puantualte pusua in biakpiakna a vawtte pia in sawl hi.

²³Tua zawkciang Jehu ama mama zongh biakinn sungah, Rechab ii tapa Jonadab taw tum a, tuaciang tuasung ah om mihingte munah, “Baal biate bek a sungah om tu a, tuaciang TOPA a biate kuama a kihel ngawl natu in a pha takin en vun,” ci in sawl hi.

²⁴Tua zawkciang ama le Jonadab in pai in sangaw biakpiakna, meihal biakpiakna Baal tungah pia hi. Ama in pasal 80 biakinn pua sangah koi a, hi bangin thupia hi. “Hi mihingte a vekpi in thatlum siat tu nu hi, khat po in amate a suaktasak a om le ama ii nuntakna taw lul tu hi!” ci hi.

²⁵Jehu in biakpiakna a vawt zawkciang a cingte munah, “Tum vun a, a vekpi in thatlum siat vun; khat zongh suaktasak heak vun,” ci hi. Amate namsau daw sa in tum a, a vekpi in thatlum siat in, amate luang sia doipua ah kaikeak uh hi. Tua zawkciang amate a sungnung biakna munah tumin,

²⁶a thiangtho khuam sia pusua uh a, haltum uh hi.

²⁷Tuabangin amate in a thiangtho khuam sia susia in biakinn zongh susia uh a, a biakinn sia eakbuk suaksak uh hi, tu ni dong ma in tuabangin om lai hi.

²⁸Tuabangin Jehu in Israel ngam ah Baal biakna phiat siat hi.

²⁹Ahihang khamh khuital limte Bethel le Dan ah koi in Israel te in biasak a, mawna sungah a lampui kumpipa Jeroboam ii ngamtatna teng ama in zui hi.

³⁰TOPA in Jehu tungah, “Ahab le a suan a paalte tungah vawt a kong oai theampo vawt zo ni hi. Tua ahikom na suante khang li dong Israel te kumpipa in koi tu khi hi ci in kamciam hong pia khi hi,” ci hi.

³¹Ahihang Jehu in a thin theampo taw TOPA Israel te ii Pathian thukhamte ni ngawl a, ama in Israel te mawna sungah a then Jeroboam ngamtatna zuizaw hi.

³²Tua hun laitakin TOPA in Israel ngam ii a zaina khiam tu in hong kipan hi. Syria Kumpipa Hazael in Israel te ii ngam theampo zo hi,

³³Jordan ii nisuana Aroer khuapi thangsang Arnon Ngun hui dong zo hi — tuasung ah Gilead le Bashan ngamkhen te, Gad, Reuben le Nisuana Manasseh te ii teenna teng kihel hi.

³⁴Jehu ii a sep a vawt dangte theampo ama ii hanna nasepte dong Israel Kumpipate Taanghthu sungah kikhum hi.

³⁵Ama thi a Samaria ah kiphum hi, tuaciang ama ii tapa Jehoahaz in a kumpi za laih hi.

³⁶Jehu in Israel kumpipa khat a hina taw Samaria panin kum 28 sung uk hi.