Read Siyin Chin 2 Kumpite 13 Bible Online

2 Kumpite 13 - Siyin Chin bible

2 Kumpite 13

¹Judah te Kumpipa Ahaziah ii tapa Joash maan zawk a kum 23 kumin, Jehu ii tapa Jehoahaz sia Israel te ii kumpipa suak a, ama in Samaria panin kum sawm le kum sali uk hi.

²Ama mai ah kumpipa Jeroboam bangma in ama in TOPA tungah maw a, Israel mite mawna sungah thetpui hi; ama in a ngilo ngamtatnate kheal ngawl hi.

³Tua ahikom TOPA sia Israel tungah thin uuk hi, tuaciang ama in Syria te kumpipa Hazael le a tapa Benhadad in Israel sia hun khat zawk hun khat zosak hi.

⁴Tua zawkciang Jehoahaz in TOPA tungah thungen a, tuaciang TOPA in Syria te ii kumpipa in Israel mite nasia takin a kinengcip a mu ciang a thungetna zo hi.

⁵TOPA in Israel te lampui khat puak a, Syria te khut sung pan ama in suatak hi, tuaciang nidang bangma in, Israel sia ngammuangin om uh hi.

⁶Ahihang amate in Kumpipa Jeroboam ii Israel mite mawna sungah a lampuina te nusia ngawl uh a, tua mawnate ma vawt suak lai uh hi, tuaciang numeipathian Asherah ii lim sia Samaria ah taanglai hi.

⁷Jehoahaz in siphu ngalkap 50, siphu ngalleang sawm le ngalkap 10000 simngawl ngalkap nei ngawl hi, banghang ziam cile Syria kumpipa in a dang teng susia in leivui bangin amate tuanhcil hi.

⁸Jehoahaz ii a sep a vawt le a hanna dang teng sia Israel Kumpite Taanghthu sungah kikhum hi.

⁹Ama thi a, Samaria ah kiphum hi, tuaciang a tapa Jehoash in a kumpi za lua hi.

¹⁰Judah te Kumpipa Joash ii maan zawk a kum 37 kumin Jehoahaz ii tapa Jehoash sia Israel te ii kumpipa suak hi, tuaciang ama in Samaria pan kum sawm le kum luk sung uk hi.

¹¹Ama in zongh Israel te mawna sungah a lampui, Kumpipa Jeroboam ii siatna teng zui in TOPA tungah maw hi.

¹²Ama ii sep le vawt dangte, Judah te kumpipa Amaziah taw a kidona sungah a hanna theampo a kihel in Israel Kumpipate ii Taanghthu sungah kikhum hi.

¹³Jehoash thi a Samaria khua kumpi thaan ah kiphum a, a tapa Jeroboam II in a kumpi za laih hi.

¹⁴Kamsaangpa Elisha sia thithei natna taw na a, ama thi tu in a lupna ah Israel te Kumpipa Jehoash in ve hi. “Ka pa awng, ka pa awng!” ci in au in kap hi. “Nang sia Israel a hung a thahat pa ni hi!” ci hi.

¹⁵Elisha in, Jehoash tungah, “Thal khat le thaltang pawlkhat hong la ta'n,” ci in thupia hi. Jehoash in tuate la a,

¹⁶Elisha in tua thal kaap tu in kinging in sawl hi. Kumpipa in a sawl bangin mang a, tuaciang Elisha in a khut sia kumpipa khut tungah koi hi.

¹⁷Tua zawkciang kamsaangpa ii sawl bangin Syria ngam sang a nga khelki sia kumpipa in hong hi. “Thaltang kap in!” ci in Elisha in thupia hi. Kumpipa ii thaltang a kaa zawk po ciang kamsaangpa pau a, “Nang sia TOPA ii thaltang ni hi, tua taw TOPA in Syria te zo tu hi. Nangma in Aphek ah Syria te na zaw dong na do tu hi,” ci hi.

¹⁸Tua zawkciang Elisha in kumpipa munah thaltang dang teng zongh la in lei saatna nei in ci in sawl hi. Kumpipa in lei thumvei saat a, tua zawkciang tawp hi.

¹⁹Hi sia in Elisha thin uuksak a, ama in kumpipa munah, “Nga vei lukvei bang na saat tu hi ve, tua hile Syria te zo siat tu ve teh, tu in amate thumvei bekma zo tu ni hi,” ci hi.

²⁰Elisha thi in ama kiphum hi. Kum simin Moab te in a hon veu in Israel ngam sim uh hi.

²¹Khatvei mithi khat a kivui laitakin tua ngalte honkhat kingal mu a, tuaciang mithi puate in a thiluang sia Elisha ii thaan sungah lawnsuk uh a, amate taikeak uh hi. Elisha ii ngu taw a kiphak po ciang mithi sia nungta kik a, ding to hi.

²²Syria Kumpipa Hazael in Jehoahaz ii maan sung theampo Israel nengcip ngawp a,

²³ahizong TOPA in amate tungah thuthiamin hesuak hi. Amate a kimaimot mang tu oai ngawlin, hu zaw hi, banghang ziam cile Abraham, Isaac le Jacob te tungah thuciamna a vawt hang ahi hi. Ama in a mite mangil ngeingawl hi.

²⁴Syria Kumpipa Hazael a thi ciang a tapa Benhadad kumpi suak hi.

²⁵Tua zawkciang Israel Kumpipa Jehoash in Benhadad sia thumvei zo zo a, tuaciang a pa Jehoahaz ii khan lai a Benhadad ii suan sa khuapite ama in la kik hi.