Read Siyin Chin 2 Kumpite 15 Bible Online

2 Kumpite 15 - Siyin Chin bible

2 Kumpite 15

¹Israel kumpipa Jeroboam II kumpi a sep zawk a kum 27 kumin Amaziah tapa Uzziah sia Judah te kumpipa suak a,

²ama kum sia kum sawm le kum luk pha in, Jerusalem pan kum 52 sung uk hi. A nu sia Jerusalem pan a Jecoliah ahi hi.

³A pa ii ngamtatna zui in ama in TOPA ii diksak bangin ngamta hi.

⁴Ahihang doai biate ii biakna munte kisusia ngawl a, mihingte in sangaw biakpiakna le ngimnamtui halnate tua munah vawt suak lai uh hi.

⁵TOPA in Uzziah sia a kiitakhuai vun natna taw vaat a, a thi dong tua natna vei hi. Ama in ama ii aituam inn khat ah teang a, a vaipuak theampo kipengsakin, a tapa Jotham in ngam uk hi.

⁶Uzziah ii a sep a vawt dangte theampo sia Judah Kumpipate Taanghthu sungah kikhum hi.

⁷Uzziah thi a, David ii khuapi sung kumpi thaan ah kivui a, a tapa Jotham in a kumpi za laih hi.

⁸Judah kumpipa Uzziah maan zawk a kum 38 kumin Israel te ii kumpipa Jeroboam II ii tapa Zechariah sia Israel te ii kumpipa suak a, tuaciang ama in Samaria pan tha luk sung uk hi.

⁹Ama in, ama mai ah a seam masa te bangma in TOPA tungah maw hi. Ama in Nebat ii tapa kumpipa Jeroboam ngitlo ngamtat sia teng zui in, Israel te mawna sungah lampui hi.

¹⁰Jabesh ii tapa Shallum in Kumpipa Zechariah suam tu a sawm bangin Ibleam ah thatlum hi, tuaciang a kumpi za ama in lua hi.

¹¹Zechariah ii sep le vawt a dangte theampo sia Israel Kumpipate Taanghthu sungah kikhum hi.

¹²Tua ahikom TOPA ii Kumpipa Jehu tungah kamciam a piak, “Na suan na paalte khang li dong Israel kumpipate suak tu hi,” a ci sia taangtung hi.

¹³Judah Kumpipa Uzziah a maan zawk a kum 39 kumin, Jabesh ii tapa Shallum sia Israel te ii kumpipa suak hi, tuaciang ama in Samaria pan tha khat sung uk hi.

¹⁴Gadi ii tapa Menahem in Tirzah pan Samaria ah pai a, Shallum suamlum in a kumpi za lua hi.

¹⁵Shallum ii a sep a vawt dangte theampo, a ngual suamna thute a kihel in Israel Kumpipate ii Taanghthu sungah kikhum hi.

¹⁶Menahem in Tirzah panin a pai ciangin Tappuah khuapi, a sungah a teangte le a kiim a paam ngamkhen teng susia cip hi, banghang ziam cile ama tungah ki aap ngawl hi. Nau ngai numeite theampo ii ngilpi ngawngawn khuakeak hi.

¹⁷Judah Kumpipa Uzziah ii maan zawk a kum 39 kum in Gadi ii tapa Menahem sia Israel te ii Kumpipa suak hi, tuaciang ama in Samaria pan kum sawm sung uk hi.

¹⁸Ama in, a thi dong Israel te mawna sungah a lampui Nebat ii tapa kumpipa Jeroboam tatsiatna teng zui in, TOPA tungah maw hi.

¹⁹Assyria te ii kumpilianpa Tiglath Pileser in Israel sim a, tuaciang Menahem in, ngam sungah ama ii vaangletna a kip natu tua kumpipa ii panpui natu in ngunn kilogramme 34,000 pia hi.

²⁰Menahem in tua dangka te sia Israel ngam ah mihaute khat sim tung pan ngunntang 50 tek zawthawk thu taw khonin a nga ahi hi. Tua ahikom Tiglath Pileser sia ama ngam ah cia kik hi.

²¹Menahem ii a sep a vawt dangte theampo sia Israel Kumpite ii Taanghthu sungah kikhum hi.

²²Ama thi in kiphum a, a tapa Pekahiah in ama kumpi za laih hi.

²³Judah Kumpipa Uzziah ii maan zawk a kum 50 kumin Menahem ii tapa Pekahiah sia Israel te ii kumpipa suak hi, tuaciang ama in Samaria panin kum nii sung uk hi.

²⁴Ama in, Israel sia mawna sungah a lampui Nebat ii tapa Kumpipa Jeroboam ii ngitlo ngamtat teng zui in, TOPA tungah maw hi.

²⁵Pekahiah ii ngalkap ulian khat ahi Remaliah ii tapa Pekah in Gilead khua pan mihing 50 taw ama thasawmin, Samaria kumpi inn a sungnung kulh sungah Pekahiah sia suamlum a, ama in a kumpi za lua hi.

²⁶Pekahiah ii a sep a vawt dangte theampo Israel Kumpipate ii Taanghthu sungah kikhum hi.

²⁷Judah Kumpipa Uzziah ii a maan zawk a kum 52 kumin Remaliah ii tapa Pekah sia Israel te kumpipa suak a, ama in Samaria ah kum kul sung maang hi.

²⁸Ama in Israel te mawna sungah a lampui Nebat ii tapa Kumpipa Jeroboam ii ngitlo ngamtatna teng zui in, TOPA tungah maw hi.

²⁹Pekah kumpipa ahi hun laitakin Assyria te ii kumpilianpa Tiglath Pileser in, Ijon, Abel Beth Maacah, Janoah, Kedesh le Hazor khuapi teng le Gilead ii ngamkhen, Galilee le Naphtali teng suan hi, tuaciang a mihingte sia Assyria ah thongtaak tu in ciapui hi.

³⁰Judah kumpipa Uzziah ii tapa Jotham ii maan zawk a kum kul lai in Elah ii tapa Hoshea in kumpipa Pekah sia thasawmin, suamlup zawkciang a kumpi za sia ama in lua hi.

³¹Pekah ii a sep a vawt dangte theampo sia Israel Kumpipate ii Taanghthu sungah kikhum hi.

³²Remaliah ii tapa Pekah ii Israel kumpi in a maan zawk a kum nii kumin Uzziah ii tapa Jotham sia Judah te kumpipa suak hi,

³³ama ii kum sia kum 25 pha a, Jerusalem panin kum sawm le kum luk sung uk hi. A nu sia Zadok ii tanu Jerusha hi.

³⁴A pa Uzziah ii ngamtatna zui in Jotham in TOPA ii diksak te ngamtatna in nei hi.

³⁵Ahihang doai biate ii biakna munte kisusia ngawl hi, tuaciang mihingte in sangaw biakpiakna le ngimnamtui halna te tua munah vawt suak lai uh hi. Biakinnpi ii Saksang Kongpi a sa sia Jotham ahi hi.

³⁶Jotham ii sep le vawt a dangte theampo sia Judah Kumpipate ii Taanghthu sungah kikhum siat hi.

³⁷Ama kumpipa ahi laitakin TOPA in Judah te sim tu in Syria te kumpipa Rezin puak masa a, tuaciang Israel te kumpipa Pekah puak hi.

³⁸Jotham thi a David ii Khuapi sung kumpi thaan ah kiphumin a tapa Ahaz in a kumpi za laih hi.