Read Siyin Chin 2 Kumpite 20 Bible Online

2 Kumpite 20 - Siyin Chin bible

2 Kumpite 20

¹Hi hun sung khawngin Kumpipa Hezekiah sia a ciina in thi dektak hi. Amoz ii tapa, kamsaangpa Isaiah in ama taw kimu tu in pai a, ama munah, “TOPA in nang tungah na theampo a kilawm bangin hong koi tahen, banghang ziam cile dam kik ngawl tu ni hi. A thi tu kinging hen hong ci hi,” ci in son hi.

²Hezekiah in a maitang pang sang nga in,

³“TOPA awng, nang tungah thumaanna le citakna taw in nong oai theampo hanciam in ka sep tawntung sia hong phawk ta'n,” ci in thungen hi. Tuaciang ama nasia takin kap hi.

⁴Isaiah in kumpipa paisan ahihang kumpi inn leitual laita sia a kaantan ma in

⁵TOPA in mite a ukpa Hezekiah kungah Isaiah pai kik in sawl a, ama munah, “Kei, TOPA, na taanghpupi David ii Pathian in na thungetna kong za zo a, na thitui luan ka mu zo hi. Nang hong damsak tu khi hi, tuaciang tu zo ni thum ciangin Biakinnpi ah pai tu ni hi.

⁶Kum sawm le kum nga hong nungtasak lai tu khi hi. Assyria kumpilianpa khut sung pan nang le hi Jerusalem khuapi sia hong suatak tu khi hi. Keima vaang tu le ka naseampa David tungah kamciam ka piak hu in hi khuapi hung tu khi hi,” ci in sonsak hi.

⁷Tua zawkciang Isaiah in kumpipa a ou te munah theinga panin a kivawt noi thei khat a uilut noai le uhte ama dam tu hi, ci in sawl hi.

⁸Kumpipa Hezekiah in, “TOPA in hong damsak tu a, ni thum ciangin Biakinnpi ah ka pai thei tu sia bang lim taw tel tu khi ziam?” ci in dongh hi.

⁹Isaiah in, “TOPA in a kamciam bang len tu hi ci in hong lakna in lim khat hong pia tu hi. Tu in keallei tungah a limh sia a mai sangah kal sawm paisak tu deizaw ni ziam ahibuale a nungsangah kal sawm nungkinsak nuam zaw ni ziam?” ci kik hi.

¹⁰Hezekiah in, “A limh liap sia a mai ah kal sawm paisak tu ol hi! Kal sawm nungkinsak in,” ci in zo hi.

¹¹Isaiah in TOPA tungah thungen a, Kumpipa Ahaz ii vawt keallei tungah a limh sia kal sawm TOPA in nungkinsak hi.

¹²Tua hun khawngma in Babylon kumpi ahi Baladan ii tapa Merodach Baladan in Hezekiah kumpipa ciinat za ahikom ama in lai thaak khat le letsong khat thaak hi.

¹³Hezekiah in tua kamtaite pha takin vaidawn a, tuaciang a hauna teng amate lak hi — ama ii ngunn le khamhte, hel namtuite le paaknamtuite tuaciang a ngal vanh teng lak hi. Ama ii vanh kholna inndoi sung ahizong ama ii kumpi ngam sungah ahizong a lak ngawl vanh khat beak zongh a om bua hi.

¹⁴Tua zawkciang kamsaangpa Isaiah sia Hezekiah kumpipa kungah pai in, “Mihing hite koisung pan hong pai a, amate in nang tungah bang hong ci ziam?” ci in dongh hi. Hezekiah in, “Amate ngam khuala mama na Babylon panin hong pai hi,” ci in zo hi.

¹⁵“Kumpi inn sungah amate in bang teng mu ziam?” ci in dongh hi. “Amate in na theampo mu siat hi. Vanh kholna inndoite sungah ka lak ngawl bangma om ngawl hi,” ci hi.

¹⁶Tuasia ciang, Isaiah in kumpipa tungah, “TOPA Vaanglianbelpa in,

¹⁷na kumpi inn sungah vanh om theampo, na taanghpupite ii tuni dong a kholsa theampo Babylon ah a kipuak tu hun khat hong theng tu hi. Bangma kikhe ngawl tu hi.

¹⁸Nangma ii suan le paal tatak te pawlkhat kipaipui tu a, a cil uh kinget in Babylon kumpi inn sungah numei uk kiseamsak tu hi ci hi,” ci in son hi.

¹⁹Kumpipa Hezekiah in hi teng sia ama ii nuntak sungah ngal kilemna le ngam muanna om tu hi cinopna in saang ahiciangin, “TOPA tung pan nong thu piak teng sia thupha hi,” ci in zo kik hi.

²⁰Hezekiah kumpipa ii a sep a vawt dang teng, a ngal hanna, tuikholna khat a vawtna le khuapi sungah tui a luan natu lei a tawletna thute theampo sia Judah Kumpipate Taanghthu sungah kikhum siat hi.

²¹Hezekiah thi a, a tapa Manasseh in a kumpi za laih hi.