Read Siyin Chin 2 Kumpite 22 Bible Online

2 Kumpite 22 - Siyin Chin bible

2 Kumpite 22

¹Josiah sia Judah kumpipa a sua hunin kum liat pha hi, tuaciang ama in Jerusalem pan kum 31 sung uk hi. A nu sia Bozkath khua pan Adaiah ii tanu Jedidah hi.

²Josiah in TOPA ii diksak te vawt hi; ama in a taanghpupi David ii lamlak bangin ngamta a, Pathian thukhamte theampo belcing takin zui hi.

³Kumpipa Josiah in a maan zawk kum sawm le kum liat laitakin, Meshullam ii tupa, Azaliah ii tapa zum thuzeakpi Shaphan sia Biakinnpi ah samsak a:

⁴“Thiampi Lianbelpa Hilkiah kungah pai in a, Biakinnpi tumna a vaipuak nei thiampite ii mipite tung pan a khon sumte bangza pha ziam sazian hong la ta'n.

⁵A sum sia Biakinnpi puate a ukte tungah a piak tu in son in. Amate in

⁶lettamate, inn sate, uksuang ciangte thaman pia in, thing le suang biakinn pua natu a kizangh teng leina in nei tahen.

⁷Nasepnate a ukte sia thumaan mama ahikom a sum zakna uh sazian vawtsak kul ngawl hi,” ci in thupia hi.

⁸Shaphan in kumpipa thupiakna teng Hilkiah tungah son a, tuaciang Hilkiah in Biakinnpi sungah Thukham laibu ka mu hi ci in son hi. Hilkiah in tua laibu sia pia a Shaphan in sim hi.

⁹Tua zawkciang ama kumpipa kungah pai kik a: “Na naseamte in Biakinnpi sung a om sum teng la in, innpuuate a ukte tungah aap siat zo hi,” ci hi.

¹⁰Tua zawkciang ama in, “Hi sungah Hilkiah ii hong piak laibu khat nei khi hi,” ci hi. Tuaciang ama in kumpipa tungah a nging in sim hi.

¹¹Kumpipa in laibu a kisim sia thu a zaak ciang, thinnop ngawlna taw a puan eaukeak a,

¹²tuaciang Hilkiah thiampipa, Shaphan tapa Ahikam, Micaiah tapa Achbor, zum thuzeakpi Shaphan te tung le kumpipa koppui pa Asaiah te tungah:

¹³“Pai tavun a, hi laibu ii hong hilna thute TOPA tungah keima le Judah mi teng a tu in hong dongh tavun. TOPA sia ei tungah thin uuk hi, banghang ziam cile ih taanghpupite in hi laibu ii vawt hamtang tu a ci bangin seam ngawl uh hi,” ci in thupia hi.

¹⁴Jerusalem khua ii a khenthak sungah a teang Huldah a kici numei kamsaang khat munah thu dongh tu in, Hilkiah, Ahikam, Achbor, Shaphan le Asaiah te pai uh hi. (A pasal Shallum sia, Tikvah ii tapa, Harhas ii tupa hi a, ama in biakinn sungah a zak puantualte a keampa ahi hi.) Amate in thupiang teng ama munah son uh hi,

¹⁵tuaciang ama in amate sia kumpipa kungah cia kikin sawl a,

¹⁶TOPA ii thupiak hi teng kumpipa puakin sawl hi: “Keima in Jerusalem le a mite theampo kumpipa ii sim laibu sia sungah a ki at bangin daan ka pia tu hi.

¹⁷Amate in kei hong nial a, tuaciang pathian dangte tungah sangaw biakpiakna pia zo hi, tua ahikom amate ii sep le vawt theampo in ka thin uukna piangsak hi. Ka thin uukna sia Jerusalem tungah tu hi, tuaciang tua ka thin uukna sia veng ngawl tu hi.

¹⁸Kumpipa ama a tu in hi bangin kei, TOPA Israel ii Pathian in ci khi hi: nangma in laibu sung a ki at teng nadon zo ni hi,

¹⁹tuaciang Jerusalem le a mite daan piak tu ka tawn na te na zaak ciang kisiik kikin kiniamkhiakna taw ka mai ah na puansilh eaukeak in kap ni hi. Mit mu bek zongin a lauhuai mama na mun ka suaksak tu a, mihingte in tua mun ii min sia haamsiatna kammal in a zangh tu hi. Ahihang na thungetna hong za zo khi hi,

²⁰tuaciang Jerusalem khua daan ka piak tu sia zongh na thi zawk mateng in tung ngawl tu hi, thinnuam in kong thisak tu hi.” Tua pasalte in hi a thupuak teng taw kumpipa Josiah kungah heak kik uh hi.