Read Siyin Chin 2 Kumpite 25 Bible Online

2 Kumpite 25 - Siyin Chin bible

2 Kumpite 25

¹Zedekiah in Babylon kumpipa Nebuchadnezzar leedo ahikom Nebuchadnezzar in a ngalkap hon theampo taw Jerusalem sia Zedekiah ii kumpi maan a kum kua kum, a tha sawm, ni sawm ni in sim hi. Amate in khuapi pua sangah ngiaphual saat a, a uumci natu in pangte vawtin,

²Zedekiah ii a ngam ukna, kum sawm le kum khat a cin dong uumci hi.

³Tua kum a tha lina, a ni sawm ni in, kialpi nasia mama a, mite neak tu bangma om nawn ngawl ahikom

⁴a mite in a khuapi luphung sulet hi. Babylon te in khuapi kiim uum ahihang ngalkap theampo sia zanin suakta uh hi. Amate in kumpi huan pan luphungte nii kipeena kongpi lam tawn in Jordan Kuam sangah tai uh hi.

⁵Ahihang Babylon ngalkaphonpi in Zedekiah kumpipa zuizen a, Jericho khuahui zaangtamna munah man hi, ama sia a ngalkapte theampo in taisan hi.

⁶Zedekiah sia Riblah ah a om Kumpipa Nebuchadnezzar kungah kipaipui a, tua mun ah Nebuchadnezzar in Zedekiah tungah thukhen hi.

⁷Zedekiah ii mu tangin a tapate kithatlum hi; tua zawkciang Nebuchadnezzar in Zedekiah ii mittangte khelkeaksak a, thikkol bulin Babylon ah paipui hi.

⁸Babylon kumpipa Nebuchadnezzar ii kumpi maan kum sawm le kum kua kum, a tha nga na, a ni sali ni in kumpipa thudokpa le a ngalkaphonpi ukpa Nebuzaradan sia Jerusalem ah tum hi.

⁹Ama in Biakinnpi, kumpi inn le Jerusalem ah mihing thupi theampo ii innte haltham hi,

¹⁰tuaciang ama ii ngalkapte in khuapi luphungte pheltham hi.

¹¹Tua zawkciang Nebuzaradan in khuapi sungah a kinusia mite, a om lai sun nasep thiamte le Babylon te panpui tu in a tai teng Babylon ah paipui hi.

¹²Ahihang ama in mizawngbel, neisa bangma a nei ngawl pawlkhat teng sia Judah ah nusia in sapithuan sung le lo sungah na seamsak hi.

¹³Babylon te in Biakinnpi sungah a om taau khuamte le leangte, tuaciang taau tuikuang lian sia semtham in taau om theampo Babylon ah paipui hi.

¹⁴Amate in kawkeaute, biaknatau thiansakna a zak vut kuangte, meiinn detna vanh zakte, sangaw biakpiakna a sachi donna kuangte, ngimnamtui halna kuangte le a dang taau taw a kivawt biakinn sung na zakte zongh la hi.

¹⁵Amate in khamh le ngunn taw a kivawt peuma, meikam toaina kuangtung kuangdal te dongin la uh hi.

¹⁶Kumpipa Solomon ii Biakinnpi atu a vawt taau vanhte, — khuam niite, leangte, tuikuangpui — hite sia ngit leih ahikom khai kitee ngawl hi.

¹⁷Khuampi nii a kiphutte sia kikim in metre 8 veu saang hi, a dawn a tungkhuna sia taau ma hi a, metre 1.3 saang hi. Tua khuamlu kiimkot simin taau taw a kivawt a tungkhu om a, tuate taau taw kivawt talee nga taw kizeam hi.

¹⁸Tuate ban ah, ngalkap maangpa Nebuzaradan in Thiampi Lianbel Seraiah le a dom thiampi Zephaniah le a dang biakinn a seam ulian thupi thum teng paipui hi.

¹⁹Khuapi sung panin ngalkap uk ulianpa, khuapi sung ma ah a om lai kumpipa ii aituam thudokte nga, ngalkap vai theampo tepteena keam ngalkap ukpa ii khutdawn pa le a dang mihing thupi 60 paipui hi.

²⁰Nebuzaradan in amate Hamath ngamsung Riblah khuapi ah om Babylon kumpipa kungah paipui hi.

²¹Tua munah kumpipa in amate velsak a, thatlumsak hi. Tua ahikom Judah mite sia amate ngam panin salin kipaipui hi.

²²Babylon kumpipa Nebuchadnezzar in Shaphan ii tupa, Ahikam ii tapa Gedaliah sia Judah ngamuk mangpa in koi hi, tuaciang Babylon ah a kipaipui ngawlte uksak hi.

²³Ngalte khut sungah a tum ngawl Judean ngalkap maangte le ngalkapte in hi thu a zaak ciang Mizpah ah Gedaliah taw kikop uh hi. Hi ngalkap maangte sia Nethania ii tapa Ishmael, Kareah ii tapa Johanan, Netophah khua pan Tanhumeth ii tapa Seraiah le Maacah pan Jezaniah te ahi uh hi.

²⁴Gedaliah in amate tungah, “Babylon uliante kiitak om ngawl hi hong ci ngam khi hi. Hi ngam sungah teang vun a, Babylon kumpipa atu na na sepsak vun, tua hile na theampo a pha a dikin hong piang tu hi,” ci hi.

²⁵Ahihang tua kum sung a tha salina ciang, kumpi innkuan sung pan khat zongh ahi, Elishama ii tupa, Nethaniah ii tapa Ishmael sia Mizpah ah mihing sawm taw pai a, Gedaliah simin thatlum uh hi. Ama taw tualai ah a om Israel mite le Babylon te zongh that hi.

²⁶Tua zawkciang Israel te theampo a hau a zawng, a kibangin ngalkap uliante taw tua mun nusia in Egypt ah tai uh hi, banghang ziam cile amate in Babylon te kiita uh hi.

²⁷Evilmerodach sia Babylon kumpipa a sua kumin, ama in Judah kumpipa Jehoiachin tungah hesuakna a lakna in thong panin pusuaksak hi. Hi bangin thu hong pian sia Jehoiachin ii luangtaak zawk a kum 37 na, tha sawm le tha nii, ni 27 ni hi.

²⁸Evilmerodach in ama sia hesuak a, ama taw Babylon ah sal tang khawm kumpi dangte sangin phat vawt zaw a, vaang neizaw dinmun pia hi.

²⁹Tuabangin Jehoiachin sia a thongpuante kilaihsak a, a nuntak sung teng kumpipa sabuai ah an kinesak hi.,

³⁰Ama ii a nuntak sung teng ni simin a taangsap bang a zak tu sum zongh a hun maan in kipia hi.