Read Siyin Chin 2 Kumpite 5 Bible Online

2 Kumpite 5 - Siyin Chin bible

2 Kumpite 5

¹Syria ngalkaphonpi ukpa Naaman sia Syria kumpipa in nasia takin zakta in upat vawt hi, banghang ziam cile Naaman tungtawnin TOPA in Syria ngalkapte zawna pia hi. Ama sia ngalkap mang lian khat hi, ahihang ama in a kiitakhuai mama vun natna khat thuak hi.

²Amate ii Israel a sim hunlai khat ah Syria te in Israel numeino khat ciapui in, tua nu sia Naaman zi ii naseamnu suak hi.

³Ni khat ni in ama in a tonu tungah, “Samaria a teang kamsaangpa kungah ka topa pai thei le ka oai hi! Ama in a natna teng damsak tu hi,” ci hi.

⁴Naaman in hi thu a zaak ciang kumpipa kungah pai in, numeino ii pauna teng son hi.

⁵Kumpipa in, “Israel kumpipa kungah va pai ta'n a, hi ka laithak sia na puak ta'n,” ci hi. Tua ahikom Naaman vai ding in, ngunntang 30,000, khamh tang 6,000, puan laih natu puan hoi sawm keng hi.

⁶Ama ii puak laithak sungah hi bang ki at hi: “Hi laithak in ka ngalkap bu Naaman kong heaksakna hi. A natna pan na damsak natu ka dei hi,” ci hi.

⁷Israel kumpipa in tua laithak a sim ciangin, thinkiamna taw a puante eaukeak in, “Bangbangin Syria kumpipa in hisia pa damsak thei tu in kei hong um ziam? Nuntakna le thina tungah vaang a nei Pathian vei hong sa ziam? Ama kei taw kihau nuam in hanciam ahi hunlam kician hi!” ci in au hi.

⁸Kamsaangpa Elisha in bang thu piang ci in a zaak ciangin ama in kumpipa tungah kam thaak hi: “Banghang tuaza in na thinngim ziam? Tua pa keima kungah hong puak ta'n, Israel ngam sungah kamsaang khat a om nginge hunlam lak tu khi hi,” ci hi.

⁹Tua ahikom Naaman in a siphu te le a siphu ngalleang taw pai in Elisha ii kongbiang ah tawlnga hi.

¹⁰Elisha in a naseam khat paisak in, ama munah Jordan ngun sungah salivei kisil tahen, tua hile a natna pan dam thiang tu hi cisak hi.

¹¹Ahihang Naaman a thinso in tua mun nusia a, “Kei ngaisutna pan a nobel in ama kei kungah hong pusuak in, TOPA a Pathian munah thu hong ngetsak tu a, ka natna mun santak teng tungah a khut hong vaan le, hong damsak tu in ka um hi!

¹²Tua banah Damascus ah Abana ngun le Pharpar ngun te Israel ngam sungah ngun khat pawpo sangin phazaw hi ngawl ziam? Tuate sungah kibual in dam thei tu khi hi,” ci hi.

¹³A naseamte ama kungah pai in, “Topa awng, kamsaangpa in a haksa vawt tu in hong sawl le zong vawt tu ni hi. Tu in ama ci bangin banghangin na dam natu in ngun sungah kibual paih lel ngawl tu ni ziam?” ci hi.

¹⁴Tua ahikom Jordan ngun ah Naaman paisuk in, Elisha ii ci bangin ngun tui sungah ama le ama salivei kipap a, tuaciang ama dam thiang sitset hi. Ama ii sa sia hong ciip in a ciidam a, nauno khat ii cii le sa bang ahi hi.

¹⁵Ama in a mite theampo taw Elisha kungah hong heak kik a, “Tu in Israel ii Pathian ngawl pathian dang om ngawl hi ci in ka he hi; tua ahiciang topa awng, nong hesuakna in, kong piak letsong khat hong saang ta'n,” ci hi.

¹⁶Elisha in, “A na ka sepsak a nungta TOPA taw kiciam khi hi, letsong khat zongh saang ngawl tu khi hi,” ci in zo hi. Naaman in a saan natu in kunh top ahihang ama in saang nuam ngawl hi.

¹⁷Tua ahikom Naaman in, “Ka letsong hong saang ngawl tu na hile laa nii ii puakkhop leitang hong ciapuisak ta'n, banghang ziam cile tu pan kipan TOPA tung simngawl pathian dang peuma tungah sangaw biakpiakna ahibuale meihal biakpiakna te pia nawn ngawl tu khi hi.

¹⁸Tuabangin hi leng, Rimmon biakinn ah Syria pathian a biak tu in ka kumpipa ka zui ciang TOPA in kei hong maisak tu in ka lamen hi. TOPA in hong maisak tatak tu hi,” ci hi.

¹⁹Elisha in, “Thinnuamin va pai ta'n,” ci hi. Tuaciang Naaman in paisan hi. Ama lam khuala a thet ma in,

²⁰Elisha naseampa Gehazi in, ama le ama hi bangin, “Ka topa in Naaman sia bangma piasak ngawlin paithongsak hi. Tua Syria pa ii piak teng sia a saan tatak tu ahi hi. A nungta TOPA min taw ama nung pan del in, na khat pawpo ama tung pan nga tong,” kici hi.

²¹Tua ahikom ama in Naaman ii nung panin del hi. Naaman in ama nung pan mihing khat ii a del a mu ciangin a leang tung pan tuak a, ama taw kisi in, “A phamaw khat po om ziam?” ci in dongh hi.

²²Gehazi in “Om ngawl hi,” ci in zo hi. “Ahihang ka topa in nangma tungah sonin hong sawlna pan, tu ma hiat in Ephraim mualtung ngam panin kamsaangte pawl sung pan nii hong theng a, amate ngunntang tulthum le puan laih natu kop nii pia le hong oai hi,” ci hi.

²³Naaman in, “Nong hesuakna taw ngunntang tulluk la in,” ci in zo hi. Ama in lasak hamtang hi, ngunntangte ip nii sungah sawm in, puansilh laihna kop nii pia a, a naseamte nii aap in, Gehazi mai ah tua vanhte taw pai masa sak hi.

²⁴Amate sia Elisha teenna mualtung a thet ciang Gehazi in ipte nii saangin inn sungah sungtan pui hi. Tua zawkciang ama in Naaman ii naseamte ciasak hi.

²⁵Ama inn sungah tum kik a, tuaciang Elisha in ama munah, “Koisung pai ni ziam?” ci in dongh hi. “Topa awng, koima pai bong,” ci in ama in zo hi.

²⁶Ahihang Elisha in, “A mihingpa in nang taw kisi tu in leang tung pan hong tuak lai in, kei zongh ka thaa taw hong om ngawl ka na khi ziam? Hi bang sum ahizong, puan le olive huante ahizong, sapithuante ahizong, tuu le khuite ahizong, letsong saan tu hun hi ngawl hi.

²⁷Tu in Naaman ii natna teng nang tungah hong theng tu a, nang le na suan na paal theampo in tua natna a tawntungin vei tu nu hi!” ci hi. Gehazi a pusua ciang ama in tua natna nga in — a vun sia vuuk bangin kaang hi.