Read Siyin Chin 2 Kumpite 6 Bible Online

2 Kumpite 6 - Siyin Chin bible

2 Kumpite 6

¹Ni khat ni in, Elisha ii uk kamsaang pawlkhat te in Elisha tungah amate lungkim ngawlna zasak uh hi, “Ka teenna mun uh no leih hi!

²Tua ahikom, ka teen natu uh inn ka sak natu Jordan ngun ah pai a, thing pawlkhat hong phuksak thei ta'n,” ci uh hi. Elisha in, “Pha hi,” ci in zo hi.

³Amate sung pan khat in amate taw ton tu in Elisha paa a, ama lungkim in paikhawm uh hi.

⁴Jordan a thet uh ciangin amate sia naseam tu in hong kipan uh hi.

⁵Amate sung pan khat in thing khat a phu ciangin thakhat thu in a heitang zuukin tui sungah taak hi. Ama in Elisha munah, “Bang law tu khi ziam, Topa awng? Hei sia a kikawm hi!” ci hi.

⁶Elisha in, “Koisung santak ah taak ziam?” ci in dongh hi. A taakna san a lak ciang Elisha in ciangkang khat saattan in, tui tungah a lot le a heitang tui tungah hong kilaamto hi.

⁷“La in,” ci in a sawl ciang tua pa kun sukin heitang tawm hi.

⁸Syria kumpipa sia Israel taw kido hi. Ama in uliante taw kikum a, ngiaphual saat natu mun khat teal hi.

⁹Ahihang Elisha in Israel kumpipa tungah tua mun ii nai ah pai ngawlin a kidop natu kam thaak hi, banghang ziam cile Syria te in tua mun pan a suam tu in pang hi.

¹⁰Tua ahikom Israel kumpipa in tua mun nai ah a om mihingte munah kidop natu thu puak hi, tuaciang amate sia ngal nang tu kithoai sa in om uh hi. Hi bangin tamvei ma hong piang hi.

¹¹Syria kumpipa sia hisia huvau in nasia takin a thin buai hi; ama in a uliante sam in, “No sung pan akua sia Israel kumpipa sangah pang nu ziam?” ci in dongh hi.

¹²Khat in, “Kumpipa awng, kuama a pang om ngawl hi. Kamsaangpa Elisha in Israel kumpipa tungah na inndoi sungah thuku na son theampo zong son siat hi,” ci in zo hi.

¹³Kumpipa in, “Ama koisungah om ziam? Zong vun! Ama man tu khi hi,” ci hi. Elisha sia Dathan ah om hi ci in a kison ciangin ama in,

¹⁴tua munah ngalkap le siphu ngalleang tam ma puak hi. Amate sia tua khua ah zan in theng a, uumci uh hi.

¹⁵A khuavak ni zing tuungin Elisha ii naseampa hong tho a, inn pua ah pusuakin khua a et ciang, khua kiimkot ah ngalkapte, siphu ngalleangte le siphute mu hi. Ama in inn sungah tum kikin, Elisha munah, “A lal hi zo hing, topa awng, bang ih law tu ziam?” ci hi.

¹⁶Elisha in, “Lau heak in, amate sangah a pangte sangin ei sangah hong pangte tamzaw hi,” ci in zo kik hi.

¹⁷Tua zawkciang ama thungen a, “Oh, TOPA, ama mittangte khua a mu thei natu honsak in,” ci hi. TOPA in Elisha thungetna zo a, tuaciang Elisha ii naseampa in a et to le Elisha ii kiimkot mual pangh te sia siphu le meikuang siphu ngalleangte taw kidim in mu hi.

¹⁸Syria te ii sim ciang Elisha in thungen a, “Oh TOPA, hi mite a mit uh tawcipsak in!” ci hi. TOPA in a thungetna zo a, a ngalte a mittaw cipsak hi.

¹⁹Tuaciang Elisha in amate kungah pai in, “No sia lam khial nu hi, khua na zon uh sia hi sung hi ngawl hi. Mihing na zon uh sia kungah keima hong paipui tu khi hi,” ci hi. Tuaciang ama in amate sia Samaria zotpui hi.

²⁰Amate khuapi sung a tum po ciang Elisha in thu ngen a, “A mittang uh honsak in, TOPA awng, amate khuamusak thei in,” ci hi. TOPA in a thungetna saang in, amate khuamusak kik a, tuaciang khua a et uh ciang amate sia Samaria sungsang ah om ahi hunlam kimu uh hi.

²¹Israel kumpipa in Syria te a mu ciang Elisha mun ah, “Ka thatlum tu ziam, topa ka thatlum tu ziam?” ci in dongh hi.

²²“Thatlum heak in, kidona phual ah na matsa ngalkapte zongh thisak ngawl tu ni hi. Amate neak tu dawn tu khat po pia in a, amate ii kumpipa kungah cia kiksak in,” ci hi.

²³Tua ahikom Israel kumpipa in amate atu anneakpoai lian khat vawtsak a, amate ii a neak a dawn zawkciang Syria kumpipa kungah ciasak hi. Tua hun pan kipan Syria te in Israel ngam a sim tawntung teng kheal uh hi.

²⁴Tua zawk tawm vei ciang Syria kumpipa Benhadad in ama ii ngalkaphonpi bup lampui in Samaria uumci hi.

²⁵Tuabang a ki uumci hu in khuapi sungah anneak tu haksa mama a, laa khat ii lutang sia ngunntang 80 man a, inn vakhu eak gram 200 ciang ngunntang nga man hi.

²⁶Israel kumpipa, khuapi luphungte tungah a vak laitak, numei khat au in, “Hong hu ta'n, Kumpipa awng!” ci hi.

²⁷Ama in zo a, “TOPA in nang hong hu buale kei in nang bang hong pia zo tu khi ziam? Zungtaang ahibuale sapittui nei na khi ziam?

²⁸Na haksatna sia bang tatak ziam?” ci hi. Tua nu in, “Ning zeini in hi lai a numei sia in ngaisutna hong pia a, kei nauno sia tua ni in ne tu, a zing ciang ama ii nau sia ne tu ci in ka thukim uh hi.

²⁹Tua ahikom ka nauno sia ka huan uh a ka ne uh hi. A khuavak ni ciang ama nau sia ne tu ka ci le ama in phual hi,’ ci in zo hi.

³⁰Kumpipa in hi thu a zaak ciang a khuangai in a puansilh lai eautham hi, tuaciang ama kung nai ah a pai mite in a puansilhte ii sungsang ah khau-ip puan a silh sia mu uh hi.

³¹Ama au in, “Nitum ma in Elisha ii lu a kitan buale Pathian in hong vaat lum tahen!” ci hi.

³²Tuaciang ama in Elisha man tu in kamtai paisak hi. Tua laitakin Elisha sia a inn ah a haw upa pawlkhat taw om uh hi. Kumpipa ii kamtaite hong thet ma in, Elisha in upate munah, “Mithatpa in kei that tu in khat hong paisak hi! Tu in ama hi sung hong thet ciang kongkha khak vun a, tumsak heak vun. Kumpipa ama mama zongh a nung hiat pan hong pai tu hi,” ci hi.

³³Hi teng a pau zongh man tak ngawl lai in kumpipa hong pai a, “Hi ngimna ei tungah hong puak sia TOPA hi. Ama ii na khat pawpo a vawt tu ngakin banghangin om top tu khi ziam?” ci hi.