Read Siyin Chin 2 Kumpite 7 Bible Online

2 Kumpite 7 - Siyin Chin bible

2 Kumpite 7

¹Elisha in, “TOPA pauna ngai in! Zing ciang tu hunin Samaria ngam sungah zungtaang phabel kilogramme thum ahibuale mangtaang kilogramme luk ciang ngunntang khat taw lei thei tu nu hi,” ci in zo hi.

²Kumpipa a cing tuam pa in Elisha mun ah, “Tuabang piang thei ngawl tu hi — TOPA in thakhat thu in antang hong puak hial zong piang thei ngawl tu hi!” ci hi. Elisha in, “Tuabang a pian sia mu tu ni hi, ahihang nang in tua an peuma na ne ngei buatu hi,” ci in zo kik hi.

³A lauhuai vun natna a vei pasal li sia Samaria kongpi pua sangah om in, amate khat le khat a kipaupuina ah, “Banghangin hi sungah ih thi dong ngak tu hi ziam?

⁴Khuapi sungah ih tum tu le lui thawthong hi, banghang ziam cile, tua munah ih pukthi tu hi; ahihang hi sungah om leang zong ih thi veve tu hi. Tua ahikom Syria te ii ngiaphual sungah tum ka tawng; a siabel amate ii hong vawt thei sia hong thatlum tu hi, ahizong ih nuntakna hong khoaikhe tha tu hi,” ci uh hi.

⁵Tua ahikom khuazing tu a kithoai ciang, amate in Syria te ngiaphual ah pai uh hi, ahihang tua mun a thet uh ciangin, kuama a na om bua hi.

⁶TOPA in Syria te ii zaakna ah siphu te le siphu ngalleangte taw ngalkap honpui kuan in a nging bang khat zasak a, tuaciang Israel kumpipa in Hit le Egypt kumpite ngalcialin, amate simsak hi ci in Syria te in ngaisun uh hi.

⁷Tua ahikom tua nitakin Syria te in amate nuntakna kihuk natu in taikeak in, a puanbukte, siphute, laate le a ngiaphual uh sia a om babangin nusia uh hi.

⁸Tua pasal li teng in ngiaphual kiing a thet uh ciang, puanbuk khat sungah tum in, tua munah a mu po ne in dawn uh hi, ngunn, khamh le puansilh a mu po zongh zamh a, pusua pui in phual uh hi; tua zawkciang amate hong heak kik a, puanbuk dang khat ah tum in tuabang ma in ngamta uh hi.

⁹Ahihang amate khat le khat ii tung ah, “Hi bangin ih ngamtat tu hi ngawl hi! Eima in thupha nga kasap, eima bek ii ih kep tu hi ngawl hi. Tua thu ih son natu in zingsang dong ih ngak le daan hong kipia nanak tu hi. Thakhatin pai in, kumpipa ii uliante munah ko tawng!” ci uh hi.

¹⁰Tua ahikom amate sia Syria te ngiaphual nusia in Samaria ah heak kik a, kongpi cingte oksan in, “Ko teng Syria te ngiaphual ah ka pai uh le kuama mu ngawlin, a pau a haam zongh za ngawl khu hi; a siphute le a laate zongh a khau uh kisuut ngawl hi; tuaciang puanbukte zongh Syria te ii nusiat bang linlian in om hi,” ci uh hi.

¹¹Kongpi cingte in tua thu taangko in, kumpi inn sungah tua thu hong kiko hi.

¹²Zan lai ma hi napi kumpipa hong tho a, a uliante munah, “Syria te ii ngealna teng hong son tu khi hi! Amate in hi sungah kialpi a tun sia he hi, tua ahikom amate in ngiaphual nusia a, ngam sungah a bu tu in pai hi. Amate in ei sia an zong a khuapi nusia tu in hong um hi, tuaciang amate in ei hong hing mat tu a, khuapi hong suan tu hi,” ci hi.

¹³Ama uliante khat in, “Hilai khuapi sung a mite sia bangbang po ahizong a thisate taw kibangin a lal hi zo hi hing. Tua ahikom thupiang teng ih mu thei natu in, a thi mong siphu nga teng taw pasal pawlkhat paisak tawng,” ci hi.

¹⁴Amate in pasal pawlkhat teal in, kumpipa in siphu ngalleang nii taw paisak a, Syria ngalkaphonpi bang tat ziam ci in dawpsak hi.

¹⁵Pasalte Jordan ngun dong pai in, lamdung ah Syria ngalkapte ii a tai kawmin a nusiat puan le vanh te mu uh hi. Tua zawkciang amate hong heak kik in, kumpipa tungah thu ko uh hi.

¹⁶Samaria mite manlang tak hong pusuak in Syria te ngiaphual phuul uh hi. Tuaciangin TOPA ii ci sa bangma in a zungtaang phabel kilogramme 3 ahibuale mangtaang kilogramme 6 ciangin ngunntang khat taw kizuak hi.

¹⁷Israel kumpipa in ama a cing tuam ulian pa sia khuapi kongpi uk tu in na koi luilam hi. Tua ulian pa sia tualai ah mipite in siiklum hi, kumpipa in ama taw kimu tu in a pai laitak Elisha ii sonkhol bangin thi hi.

¹⁸Elisha in kumpipa munah a zing ciang tua hunin zungtaang a phabel kilogramme 3 ahibuale mangtaang kilogramme 6 ciang ngunntang khat taw kizuak tu hi a ci lai in,

¹⁹tua ulian pa in, “Tuabang piang thei ngawl tu hi — TOPA mama in thakhat thu in antang hong puak hial zong piang thei ngawl tu hi!” ci in zo hi. Tuaciang Elisha in, “Tuasia a pian mu tu ni hi, ahihang nang in na ne ngei buatu hi,” ci in zo kik hi.

²⁰Tuasia bang tatakin ama ii tungah piang a, ama thi hi — khuapi kongpi ah mite in ama tuanhlum hi.