Read Siyin Chin 2 Kumpite 9 Bible Online

2 Kumpite 9 - Siyin Chin bible

2 Kumpite 9

¹Tua hun sungin kamsaangpa Elisha in kamsaang khangmoi khat munah, “Kithoai in a, Gilead ah a om Ramoth ah va pai ta'n. Hi olive thau thawl sia keng ta'n a,

²tuaciang tua mun na thet ciang Jehoshaphat ii tapa, Namshi ii tupa Jehu na zong ta'n. A lawmte kung pan samkhia in inndoi tuam khat sungah paipui in a,

³hi olive thau sia a lu tungah buakin, ‘TOPA in nang sia Israel te ii kumpipa tu in taangko hi,’ ci ta'n. Tua zawkciang tua mun sia a manlang thei zaza in nusia in,” ci hi.

⁴Tua ahikom kamsaang khangmoi pa Ramoth ah pai in,

⁵tua munah ngalkap maangte thu kikum mu hi. Ama in, “Topa awng, nang atu kamthaak khat hong keng khi hi,” ci hi. Jehu in, “Ko teng sungah akua hong paupui ni ziam?” ci in dongh hi. “Topa awng, nangma ni hi,” ci in ama in zo kik hi.

⁶Tua zawkciang amate nii sia inn doituam sungah tum a, tuaciang kamsaang khangmoipa in Jehu ii lu tungah olive thau buakin ama munah, “TOPA Israel te ii Pathian in taangko hi: ‘Keima in nang sia Israel te ii kumpipa tu in sathau hong noai khi hi.

⁷Jezebel ii ka kamsaangte le a dang ka naseamte a thalup hu in daan ka piak natu in, nangma in na topa, kumpipa Ahab ii tapa sia thatlum tu ni hi.

⁸Ahab ii innkuanpuite le a suan a paalte a thi siat kul tu hi; a moi a haam a kibangin a bangkua sungah pa a minpiang heamkhia tu khi hi.

⁹Ama ii bangkua tungah Israel te ii Kumpipa Jeroboam tung ahizong, Israel te kumpipa Baasha ii tungah ahizong, ka vawt bangin vawt tu khi hi.

¹⁰Jezebel sia kiphum ngawl tu hi; a luang sia Jezreel ngamkhen sungah ui in ne tu hi,’ ” ci hi. Hi teng a ci zawkciang kamsaang moi pa pusuakin tai hi.

¹¹Jehu sia a ngalkap maang puite kungah pai kik a, amate in, “Na theampo a pha na'am? Tua a mawmawt tuak pa sia in nang tung pan bang dei ziam?” ci uh hi. Jehu in, “Ama ii dei sia he nu hi,” ci in zo hi.

¹²Amate in, “Ko he ngawl khu hi, hong son ta'n,” ci in zo uh hi. Ama in keima munah, TOPA in hi bangin taangko hi: “Nangma sia Israel te ii kumpipa tu in sathau hong noai khi hi,” ci in hong son hi.

¹³Thakhat thu in Jehu ii ngalkap maang puite in a puantual uh keallei tungah Jehu ii dinpha tu in pha uh a, lemle tumin, “Jehu sia Kumpipa hi!” ci in au uh hi.

¹⁴Tua zawkciang Jehu in Kumpipa Joram suamlup tu sawm hi, ama sia Syria Kumpipa Hazael taw Ramoth ah a kidona a liamna pan a dam kik natu in Jezreel ah om hi. Tua ahikom Jehu in ama ii ngalkap maang puite munah kei sangah nong pang uh ahile Jezreel ah mipite kidop natu son tu in Ramoth pan kuama pai ku heak vun,” ci hi.

¹⁶Tua zawkciang ama a siphu ngalleang tungah hong kaa in Jezreel zuan tu in vaiding hi. Joram sia dam kik ngawl lai hi, Judah te kumpipa Ahaziah zongh ama ve in om lai hi.

¹⁷Jezreel tausaang tung pan ngalvil vaipuak a nei sia in, Jehu le a mite hong neak sia mu hi. “Mihing pawlkhat siphu tung to in hong pai ka mu hi,” ci in au hi. Joram in, “Tual ziam maw ngal ziam siphu ngalkap khat pai in kansak vun,” ci in zo hi.

¹⁸Kamtai pa Jehu kungah pai in, ama munah, “Kumpipa in nang sia lawm khat bangin nong pai ziam ci in he nuam hi,” ci hi. Jehu in, “Tuasia nang taw bangma kisai bo, ka nung panin hong zui ta'n,” ci in zo hi. Tausaang tung a ngalvil pa in, kamtai pa sia hong paite taw kisii napi hong heak kik ngawl hi ci in thu ko hi.

¹⁹Kamtai dang khat ma paisak uh a, ama in Jehu sia a mai a pa ii dok teng ma dongh hi. Tuaciang Jehu in “Tuasia nang taw bangma kisai bo, ka nung uh pan hong zui ta'n,” ci in zo leleau hi.

²⁰Khatvei ma khuapi cing pa in, kamtaipa le hong papai pawlte kimu napi ama hong heak kik nawn ngawl hi, ci hi. Ama ii belapna ah, “Hong pai pawlte ii lampui pa in a siphu ngalleang sia mihing thin amh bang phet in nasia takin hawl hi, Jehu taw kibang hi,” ci hi.

²¹“Ka siphu ngalleang a pai tu kithoaisak vun,” ci in kumpipa Joram in thupia hi. Tuabang ma in, ama le kumpipa Ahaziah sia amate siphu ngalleang tek tung to in Jehu taw kisi tu in hong pai uh hi. Amate in Naboth ii lo sungah ama taw kisi uh hi.

²²“Lem thu taw hong pai nu ziam?” ci in Joram in dongh hi. Jehu in, “Bangbangin lem thu om thei tu ziam, Na nu Jezebel ii patsa bum le ai toaite ahizong, milim biakna ahizong, ih nei lai teng lem thu om thei ngawl tu hi,” ci hi.

²³“Ahaziah awng, hisia kilee heakna hi,” ci in Joram au a, a siphu ngalleang heak in, tai hi.

²⁴Jehu in a thal eal in a tha nei za taw a kap le Joram ii cingzaang pan kha in a lungtang sunlet a, Joram sia ama siphu ngalleang sungah pukin thi hi,

²⁵tuaciang, Jehu in ama a hu pa Bidkar munah, “A luang la in a, Naboth ii lo sungah vawk in. Nang le kei kumpipa Ahab ii nung pan siphu tung to in ih pai lai in, TOPA in Ahab huvau,

²⁶‘Zeini in Naboth le a tate a kisuamlupna ka mu hi. Tuaciang kamciam kong piakna pan, lo hisia sung mama ah nang daan hong pia tu khi hi’ ci in a pau sia na ciamtee lai ziam? Tua ahikom Joram ii luang la in, TOPA ii kamciam sia a taangtun natu in, Naboth ii lo sungah vawk in,” Jehu in ci hi.

²⁷Kumpipa Ahaziah in bang teng piang ci in mu a, a siphu ngalleang taw Beth Haggan khua sangah tai a, Jehu in del hi. “Ama zongh that vun,” ci in Jehu in a mite sawl hi, tuaciangin ama a siphu ngalleang Ibleam khua hui Gur sang lam tungah hawlto a, amate in liamsua hi. Ahihang Megiddo khuapi a thet dong a leang hawl thei a, tua mun a thet ciang thi hi.

²⁸Ama ii uliante in a luang siphu ngalleang khat taw pua in, David Khuapi sung kumpi thaan ah phum hi.

²⁹Israel te Kumpipa Ahab ii tapa Joram a maan zawk a kum sawm le khat kum in Ahaziah sia Judah te kumpipa suak hi.

³⁰Jehu sia Jezreel khua ah theng hi. Jezebel in bang thu teng piang ci in za zo a, a ma in mitkhu vom za kinoai in, a sam pot in, kumpi inn tung khelki panin lampi ensuk hi.

³¹Jehu sia khuapi kongpi sungah a tum ciangin ama in oksan a, “Nang Zimri! Nang tual that pa! Hi sungah bang hi ni ziam?” ci hi.

³²Jehu in ento a, “Akua teng kei sangah hong pang nu ziam?” ci hi. Kumpi inn sung uliante nii khawng thum khawng in khelki pan en suk hi,

³³tuaciang Jehu in, “Ama hong vawk suk tavun,” ci hi. Amate in a vawksuk uh le pangte tungah a chi kithe a, siphute tung zongh ah kithe hi. Jehu in a siphu le a leang ama ii luang tungah hawl a,

³⁴kumpi inn sungah tum hi, tuaciangin an ne hi. Tua zawkciang bekma in hi bang ci hi. “Tua a kitomlaw sa numei sia la vun a phum vun; a tatakin ci leang ama zongh kumpipa tanu khat hi,” ci hi.

³⁵Ahihang ama phum tu a pai te in a lungu le a khut ngu, a peang ngu simngawl bangma mu nawn ngawl uh hi.

³⁶Hi thu amate in Jehu munah a ko uh ciangin Jehu in, “Hi sia TOPA ii naseampa Elijah tungah a sonsa bangin a piang hi: ‘Jezreel ii ngamkhen sungah uite in Jezebel luang ne tu hi.

³⁷Ama ii pumpi sia eak bangin kithethaang tu hi, tuasia ciang kuama in ama pumpi ahi hunlam son thei ngawl tu hi,’ ci hi,” ci in son hi.