Read Siyin Chin 1 Khangtaanghthu 10 Bible Online

1 Khangtaanghthu 10 - Siyin Chin bible

1 Khangtaanghthu 10

¹Philistine mite in Israel te Gilboa mual tungah sim uh hi. Israel te tam mama tua munah kithatlum in a taanglai teng, Saul kumpipa le a tapate zongh tai uh hi.

²Ahihang Philistine te in amate delin pha a Saul ii tapate thum, Jonathan, Abinadab le Malchisua te thatlum uh hi.

³Saul ii omna kiim ah kidona nasia in, ama ngalte thaltangte in kha a, nasia takin liam hi.

⁴Ama in ama ngalhiamte a pua tangvalpa tungah, “Pathian sel Philistine te ii hong simmawk vawt ngawl natu in na namsau dokin hong that ka heu in,” ci hi. Ahihang tuabang ahi tu sia tangvalpa lau mama in seam ngam ngawl hi. Tua ahikom Saul in ama namsau la in a namsau tungah kisepsuk in thi hi.

⁵Tangvalpa in Saul ii thi a mu ciang ama zongh a namsau tungah kisepsuk in thi hi.

⁶Tuabangin Saul le a tapate thum sia mun khat ah thi khawm siatin, a suan a paalte kuama in ngam uk ngei nawn ngawl hi.

⁷Jezreel Kuam ah a teang Israel mite in ngalkaphonpi a taimang le Saul le a tapate a thi a zaak uh ciangin a khuate nusia in taimang uh hi. Tuasia ciang Philistine te pai in a khuate suan uh hi.

⁸Ngal kisim khuavak ni in a thite ii vanh la tu in a pai Philistine te in Saul le a tapate ii luang Gilboa mual tungah mu uh hi.

⁹Amate in Saul lu tan in a ngaldalna suutsak a, Philistia ngam bup ah a mite le a milimte tungah hi lungdamna thu ko tu in kamtaite paisak uh hi.

¹⁰Amate in a biakinnte khat ii sungah Saul ii ngalhiamte koi a, a lutang sia Dagon pathian biakinn sungah khai uh hi.

¹¹Gilead ngam Jebesh mite in Philistine te ii Saul tungah a vawtna thu a zaak uh ciangin,

¹²ngalhang belte va pai a, Saul le a tapate ii luangte la in Jabesh khua ah ciapui uh hi. Amate in oak thingkung khat ii nuai ah a luangte phumin ni sali sung an tang uh hi.

¹³TOPA tungah a thumaan ngawl hangin Saul thi hi. Ama in TOPA thupiakte zui ngawl hi; ama in lamlakna a zonna in mithite thaate tungah thudok tu hanciam a,

¹⁴TOPA tungah thu dongh ngawl zaw hi. Tua ahikom TOPA in ama thatin Jesse ii tapa David tungah ngamukna za pia hi.