Read Siyin Chin 1 Khangtaanghthu 12 Bible Online

1 Khangtaanghthu 12 - Siyin Chin bible

1 Khangtaanghthu 12

¹Saul kumpipa khut sung pan suakta tu in a tai na, Ziklag ah David teang hi. Tualai ah ama sia ngalsim ngeisa, a muanhuai ngalkapte,

²Saul pianna Benjamin namte in pawm uh hi. Amate in a khut ziatsang zongh, a veisang zongh taw thal le saili kap khawm thei uh hi.

³Amate sia Gibeah pan Shemaah ii tapate ahi Ahiezer le Joash te ii ukna nuai ah om uh hi. Hite sia a ngalkapte ahi uh hi: Azmaveth ii tapate Jeziel le Pelet, Anathoth pan Beracah le Jehu Ngalkap minthang khat le, “Sawmthum” sungah lampui khat ahi Gibeon pan Ishmaiah Gederah pan Jeremiah, Jahaziel, Johannan le Jozabad Hariph pan Eluzai, Jerimoth, Bealiah, Shemariah, le Shephatiah Korah bee le phung pan Elkanah, Isshiah, Azarel, Joezer, le Jashobeam Gedor pan Jeroham ii tapate Joelah le Zebadiah te hi.

⁸Hite sia David ii sennealngam kulh ah a om laitakin ama ngalkapte a pawm Gad nam sung panin ngalkap minthang le ngal sim ngeite ii minte ahi hi. Amate lum le tei zak thiamin, tawpi bangin kiitakhuai a, mualtung sathak bangin a tai ngang hi.

⁹Amate a za letna zui in a nuai a bang hi a: Ezer, Obadiah, Eliab, Mishmannah, Jeremiah, Attai, Eliel, Johanan, Elzabad, Jeremiah, le Machbannai te ahi hi.

¹⁴Hi Gad nam pan pawlkhat ngalkap tulkhat uk ngalkapmang liante hi a, a dangte sia ngalkap zakhat uk ngalkapmang nozawte ahi hi.

¹⁵Kum khat ii tha masabel hun Jordan nguntui pawmin a vaalbo ah tui a let lai in amate in ngun kaantan a ngun ii nisuana sang le nitumna sang kuamte ah a teang mite kithethaangsak uh hi.

¹⁶Khatvei lai in Benjamin le Judah namte sung pan pasal honkhat David omna kulh ah pai uh hi.

¹⁷David in amate muakin, “Keima hu tu ka lawm te bangin hong pai na hi uh le hong muak khi hi. Ih kipawl tu hi! Ahihang ka ngalte kungah nong zuak tu uh le keima in hong nasak ngawl tu ka hi hang, ih taanghpupite ii Pathian in he tu a, note daan hong pia tu hi,” ci hi.

¹⁸Khatvei ciangin “Sawmthum” te lampui a suakpa, amate sung pan khat ahi Amasai sia Pathian thaa in uk a, ama in, “Jesse ii tapa David awng, kote sia nangma mi ka hi uh hi! Nang tung le nangma hong hute tungah zawna om tahen! Nang sang ah Pathian om hi,” ci in a nging in au hi. David in amate phatvawt in, a ngalkap bute suaksak hi.

¹⁹David le Philistine mite ii Saul kumpipa do tu in a kuan lai in Manasseh nam sung pan ngalkap pawlkhat David ii sangah tai uh hi. A tatakin ama in Philistine te hu ngawl hi, banghang ziam cile Philistine kumpite in ama ii a topa masa ahi Saul tungah amate a zuak tu a lau hu in Ziklag ah heak kiksak hi.

²⁰Hite sia Ziklag ah David a heak kik lai in David sang a tai Manasseh nam sung pan ngalkapte hi a: Adnah, Jozabad, Jediael, Michael, Jozabad, Elihu, le Zillethai te ahi hi. Manasseh nam sungah amate theampo sia mi tulkhat ukte veu ahi hi.

²¹Amate a vekpi ngalkap thiamte veu ahi uh komin David ii ngalkap bute veu suak uh hi. A khak sang ciangin amate sia Israel ngalkap bute veu suak hi.

²²Ni sim phialin David ngalkapte sungah mithak tum ahikom hai ngawlin ama ngalkaphonpi sia lian mama hi.

²³TOPA kamciamsa bangin Hebron ah David a om lai in, Saul taangin ama kumpi a sua natu in a hu, ngalsim a sinsa ngalkap tam mama in ama ii ngalkaphonpi sia pawm uh hi. A mi phaza a nuai a bang hi: Judah: ngalvanh kicing taw lum le tei toai pasal 6,800; Simeon: ngalkap thiam sa pasal 7,100; Levi: pasal 4,600; Aaron suan Jehoiada ii nungzuite pasal 3,700; Ngalsim thei khangno khat ahi Zadok ii mealheakte: lampui pasal 22; Benjamin (Saul ii nam): pasal 3,000 (Benjamin mite a tamzaw sia Saul tungah thumaan top uh hi); Ephraim: amate bee le phungte sungah a minthang pasal 20,800; Nitumna sang Manasseh panin: David kumpi a suaksak tu in, a kiteal pasal 18,000: Issachar: amate ukna nuai ah om mite taw a kingawm lampui 200, (hi lampuite in Israel te ii a vawt tu sia le a vawt tu a phabel hun a he uh hi); Zebulun: ngalsim tu a kinging, ngalhiam theampo a zangh thei, a thumaan le a muanhuai pasal 50,000; Naphtali: lampuite 1,000 le lum le tei toai pasal 37,000; (...)

³⁸Ngal sim tu in a kithoai hi ngalkapte theampo in Israel ngam theampo atu David sia kumpi suaksak tu in khensat a, Hebron ah pai uh hi. A taanglai Israel mi theampo in tuabang ma tupna nei uh hi.

³⁹A ngammipuite ii a vaihawmsak sa an le tuite David taw ni thum sung tualai ah nekhawm dawn khawmin om uh hi.

⁴⁰Saksang namte ahi Issachar, Zebulun, le Naphtali pan mite dong ngawngawn in laa, kalaoh, siphu le khuitalte taw neak thei — anvui, thei, sapitngawm, sapittui le olive thaute a khopteak hong paipui uh hi. Amate in ngaw tu le neak tu in khui le tuu zongh paipui uh hi. Hi teng theampo sia a ngam bup ii lungdamna a lakna ahi hi.