Read Siyin Chin 1 Khangtaanghthu 13 Bible Online

1 Khangtaanghthu 13 - Siyin Chin bible

1 Khangtaanghthu 13

¹David kumpipa sia mi tulkhat ukte le zakhat uk ngalkapmangte theampo taw thu kikum uh hi.

²Tuaciang Israel mite theampo tungah ama in, “Note lungkim in, TOPA ih Pathian ii deina a om le ih ngammi om lai te, thiampite le a khua ah a om Levi te kungah kamtaite paisak in, eima taw hi sungah hong kikhawm tek tu in vaitha tawng.

³Tua zawkciang eite pai in, Saul ii kumpi a sep lai a, a ki awlmawk ngawl Pathian ii Thuciamna Thingkuang sia ih la tu hi,” ci in taangko hi.

⁴Mipite sia tua ngaisutna thukim in lungdam uh hi.

⁵Tua hi a, David in Israel ngamsung theampo, thangsang Egypt ngamngi pan saksang Hamath Mualciangh dong ah a teang Israel mite Kiriath Jearim pan Jerusalem khuapi ah Thuciamna Thingkuang paipui tu in kikhawmsak hi.

⁶David le mipite sia Judah ngam Kiriath Jearim ahi Baalah khuapi ah Cherubim tungah a tosak TOPA min a pua Pathian ii Thuciamna Thingkuang la tu in pai uh hi.

⁷Amate in Abinadab inn pan Thuciamna Thingkuang pusua in khuileang thak khat tungah suan uh hi. Uzzah le Ahio in khuileang hawlin,

⁸David le Israel mite theampo Pathian patoai in a tha neiza taw laam uh hi. Amate lasa in, tengtongh, khuang, daalkopsai le lemle te tum uh hi.

⁹Amate Chidon kici ancilna mun a thet laitakin khuitalte liik a, tuaciang Uzzah in a khut zanin Thuciamna Thingkuang zamh a len hi.

¹⁰Thakhatin Uzzah tungah TOPA thin uuk a, tua thingkuang a tham hu in thatlum paih hi. Ama tua mun Pathian mai ah thi a,

¹¹tuasia hu in, tua mun sia tua hun pan kipan Perez Uzzah kici hi. Uzzah tungah TOPA thin uuk in daan a piak hu in David a thinso hi.

¹²Tuasia ciang David in Pathian kiita in, “Hi Thuciamna Thingkuang tu in koi bangin paipui thei tu khi ziam?” ci hi.

¹³Tua ahikom David in Thuciamna Thingkuang sia Jerusalem ah tonpui ngawl hi. Gath khuapi mi Obed Edom kici pa inn ah nusia zaw hi.

¹⁴Tua munah Thuciamna Thingkuang tha thum sung om a, TOPA in Obed Edom innkuan le a neisa theampo thupha pia hi.