Read Siyin Chin 1 Khangtaanghthu 14 Bible Online

1 Khangtaanghthu 14 - Siyin Chin bible

1 Khangtaanghthu 14

¹Tyre kumpipa Hiram in David kungah sumlei sumzuak vai thu son tu palai paisak a; kumpi inn a sak natu in Cedar thingluangte, a sa tu in suangciangte le lettamate taw puak hi.

²Tuasia ciang TOPA in ama Israel kumpi in kipsak zo a, ama mite atu in a kumpi ngam khangtosak ahi hunlam David in phawk hi.

³Jerusalem ah David in zi tam ma nei thua in, tanu tapa tam ma toai thua hi.

⁴Jerusalem pan a nei tate, a nuai a bang hi a: Shammua, Shobab, Nathan, Solomon,

⁵Ibhar, Elishua, Elpelet,

⁶Nogah, Nepheg, Japhia,

⁷Elishama, Beeliada, le Eliphelet te ahi hi.

⁸Tu in David sia Israel ngam bup kumpipa kisuaksak zo ci in Philistine te in a zaak uh ciang a man tu in a ngalkaphonpi paisak hi. Tua ahiciang David in amate sim tu in kuan hi.

⁹Philistine te Rephaim Kuam theng a, vanh suttol tu kipan uh hi.

¹⁰David in Pathian tungah, “Philistine te ka sim tu ziam? Ngalzawna nong pia tu ziam?” ci in dongh hi. TOPA in, “Hi hi, sim in! Zawna kong pia tu hi!” ci in zo hi.

¹¹Tuasia ciang David in amate Baal Perazim ah simin zo hi. Ama in, “Tuikhang bangin ngalte ngalkaphonpi a phul let tu in Pathian in keima hong zangh hi,” ci hi. Tua hu in tua mun sia Baal Perazim kici hi.

¹²Philistine te a taikeak ciang a milimte nusia a, David in tua milimte hal tu in thupia hi.

¹³Hai ngawlin Philistine te tua kuam ah heak kikin vanh suttol tu in kipan kik uh hi.

¹⁴Khatvei ma David in dongh kik a, Pathian in, “Hi sung pan sim heak in a, kiimveal in, a langkhat sang balsam thingkungte nai pan sim tu in kithoai in.

¹⁵Thingkung dawnte tungah kalsuan nging na zaak uh ciang, sim vun, banghang ziam cile Philistine ngalkaphonpi zaw natu in na mai ah ka pai tu hi,” ci in zo hi.

¹⁶David in Pathian thupiak bangin seam ahikom Philistine te Gibeon pan Gezer dongin not kik hi.

¹⁷David ii minthanna mun theampo ah kizel a, TOPA in minam theampo in ama kiitasak hi.