Read Siyin Chin 1 Khangtaanghthu 16 Bible Online

1 Khangtaanghthu 16 - Siyin Chin bible

1 Khangtaanghthu 16

¹Amate in Thuciamna Thingkuang a koi natu in David ii a saksa puanbuk sungah tua in koi uh hi. Tua zawkciang amate in Pathian tungah sangaw biakpiaknate le kipawlkhop biakpiaknate pia uh hi.

²David in sangaw biakpiaknate a man zawkciang TOPA min taw mipite thupha pia in,

³an zongh a vekpi in hawmsak hi. Ama in Israel mite theampo pasal, numei khat sim anluum khat tek, sa em bek khat tek le sapitngawm tawm tek pia hi.

⁴David in Thuciamna Thingkuang mai ah lasakna le ama pokna taw TOPA Israel te ii Pathian biakna ah lampui tu in Levi mite pawlkhat panmun pia hi.

⁵Asaph sia lampui in koi a, a hupa tu in Zechariah koi hi. Jeiel, Shemiramoth, Jehiel, Mattithiah, Eliab, Benaiah, Obed Edom le Jeiel te sia tengtongh tum tu in koi hi. Asaph sia daalkopsai tum tu pa hi a,

⁶thiampi nii ahi Benaiah le Jahaziel sia Thuciamna Thingkuang mai ah a huhun in lemle a tum tu te ahi hi.

⁷Tua hunin David in Asaph le a Levi mipuite TOPA tungah pokna late sa tu in nasep pia masa hi.

⁸TOPA tungah lungdamko vun, ama ii letna thangsak vun; ama ii sepsate minamte tungah son vun.

⁹TOPA tungah pokna lasa vun; a lamdang a nasep sate son vun.

¹⁰Ama aa ih hi sia lungdam vun; ama a biate theampo lungdam thinnuam tahen!

¹¹Huna ngen tu in TOPA zuan vun; tatsat ngawlin ama bia vun.

¹²No Pathian ii naseampa Jacob ii suan le paalte, Pathian ii teal Israel ii suan le paalte awng, Pathian ii nalamdang laknate le a thukhennate phawk vun.

¹⁴TOPA sia ih Pathian hi; a thupiakte sia leitung bup atu hi.

¹⁵A tawntung a kip tu a vawt Pathian ii thuciamna

¹⁶Abraham taw a vawt thuciamna, Isaac tungah a kamciamna mangil ngei heak vun.

¹⁷TOPA in Jacob taw thuciamna khat vawt a, a tawntung a kip tu khat ahi hi.

¹⁸Ama in, “Canaan ngam nang kong pia tu a, nangma aituam neisa tu hi,” ci hi.

¹⁹Pathian ii mite tawm a, Canaan ngam ah khualmi suak uh hi.

²⁰Amate ngam khat pan ngam khat, kumpi ngam khat pan kumpi ngam khat ah vak kawkoai uh hi.

²¹Ahizong Pathian in amate kuama in nengcipsak ngawl hi; amate a dal tu in Pathian in kumpite hi bangin thupia hi:

²²“Ka tealsa ka naseamte bangma law heak vun; ka kamsaangte thutha heak vun.”

²³Leitung bup awng, TOPA tungah lasa vun! ama ii eite hong ngupna lungdamna thuphate ni simin thangsak vun.

²⁴Minamte tungah a minthanna thangsak vun, mite theampo tungah a nasep liante thangsak vun.

²⁵TOPA sia lian a, nasia tak pok tu ahi hi; ama sia pathiante theampo sangin patoai zawk tu ahi hi.

²⁶A dang minam theampote ii pathiante sia milim bekma hi a, ahihang TOPA in vantungte bitphua hi.

²⁷Minthanna le vaangneina in ama kiim uumin, a Biakinnpi vaangletna le lungdamna taw kidim hi.

²⁸Leitung mi theampo awng TOPA pok vun, a minthanna le a thahatna pok vun.

²⁹TOPA ii minthanna pok vun; biakpiakna khat kengin a Biakinnpi sungah pai vun. Tua Thiangtho Pa a kilangh ciangin a mai ah kun vun;

³⁰leitung mi theampo awng a mai ah liingin om vun! Leitung sia a kip a kho in kikoi a, kikhiin thei ngawl hi.

³¹Van le lei awng lungdam vun! TOPA sia kumpipa hi ci in minamte son vun.

³²Tuipi awng, na sungah a om nganhingte theampo taw hawk vun; lote awng, na sungah a om theampo taw lungdam vun!

³³Leitung uk tu in TOPA hong pai ciang, thingtaam sung a om thingkungte lungdam in au tu hi.

³⁴TOPA tungah lungdamko vun, banghang ziam cile ama pha hi; ama ii itna in mong nei ngawl hi.

³⁵Ama tungah, “Kote ii Ngumpa Pathian awng, ko hong ngum ta'n; kote hong khawmtua ta'n; lungdam takin na min thiangtho kong pok thei natu in minamte khut sung pan hong suatak ta'n,” ci vun.

³⁶Israel te ii Pathian TOPA pok vun! Tu le a tawntungin ama pok vun! Tuasia ciang mi theampo in, “Amen,” ci in TOPA pok uh hi.

³⁷David kumpipa in Asaph le a Levi mipuite Thuciamna Thingkuang a kikepna munah a kivawt biakpiakna sungah a uk tawntung tu in koi hi. Amate in ni khat zawk ni khat amate nasep tek tua munah seam tu uh hi.

³⁸Amate sia Jeduthun ii tapa Obed Edom le ama bee le phung pan pasal 68 te in hu tu hi. Hosah le Obed Edom te sia kongcing ukte ahi hi.

³⁹Ahizong thiampi Zadok le a thiampi seppuite sia Gibeon ah a om TOPA biakpiakna munah a ukte ahi uh hi.

⁴⁰TOPA in Israel te tungah a piak thukham sungah a ki at bangin amate in zing sim, nitak sim sangaw biakpiaknate biaknatau tungah a pum bup halin pia tu uh hi.

⁴¹A mong nei ngawl TOPA hong itna pokna la TOPA tungah sa tu in Heman le Jeduthun te le a kitealtuam dangte zongh amate taw tua munah omkhawm uh hi.

⁴²Pokna late a sak uh ciang a tum uh lemle, daalkopsai te le a dang tumthei vanhte Heman le Jeduthun zongh in uksak hi. Jeduthun ii bee le phungte sia kongcing ukte ahi hi.

⁴³Tua zawkciang a kuama po a inn ah cia tek in, David zongh a innkuanpuite taw hun khat zangh khawm tu in cia hi.