Read Siyin Chin 1 Khangtaanghthu 17 Bible Online

1 Khangtaanghthu 17 - Siyin Chin bible

1 Khangtaanghthu 17

¹Tu in David kumpipa sia a kumpi inn ah teang hi. Ni khat ni in David in kamsaangpa Nathan samin ama tungah, “Kei hi sung cedar thing taw a kisa inn sungah teang khi hi, ahihang TOPA ii Thuciamna Thingkuang sia puanbuk sungah kikeam hi!” ci hi.

²Nathan in, “Na thinsung a om babangin seam in, banghang ziam cile Pathian nang taw omkhawm hi,” ci in zo hi.

³Ahizong tua zanin Pathian in Nathan tungah,

⁴“Ka naseampa David kungah va pai ta'n a, ka ci teng son in, ‘Ka teen natu biakinn khat a sa tu sia nang na hi bua hi.

⁵Israel mite Egypt ngam pan ka suatak ni pan kipan tu dong biakinn khat sungah ka teang ngei bua hi; puanbukte sungah teang tawntung in, mun khat pan mun khat ah ka kikhiin hi.

⁶Israel mite taw ka khualhawna theampo ah a lampui in ka koite khat pawpo ii tungah banghangin kei atu cedar thing taw biakinn hong saksak ngawl nu ziam ci in ka dongh ngei bua hi,’ ci hi.

⁷“Tua ahiciangin ka naseampa David tungah keima Vaanglianbelpa TOPA in hi bangin ka ci sia va son ta'n, ‘Lo sung na tuu cinna panin nangma kong la a, ka Israel mite ukpa kong suaksak hi.

⁸Na paina theampo ah kong ompui a, na mai ah na ngal theampo kong zawsak hi. Leitung ah lampui lianbelte bangin na min kong thangsak tu hi.

⁹Israel ka mite atu in mun khat ka tealsak a, tua munah ka teangsak zo hi, amate tua munah kuama in nengcip nawn ngawl tu hi. Amate hi ngam a thet ni pan kipan a ngoltol mite in sim bul uh hi, ahizong tuabang piang kik nawn ngawl tu hi. Na ngalte theampo na zaw natu uh le suan le paalte na nei natu uh in kong kamciam hi.

¹¹Na thi ciang le na taanghpupite taw hong kiphum khop ciangin na tapate sung pan khat, kumpi ka suaksak tu a, a kumpi ngam thahat paisuaksak tu khi hi.

¹²Ama sia keima atu in biakinn a sa pa hi tu a, a kumpi khangngui ka kizom suaksak tu hi.

¹³Keima in a pa ka hi tu a, ama sia ka ta hi tu hi. Nangma kumpi na sua thei natu in Saul ka hepkeak bangin ama ka khuangkhosakna ka dok kik buatu hi.

¹⁴Ka mite le ka kumpi ngam a tawntungin ka uksak tu hi. Ama kumpi khangngui sia a bo ngei buatu hi,’ ” a ci hi.

¹⁵Pathian ii ama tung a, a pualaak thu theampo Nathan in David tungah son hi.

¹⁶Tuaciang David kumpipa sia TOPA ompuina Puanbuk sungah pai a, to in thungen hi, “TOPA Pathian awng, kei tung ahizong ka innkuanpuite tung ahizong nong septe ka kiphu ka kilawm bua hi.

¹⁷Tua hi napi tu in a tamzaw lai in nong seam hi; mai sangah ka suan ka paalte atu dong kamciamte nong pia zo hi, TOPA Pathian awng, nangma in kei mi lian khat bangin nong thupi vawt zo hi.

¹⁸Bangdang hong ci thei lai tu khi ziam! Na naseampa kei nong he mama a, ahihang nong upat lalai hi.

¹⁹Hi bangin nong hina sia kei atu in na deina le na tupna om a, mai sangah ka let natu nong lakna hi.

²⁰TOPA awng nang taw a kibang kuama om ngawl hi; nangma bek Pathian na hi hunlam kong he tawntung zo uh hi.

²¹Nangma aituam mite hong suak tu in sila pan na suatak Israel mite taw a kibang leitung ah minam dang om ngawl hi. Amate tungah a lamdang na liante na vawtna taw leitung bup ah na minthanna kizel hi. Egypt panin na mite suatak a, amate mailam a nawk ciang minam dangte na notkeak hi.

²²Israel mite a tawntungin nangma mi tu in na vawt zo a, nangma TOPA in amate ii Pathian na suak zo hi.

²³“Tuaciang tu in, TOPA awng, kei le ka suan ka paalte nong piak kamciamna sia a tawntung atu in hong taangtungsak ta'n a, ka seam tu na ci te seam in.

²⁴Na minthanna sia lian tu a, mite in a tawntungin, ‘TOPA Vaanglianbelpa sia Israel ii Pathian hi,’ ci tu uh hi. Tuaciang nangma in ka kumpi khangngui sia hun theampo ah nong kepsak tu hi.

²⁵Nang tungah hi thungetna hang takin kong ngen ngam hi, banghang ziam cile, nangma in kei na naseampa tungah hi teng nong pualaak zo a, ka suan ka paalte kumpi na suasak tu nong son zo hi.

²⁶TOPA awng, nang Pathian na hi a, hi a lamdang kamciamna nong pia zo hi.

²⁷Na maipha a nga tawntung tu in ka suan le ka paalte thupha nong piaksak natu in kong ngen hi. TOPA awng, nangma in amate thupha na pia zo a, na piak thupha a tawntungin kip tu hi,” ci hi.