Read Siyin Chin 1 Khangtaanghthu 19 Bible Online

1 Khangtaanghthu 19 - Siyin Chin bible

1 Khangtaanghthu 19

¹Tawmvei zawkciang Ammon kumpipa Nahash thi in, a tapa Hanun kumpi suak hi.

²David kumpipa in, “A pa Nahash in kei tungah thumaan kilawmtatna hong nei bangin Hanun tungah ka vawt kik tu hi,” ci hi. Tua hi a David in a khuangaipuina thu lak tu in kamtaite paisak hi. Amate Ammon ngam thengin Hanun kumpipa kungah a pai uh ciang

³Ammon lampuite in kumpipa tungah, “Nang khuangai puina hong lak tu in, David in hi kamtaite hong paisak sia na pa a zatak hang hi tu in na um ziam? Hi ngawl het hi! Ama in hong zawthal thei natu in ngamsung en kawkoai tu in ngalvilte hi sungah hong paisak hi,” ci uh hi.

⁴David ii kamtaite Hanun in manin, a khamul meetsakin a puante a ngoaibul ciang a tansak zawkciang tha kik hi.

⁵Amate inn a zot tu a maizum mama uh hi. Tua thu David in a zaak ciang, amate a khamul sau kik dong cia ngawlin Jericho ah a taam natu in kam vaitha hi.

⁶Amate in David sia a ngal a suasak hunlam Hanun kumpipa le Ammon te in a tel uh ciang Mesopotamia tungnung le Syria ngam Maacah le Zobah te pan siphu ngalleangte le siphu ngalleang ukte cial natu in ngunn kilogramme 34,000 pia uh hi.

⁷A cial siphu ngalleang 32,000 te le Maacah kumpipa ngalkaphonpi pai in Medeba khua hui ah ngiaphual saat uh hi. Ammon mite zongh a khuapi theampo pan pai tekin ngalsim tu in kinging uh hi.

⁸Tua thu David in a zaak ciang Joab le a ngalkaphonpi bup paisak hi.

⁹Ammon mite hong kuanin amate khuapi ahi Rabbah khua suazoai ah panmun la in amate hu tu in hong pai kumpite in ngam taanzauna ah panmun la uh hi.

¹⁰Joab in a ngalte in maisang le nungsang panin hong sim nuam hi ci a mu ciang Israel ngalkap phabel teng tealin Syria te maingat in panmun lasak hi.

¹¹Ama in a ngalkap om lai teng a suapuipa Abishai lampuisak a Ammon te maingat in panmun lasak hi.

¹²Joab in ama tungah, “Syria te in kei hong zaw nong mu le hong pai in hong hu ta'n a, Ammon te in nang hong zo le pai in kong hu tu hi.

¹³Thahat in a, hang in! Ih mipuite atu le ih Pathian ii khuapite atu in nasia takin ngal ih do tu hi. TOPA deina bang hi tahen,” ci hi.

¹⁴Joab le a mite in sim tu in a manaw uh ciang Syria te taimang uh hi.

¹⁵Ammon te in Syria te a taimang a mu uh ciang amate zongh Abishai kung pan tai in khuapi sungah nungkin uh hi. Tua zawkciang Joab Jerusalem ah cia kik hi.

¹⁶Israel te ii zaw hunlam Syria te in a heak uh ciang Euphrates ngun nisuana sang Syria ngamte pan ngalkapte keng in, Zobah ngam uk Hadadezer kumpipa ii ngalkaphonpi a uk Shobach khutnuai ah koi hi.

¹⁷Tua thu David in a zaak ciang Israel ngalkapte khawmtua a, Jordan ngun kaanin Syria ngalkapte maingat in panmun la uh hi. A kisim uh ciangin,

¹⁸Israel te in Syria ngalkaphonpi not kik uh hi. David le a mite in Syria siphu ngalleang hawlte 7,000 le lei ngalkap 40,000 that uh hi. Amate in Syria ngalkapmang Shobach zongh that uh hi.

¹⁹Hadadezer kumpipa khutnuai a om kumpite in Israel ii amate a zaw hunlam a heak uh ciang David taw kilemna vawt in, David khutnuai mi suak uh hi. Syria te in Ammon mite hu kik nuam ngeingawl uh hi.