Read Siyin Chin 1 Khangtaanghthu 21 Bible Online

1 Khangtaanghthu 21 - Siyin Chin bible

1 Khangtaanghthu 21

¹Satan in Israel mite tungah ngimna thengsak nuam ahikom ama in David sia mi simna vawt tu in khensatsak hi.

²David in Joab le a ngalkapmang dangte tungah, “Israel ngam mong khat pan mong khat dong pai in mi phaza sim vun. Mihing bangza pha ziam he nuam khi hi,” ci hi.

³Joab in, “TOPA in Israel mite tu a zaa sangin a see zakhat in pungsak zaw tahen! Kumpipa awng, amate theampo nangma naseamte hi. Banghangin na minam bup mawpu tu in hi mi simna vawt nuam ni ziam?,” ci in zo hi.

⁴Ahihang kumpipa in Joab sia tua thupiakna nisak hi. Joab pai in Israel ngamsung buppi khualhaw a, tua zawkciang Jerusalem ah heak kik hi.

⁵Ama in David kumpipa tungah ngalkap seam thei pasal avekpi: Israel ah 1,100,000 le Judah ah 470,000 om hi ci in son hi.

⁶Joab in kumpipa ii thupiak lungkim ngawl ahiciang Levi le Benjamin namte ii mi simna vawt ngawl hi.

⁷Hi bang a kisepna sia Pathian lungkim ngawl ahiciang Israel te daan pia hi.

⁸David in Pathian tungah, “Hi bangin ka ngamtatna taw mawna a lauhuai mama khat vawt zo khi hi! Nong hesuakna in hong maisak ta'n. A mawmawthuai in ngamta zo khi hi,” ci hi.

⁹Tuaciang TOPA in David ii kamsaangpa Gad tungah,

¹⁰“Va pai ta'n a, a teal tu in thu nam thum ka piak sia David tungah son ta'n. A teal bang pawpo vawt tu khi hi,” ci hi.

¹¹Gad sia David kungah pai in TOPA ii ci teng son a, “Koi sia na teal tu ziam?

¹²Kum thum sung kial tung tu maw? Ahibuale tha thum sung na ngalte ii ngalkaphonpite mai pan tai tu maw? Ahibuale TOPA in a namsau taw nang ni thum sung hong simin a vantunglalang zanghin Israel ngamsung theampo ah a kilaw thei natna hong puak a, thina hong tungsak tu maw? TOPA tungah na zo na koisia son tu khi ziam?” ci in dongh hi.

¹³David in Gad tungah, “Ka ci ka law he ngawl khi hi! Ahihang mihingte ii daan hong piak tu ka nuam bua hi. Kei daan hong pia tu sia TOPA ama ma hi tahen, banghang ziam cile ama hesuakna thin nei hi,” ci in zo kik hi.

¹⁴Tua ahikom TOPA in Israel mite tungah a kilaw thei natna tungsakin amate sung pan 70,000 thi hi.

¹⁵TOPA in Jerusalem susia tu in vantunglalang khat paisak a, ahihang a thin kheal kikin vantunglalang tungah, “Tawlnga in! Tu a za pha zo hi!” ci hi. Vantunglalang sia Jebus mi Araunah ii ancilna hui ah ding nginge hi.

¹⁶Jerusalem susia tu in a kithoai, a khut sungah namsau a toai vantunglalang sia vui sungah a ding David in mu hi. Tuaciang David le Israel lampuite — a vekpi khau-ip puan silh siatin — a mai lei pha dongin kunsuk uh hi.

¹⁷David in, “Pathian awng, a khial sia keima khi hi. Misim natu thu a pia sia keima khi hi. Hi mizawngte in bang vawt nei na ziam? TOPA ka Pathian awng, keima le ka innkuanpuite daan hong pia ta'n a, na mite khoaikhe in,” ci in thungen hi.

¹⁸TOPA vantunglalang in Gad tungah, TOPA atu in Araunah ii ancilna munah, David paisak in biaknatau khat a sak natu thupia in.

¹⁹Gad ii son bangma TOPA thupiak mang in David pai hi.

²⁰Ancilna munah Araunah le a tapa li teng zungtaang cil in a om laitak hi a, vantunglalang a mu ciang a tapate tai in buu uh hi.

²¹Araunah in David kumpipa ama sang zuanin hong pai a mu poma ciang a ancilna mun nusia in a mai lei a phak dongin kun hi.

²²David in ama tungah, “Natna kilaw thei sia a theau natu TOPA atu biaknatau khat ka sak thei natu na ancilna mun hong zuak ta'n. Tua ahibuale a kilaw thei pulnatna thai ngawl tu hi. A man sia a cing in nangma hong pia tu khi hi,” ci hi.

²³Araunah in, “Kumpipa awng, tuasia la in a, na dei bang po in zangh in. Biaknatau tungah biakpiakna in a hal tu khuitalte hi sungah om hi; thingthu tu in ancilna ah a kidaw suatte om a, biakpiak natu in zungtaangte om hi. A vekpi in nang kong pia hi,” ci hi.

²⁴Ahizong kumpipa in, “Hi ngawl hi, a man a cingin hong pia tu khi hi. TOPA biakpiakna in nangma neisa khat pawpo zangh ngawl tu khi hi, a man ka piak ngawl khat peuma hi ngawl tu hi,” ci in zo hi.

²⁵Tuaciang ama in ancilna mun atu in khamh dangkatang 600 Araunah tungah pia hi.

²⁶Ama in tua munah TOPA atu in biaknatau khat sa in meihal biakpiakna le kipawlkhop biakpiakna pia hi. Ama in thungen a, TOPA in a thungetna saang ahikom biaknatau tungah biakpiaknate a kaanghsak tu in vantung pan meikuang khiaksuk hi.

²⁷TOPA in a vantunglalang tungah a namsau sot kikin sawl ahikom vantunglalang in a thu ni hi.

²⁸Tua thu David in a mu ciang TOPA in ka thungetna hong saang hi ci in tel ahikom ama in Araunah ii ancilna mun biaknatau tungah sangaw biakpiakna pia hi.

²⁹Moses ii duisung ngampa sungah a sak TOPA ompuina Puanbuk le sangaw biakpiaknate a halna biaknatau te sia tua a biakna mun Gibeon ah tu hun zong om lai hi;

³⁰ahihang David sia TOPA bia tu in tua munah pai thei ngawl hi, banghang ziam cile TOPA vantunglalang ii namsau kiita hi.