Read Siyin Chin 1 Khangtaanghthu 23 Bible Online

1 Khangtaanghthu 23 - Siyin Chin bible

1 Khangtaanghthu 23

¹David a huai mama ciang ama in a tapa Solomon Israel kumpi suaksak hi.

²David kumpipa in Israel lampuite theampo le thiampite le Levi te theampo kaikhawm hi.

³Ama in Levi mi pasal kum 30 le a tungsia theampo mi simna vawt hi. A vekpi in 38,000 pha hi.

⁴Kumpipa in 24,000 sia Biakinnpi nasep uk tu in koi a, 6,000 sia thu tepteena laibu keam tu le thukhen tu in koi hi,

⁵4,000 in kongkha cingsak a, a dang 4,000 in kumpipa ii TOPA pok natu a piak music vanhte zangh uh hi.

⁶David in Levi te sia amate bee le phung zui in pawl thum in khen a: Gershon, Kohath, le Merarite ahi hi.

⁷Gershon in tapa nii nei a: Ladan le Shimei te hi.

⁸Ladan in tapa thum nei a: Jehiel, Zetham le Joel te hi a,

⁹Ladan ii suan bee le phung lampuite veu hi. (Shimei in tapa thum nei a: Shelomoth, Haziel, le Haran te hi.)

¹⁰Shimei in tapa li nei a: a piankum zui in Jahath, Zina, Jeush, le Beriah te hi. Jeush le Beriah in suan le paal tam nei ngawl ahikom amate sia bee le phung khat in kisim hi.

¹²Kohath in tapa li nei a: Amram, Izhar, Hebron, le Uzziel te hi.

¹³A tapa lianbel Amram sia Aaron le Moses ii pa hi. (Aaron le ama suan le paalte sia biakna vanh thiangthote a keam tawntung tu, TOPA a biak uh ciang paaknamtui hal tu, ama naseam tu le ama min taw mite thupha pia tu in kikoituam hi.

¹⁴Ahizong Pathian mihing Moses ii tapate sia Levi te sungah kihel hi.)

¹⁵Moses in tapa nii nei a, Gershom le Eliezer te hi.

¹⁶Gershon ii tapate sungah a lampuipa sia Shebuel hi.

¹⁷Eliezer in tapa Rehabiah bek nei a, ahizong Rehabiah in suan le paal tam mama nei hi.

¹⁸Kohath ii tapa niina, Izhar in tapa khat Shelomith nei a, bee le phung lutang hi.

¹⁹Kohath ii tapa thumna, Hebron in tapa li nei a: Jeriah, Amariah, Jahaziel, le Jekameam te hi.

²⁰Kohath ii tapa lina, Uzziel in tapa nii nei a, Micah le Isshiah te ahi hi.

²¹Merari in tapa nii nei a, Mahli le Mushi te hi. Mahli zongh in tapa nii nei a, Eleazar le Kish te hi,

²²ahizong Eleazar sia tanu bek nei a, tapa nei ngawlin thi hi. A tanute in a suapui sealhte ahi Kish ii tapate teenpui hi.

²³Merari ii tapa niina, Mushi in tapa thum nei a: Mahli, Eder, le Jeremoth te hi.

²⁴Hite sia Levi suan le paal hi a, a bee le phung le a innkuan zui in mi sim a min taw a kiciamtee te hi. Ama suan le paalte kum kul le a tungsia khat simin TOPA Biakinnpi sungah nasep hawmna khat tek nei hi.

²⁵David in, “Israel ii TOPA Pathian in a mite tungah kilemna pia zo a, ama mama a tawntungin Jerusalem ah teang tu hi.

²⁶Tua ahikom TOPA ompuina Puanbuk le biakna ah a kizangh vanhte theampo Levi mite in puak kul nawn ngawl hi,” ci hi.

²⁷David ii a khakbel a thupiakna doppha in amate kum kul a cin ciang naseam tu in a min kiciamtee hi,

²⁸tuaciang amate a nuai a bangin vaipuak kisee hi: Aaron ii suan le paal thiampite ii biakinn ah biakna vawt a hu tu, suum sung teng le a inndoite keamcing tu, le biakna vanh thiangthote theampo ninsak ngawl tu;

²⁹Pathian tungah a kipia anluum, biakpiakna in a kizangh zungtaang vuite, tol kisaw ngawl muhpheangte, a ki em biakpiak nate, olive thau a kihel zungtaang vuite; biakinn ah a kipia vanhte toaikhai tu le teesak tu;

³⁰zing sim nitak simin TOPA pok tu le a min thansak tu;

³¹tuaciang TOPA tungah biakpiaknate Sabbath ni, Thadet Poai le poai dangte ah a kihal simin TOPA pok tu le ama min thansak tu ahi hi. Hun simin hi nasep a seam tu Levi mi phaza a see na in a zui tu ngeina te kivawt hi. Hun theampo ah TOPA biak natu vaipuak sia Levi te kiseesiat hi.

³²Amate sia TOPA ompuina Puanbuk le Biakinnpi kepcing tu le biakinn biakpiakna sungah a mealheakte ahi Aaron suan thiampite hu tu in nasep kipia hi.