Read Siyin Chin 1 Khangtaanghthu 4 Bible Online

1 Khangtaanghthu 4 - Siyin Chin bible

1 Khangtaanghthu 4

¹Hite sia Judah suan le paalte pawlkhat ahi hi: Perez, Hezron, Carmi, Hur le Shobal te ahi hi.

²Shobal sia Reaiah ii pa, Reaiah sia Jahath ii pa, Jahath sia Ahumai le Lahad te ii pa hi a, amate sia Zorah ah a teang mite ii taanghpupite ahi hi.

³Hur sia Caleb ii a zi Ephrath taw a tapa lianbel hi a, ama suan le paalte sia Bethlehem khuapi saat ciilte ahi uh hi. Hur in tapa thum nei hi: Etam, Penuel le Ezer te ahi hi. Etam in tapa thum nei hi: Jezreel, Ishma le Idbash hi a, Hazzelelponi kici tanu khat nei hi. Penuel in Gedor khuapi saat a, Ezer in Hushah khuapi saat hi.

⁵Tekoa khua saatpa Ashhur in zi nii nei a, Helah le Naarah te ahi hi.

⁶Ama in Naarah taw tapa li nei hi: Ahuzzam, Hepher, Temeni le Haahashtari te ahi hi.

⁷Ashhur le Helah in tapa thum nei hi: Zereth, Izhar le Ethnan te ahi hi.

⁸Koz sia Anub le Zobebah ii pa hi a, Harum tapa Aharhel ii suan bee le phungte ii taanghpupi hi.

⁹Jabez kici pasal khat om a, ama innkuan sung panin a zatakbel uh ahi hi. A sua lai, a nu in na sa mama ahikom Jabez ci in min phuak hi.

¹⁰Ahihang Jabez in Israel te ii Pathian tungah thungen in, “Pathian awng, thupha hong pia ta'n a, ngam zai khat hong pia ta'n. Hong ompui ta'n a kei hong nasak thei tu siatna khat pawpo pan hong keam ta'n,” ci hi. A thunget bangin Pathian in pia hi.

¹¹Shuhah ii suapuipa Caleb in tapa Mehir nei hi. Mehir sia Eshton ii pa hi a,

¹²Eshton in tapa thum nei hi: Bethrapha, Paseah le Tehinnah te ahi hi. Tehinnah sia Nahash khuapi saatpa hi. Hi mite ii suan le paalte sia Recah ah teang uh hi.

¹³Kenaz in tapa nii nei a, Othniel le Seraiah te ahi uh hi. Othniel zongh in tapa nii nei a, Hathath le Meonothai te ahi uh hi.

¹⁴Meonothai sia Ophrah ii pa hi. Seraiah sia Joab ii pa hi a, nasep thiam mite bebek ii teenna Khutthiamte Kuam a saatpa hi.

¹⁵Jephunneh ii tapa Caleb in tapa thum nei hi: Iru, Elah le Naam te ahi hi. Elah sia Kenaz ii pa hi.

¹⁶Jehallelel in tapa li nei hi: Ziph, Ziphah, Tiria, le Asarel te ahi hi.

¹⁷Ezrah in tapa li nei hi: Jether, Mered, Epher, le Jalon te ahi hi. Mered in Egypt kumpipa ii tanu Bithiah teenpui a, amate in Miriam kici tanu khat le tapa nii, Shammai le Ishbah nei uh hi. Ishbah in Eshtemoa khua saat hi. Mered in zongh Judah nam numei khat teenpui in tapa thum nei hi: Gedor khua saatpa Jered; Soco khua saatpa Heber; le Zanoah khua saatpa Jekuthiel te ahi hi.

¹⁹Hodiah in Naham ii suapuinu teenpui hi. A suan a paalte sia Keilah khua ah a teang Garm bee le phung le Eshtemoa khua ah a teang Maacath bee le phung te ii pianna ahi hi.

²⁰Shimon in tapa li nei hi: Amnon, Rinnah, Benhanan, le Tilon te ahi hi. Ishi in tapa nii nei hi: Zoheth le Benzoheth te ahi hi.

²¹Shelah sia Judah ii tapate khat ahi hi. A suan le a paalte sungah Lecah khua saatpa Er; Mareshah khua saatpa Laadah; Beth Ashbea khua ah a teang puanneal thiamtak namte;

²²Jokim le Cozeba khua ah a teang mite, tuaciang Moab numeite a teenpui, Bethlehem khua ah a teang Joash le Saraph kihel uh hi. (Hi taangh ngeinate sia lui mama zo hi.)

²³Amate kumpipa atu in bealseakte hi a, Netaim le Gederah khua te ah teang uh hi.

²⁴Simeon in tapa nga nei hi: Nemuel, Jamin, Jarib, Zerah, le Shaul te ahi uh hi.

²⁵Shaul ii tapa Shallum, a tupa Mibsam hi a, a tu selawn sia Mishma ahi hi.

²⁶Tuaciang Mishma ii khangngui sia Hammuel, Zaccur, le Shimei te hi susuk uh hi.

²⁷Shimei in tapa sawm le luk le tanu luk nei a, ahihang a mealheakte in ta tawm zaw nei ahikom Simeon nam sia Judah nam za in pung ngawl uh hi.

²⁸David kumpipa hun dong Simeon suan le paalte sia a nuai a khuate ahi: Beersheba, Moladah, Hazarshual,

²⁹Bilhah, Ezem, Tolad,

³⁰Bethuel, Hormah, Ziklag,

³¹Beth Marcaboth, Hazarsusim, Bethbiri, le Shaaraim ah teang uh hi.

³²Amate a dang mun nga ahi: Etam, Ain, Rimmon, Tochen le Ashan,

³³tuaciang nitumna thangsang Baalath khua dong, a kiim a paam khuanote zongh ah teang uh hi. Hite sia amate ii bangkua thute le a teenna mun le ngamte ii thu le la tepteena ahi hi.

³⁴Amate bee le phung lutangte sia a nuai a mite ahi hi: Meshobab, Jamlech, Amaziah ii tapa Joshah, Joel, Jehu (Joshibiah ii tapa, Seraiah ii tapa, Asiel ii tapa), Elioenai, Jaakobah Jeshohaiah, Asaiah, Adiel, Jesimiel, Benaiah, Ziza (Shiphi ii tapa, Allon ii tapa, Jedaiah ii suan khat Shimri, le Shemaiah). Amate ii innkuante pung vaial ahikom,

³⁹nitumna sang Gerar dong phialma in kizel hi, a tuute sia tua khuapi omna kuam ii nisuana sangah tha uh hi.

⁴⁰Amate in tualai ah ngamthim dide patauna om ngawl, leipha ngantatna mun tam mama mu uh hi, tuate sia ngam awngthongna sungah kithung hi. Tua ngam ah a teang masate sia Ham mite ahi uh hi.

⁴¹Judah kumpipa Hezekiah hun lai in a tungah a ki at mite in Gerar ah pai a, tua munah a teangte ii puanbuk le thaampheang te sathapsak siat uh hi. A tuute atu in lohingna ngam tam ahikom amate in a teang sa te notkeak in tua munah teang uh hi.

⁴²Simeon nam sung pan a dang mihing za nga nisuana sang Edom ngam zuan uh hi. Amate sia Ishi ii tapate ahi: Pelatiah, Neariah, Rephaiah, le Uzziel te in lampui uh hi.

⁴³Amate in tua munah a nungta lai Amalek mite that a, tua lai ah tua hun panin teang suak uh hi.