Read Siyin Chin 2 Khangtaanghthu 10 Bible Online

2 Khangtaanghthu 10 - Siyin Chin bible

2 Khangtaanghthu 10

¹Rehoboam sia ama kumpi suaksak tu in Saksang Israel mite theampo ii kikhopna Shechem ah pai hi.

²Solomon kumpipa kung pan suakta in Egypt ngam ah a tai Nebat ii tapa Jeroboam in tua thu a zaak ciang inn ah cia kik hi.

³Saksang namte pan mite in ama sam a, a vekpi in Rehoboam kungah pai in ama tungah,

⁴“Na pa in ko tungah vanhngit hong suan hi. Hi vanhngitte nong zaangsak zaw a, ko atu in nuntakna nong olsak zaw le nangma khutnuai ah a thumaan mi hi tu khu hi,” ci uh hi.

⁵Rehoboam in, “Hi thu ka ngaisut natu in ni thum hun hong pia tavun. Tua zawkciang hong pai kik tavun,” ci in zo kik hi. Tua ahiciang mipite in nusia hi.

⁶Kumpipa Rehoboam in a pa Solomon tungah ngaisutna a pia uhaamte, thu dongh hi. Ama in, “Hi mite tungah bangbangin a kam zo tu khi ziam?” ci in dongh hi.

⁷Amate in, “Hi mite tungah dik lete a, amate lungkim natu in thu hong dokte kikhualna taw zo lete, thumaan takin na na hong sepsak tawntung tu hi,” ci in zo kik hi.

⁸Ahihang ama in uhaamte ngaisut piakna melsia a, ama taw a khangkhawm, tu in ngaisutna a piate ahi khangmoite kungah pai hi.

⁹Ama in, “Ka ngamtat natu in bang ngaisutna hong pia tu nu ziam? A vanhngit uh zaangsak zaw tu in hong ngen mite tungah bangbang ci tu khi ziam?” ci in dongh hi.

¹⁰Amate in, “Tua mite tungah hi bangin ci in: ‘Ka khutmeleng sia ka pa kawng sangin saa zaw hi.

¹¹Ka pa in no vanhngit hong suan hi; keima in tua vanhngitte a ngit zaw lai in ka vawt tu hi. Ama in khauhual kibul ciang taw hong saat hi; kei ka hi le siphu saatna taw hong vel tu khi hi!,’ ” ci in zo kik hi.

¹²Ni thum zawkciang Jeroboam le mipite theampo Kumpipa Rehoboam kungah ama sawl bangin hong heak kik uh hi.

¹³Kumpipa in uhaamte ii ngaisutna a piakte melsia in mipite tungah,

¹⁴khangmoizawte ii ngaisut piak bangin kamham pau hi. Ama in, “Ka pa in vanhngit hong suan hi; tuate a ngit zaw lai in ka vawt tu hi. Ama in khauhual kibul ciang taw hong saat hi; kei ka hile siphu velna taw kong vel tu hi!” ci hi.

¹⁵Tuasia in Shiloh pan kamsaang Ahijah tungtawn a, Nebat tapa Jeroboam tungah a sonna a taangtun natu in TOPA Pathian ii deina ahi hi. Hisia hu in kumpipa in mipite bangma thudon ngawl hi.

¹⁶Mipite in kumpipa ii amate a thudon ngawl a mu ciangin, “David le a innkuan te taak hen! Ei atu amate in bang hong vawtsak ngei na ziam? Israel mite awng, cia tek ka tawng! Rehoboam ama le ama ki en tahen!” ci in au uh hi. Tuabangin Israel mite in leedo a,

¹⁷Rehoboam sia Judah ngam sungah a teangte bek ii kumpipa tu in nusia uh hi.

¹⁸Tua zawkciang Kumpipa Rehoboam in zawthawk thu taw a kisawl nasepna a uk Adoniram samin Israel te kungah paisak hi, ahihang amate in ama suang taw deanglum uh hi. Tuasia ciang Rehoboam sia a siphu ngalleang tungah manlang takin kaato a, Jerusalem khua ah suakta hi.

¹⁹Tua hun pan kipan Israel saksang kumpi ngammite in David kumpi khangngui langpanin leedo tan uh hi.