Read Siyin Chin 2 Khangtaanghthu 17 Bible Online

2 Khangtaanghthu 17 - Siyin Chin bible

2 Khangtaanghthu 17

¹Jehoshaphat in a pa Asa ii kumpi za laih a Israel te sim tu in ama dinmun khosak hi.

²Ama in kulh taw a ki uum Judah khuapite sung, Judah ngam nawl sung le a pa ii a laak Ephraim ngamsung khuapite ah a ngalkapte koi hi.

³Jehoshaphat in a pa ii kumpi a sua sawng lai bangma in ngamta a, Baal bia ngawl ahikom TOPA in thupha pia hi.

⁴Ama in a pa ii Pathian na seamin Pathian thupiakte zui a, Israel kumpite ngamtat bangin ngamta ngawl hi.

⁵TOPA in Jehoshaphat sia Judah kumpi ngam kho takin uksak a, a ngammite theampo in letsong a puak tek uh ciang ama hau in nasia takin ki upat hi.

⁶Ama in TOPA na a sep sia ki angtang in Judah ngam sungah doai sepna munte theampo le Asherah numeipathian limte zongh sumai hi.

⁷Ama ii kumpi maan zawk a kum thum kumin ama in Judah khuapite ah thuhil tu in a nuai a ulian teng paisak hi: Benhail, Obadiah, Zechariah, Nethanel le Micaiah te ahi uh hi.

⁸Amate sia Levi te kua le thiampi nii in zui hi. Levi te sia Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah le Tobadonijah hi a; thiampite sia Elishama le Jehoram te ahi hi.

⁹Amate in TOPA Thukham laibu kengin Judah khuate theampo ah pai in mihonpite hil kawkoai hi.

¹⁰TOPA in Jehoshaphat kumpipa sia tua a kiim a paam kumpi ngam theampo in simsak ngam ngawl hi.

¹¹Philistine te pawlkhat in Jehoshaphat tungah ngunn tam mama le letsong dangte puak in, Arab te pawlkhat in tuu 7,700 le keal 7,700 puak uh hi.

¹²Tuabangin Jehoshaphat sia a vaanglian vaial hi. Judah ngamsung theampo ah ama in kulhte vawt in khuapite saat a,

¹³an te a vuum a saal kholna in nei hi. Ama in Jerusalem khua sungah a mindok tuam ngalkapbute sia,

¹⁴a bee le a phung zui in koi hi. Adnah sia Judah bee le phungte sung pan ngalkapmang hi a, a khutnuai ah ngalkap 300,000 nei hi.

¹⁵A zom a niina sia Jehohanan hi a, ngalkap 280,000 nei hi,

¹⁶a zom a thumna sia Zichri tapa Amasiah hi a, ngalkap 200,000 nei hi. (Amasiah sia TOPA naseam tu in ama le ama kipia hi.)

¹⁷Benjamin bee le phungte sung panin ngalkap maangpa sia a mindok tuam ngalkap Eliada hi a, lum le thal toai ngalkap 200,000 uk hi.

¹⁸A zom a niina pa sia Jehozabad hi a, ngalhiam toai cinghteng pasal 180,000 uk hi.

¹⁹Hi mite in Jerusalem ah kumpipa na a seamte hi a, tua ban ah kulh taw a ki uum Judah khuapi dangte sung zongh ah ngalkap dangte koi thua lai hi.