Read Siyin Chin 2 Khangtaanghthu 18 Bible Online

2 Khangtaanghthu 18 - Siyin Chin bible

2 Khangtaanghthu 18

¹Judah kumpipa Jehoshaphat hau in a minthan ciang a innkuanpui khat le Israel kumpipa Ahab ii innkuanpui khat a kiteen natu in vaihawm hi.

²Kum tawmvei zawkciang Jehoshaphat sia Ahab kung haw tu in Samaria khuapi ah pai hi. Jehoshaphat le a kithol puite a patoaina in Ahab in anneakpoai atu in khui le tuu tam mama ngo hi. Ahab in Gilead ngam Ramoth khuapi a simpui tu in Jehoshaphat paa hi.

³Ahab in Jehoshaphat tungah, “Ramoth khua a sim khawm tu in nong kuan tu ziam?” ci in dongh hi. Jehoshaphat in, “Na kithoai man ciang hong son ta'n, keima le ka ngalkaphonpi a kinging sa in om khu hi. Hong pawm tu khu hi,” ci in zo kik hi.

⁴Tuasia ciang, “Ahihang TOPA dongh phot tawng,” ci lai hi.

⁵Tua ahikom Ahab in kamsaangte 400 bang samin, “Kei pai in Ramoth sim tu khi ziam maw, sim ngawl tu khi ziam?” ci in dongh hi. Amate in, “Sim in, Pathian in zawna hong pia tu hi,” ci in zo hi.

⁶Ahihang Jehoshaphat in, “TOPA ih dok thei natu in kamsaang dang om nawn ngawl ziam?” ci in dongh hi.

⁷Ahab in, “Khat om lai hi, Imlah ii tapa Micaiah hi. Ahihang ama ensan khi hi, banghang ziam cile ama in kei atu a pha bangma sonkhol ngeingawl hi; a pha ngawl khat veu hi tawntung hi,” ci in zo hi. Jehoshaphat in “Tuabangin ci heak in!” ci in zo kik hi.

⁸Tua ahiciang, Ahab kumpipa in zum uliante khat sam a, Micaiah thakhatin hong paipui ta'n, ci in sawl hi.

⁹Kumpipate nii sia kumpi puantualte silh a, Samaria kongpi pua sang ancilna ah kumpi tokhumte tungah a to laitakin, kamsaang theampo in amate mai ah thusuakte son uh hi.

¹⁰Amate sung pan khat, Chenaanah ii tapa Zedekiah in thik kiite vawt a, Ahab munah, “Hisia TOPA ii pauna hi: ‘Hite taw Syria te na sim tu a, na zocip tu hi,’ ” ci hi.

¹¹Kamsaang dang theampo in tuabang vive ma in ci uh hi. “Ramoth a sim tu kuan tavun, zo tu nu hi,” ci uh hi. TOPA in zawna hong pia tu hi.”

¹²Tua lanin Micaiah sam tu in a pai ulian pa in, “Kamsaang dangte theampo in kumpipa zawna tu bebek son zo hi, nang zongh tuabang ma son hamtang lete pha tu hi,” ci hi.

¹³Ahihang Micaiah in, “A nungta TOPA min lo in ka Pathian ii son a hong sawl teng son tu khi hi!” ci in zo hi.

¹⁴Ama Kumpipa Ahab mai ah hong kipaipui ciang, kumpipa in, “Micaiah awng, Kumpipa Jehoshaphat le kei Ramoth ah kuanin sim tu khu ziam maw, sim ngawl tu khu ziam?” ci in dongh hi. Micaiah in, “Sim vun! Na zo tu uh hi. TOPA in zawna hong pia tu hi,” ci in zo hi.

¹⁵Ahihang Ahab in, “TOPA min taw kei tungah nong pau ciangin thumaan thutak son in! Bang tanvei tuabangin hong ci tu khi ziam?” ci in zo kik hi.

¹⁶Micaiah in, “Israel ngalkapte sia mualtung tengah tuu cing pa om ngawl a tuute kithezau bangin ka mu hi. Tuaciang TOPA in, ‘Hi mite in lampui nei ngawl hi; inn ah thinnuam takin cia hen,’ ” ci hi.

¹⁷Ahab in Jehoshaphat munah, “Ama in kei huvau peuma a pha khat zongh hong sonkholsak ngeingawl hi, kong ci sa hi ka na ngawl ziam; a sia khat veu hi tawntung hi!” ci hi.

¹⁸Micaiah in zomto a, “Tu in TOPA pauna teng ngai vun! TOPA sia vantung a kumpi tokhum tungah to a, ama ii vantunglalangte a kiim ah a ding ka mu hi.”

¹⁹TOPA in, ‘Ramoth ah Ahab pai in a kithalup natu in akua in ama theam tu nu ziam?’ ci in dongh hi. Vantunglalang pawlkhat in son khat nei a, a dangte in thudang khat a son uh hi,

²⁰a khakbelin thaa khat sia mai ah hong pai a, TOPA kung zuanin, ‘Keima in ama theam tu khi hi,’ a ci hi. TOPA in ‘Bangbangin maw?’ ci in dongh hi.

²¹Tua thaa in, ‘Keima pai in Ahab ii kamsaangte theampo leilot thu ka sonsak tu hi!’ ci in zo kik hi. TOPA in, ‘Va pai ta'n a, va theam ta'n, theam zo tu ni hi,’ ” ci hi.

²²Tuaciang Micaiah in thu khup a, “A piang thu in hisia hi. TOPA in na kamsaang hite nang tungah leilot thu hong sonsak hi. Ahihang ama mama in nang tuasiatna nga tu in a thutan sa hi!” ci hi.

²³Tuaciangin kamsaangpa Zedekiah in Micaiah kungah paito in, a maitang beang hi, tuaciang, “Bang hun pan kipan TOPA thaa in kei hong nusia a, nang tungah hong pau ziam?” ci in dongh hi.

²⁴Micaiah in, “Inn nungsang inndoi sung khat ah a buu tu in na pai ciangin mu tu ni hi,” ci in zo kik hi.

²⁵Tua zawkciang Kumpipa Ahab in a uliante khat munah, “Micaiah man in a, khuapi ukpa Amon le Kumpipa tapa Joash tungah paipui vun.

²⁶Amate in ama thong sungah koi hen a, bangma tat ngawlin kong heak kik dong anluum le tui bek taw na vaak hen, ci in son in,” ci in thupia hi.

²⁷“Bangma tat ngawlin nong heak kik le TOPA in kei tungtawn a hong pau ngawl hi tu hi,” ci in Micaiah in ci ngaw hi. Tuaciang ama in, “Ka ci sa teng kuama po in hong ngai tavun!” ci lai hi.

²⁸Tua zawkciang Israel kumpipa Ahab le Judah kumpipa Jehoshaphat te in Gilead ah Ramoth khuapi sim tu in pai uh hi.

²⁹Ahab in Jehoshaphat munah, “Ngal kisim ciangin kei kong kimealseal tu a, nang na hile kumpi puan teng ma nong silh tu hi,” ci hi. Tuabangin Israel kumpipa kidona phual ah kimealseal in pai hi.

³⁰Syria kumpipa in a siphu ngalleang ukte munah, Israel kumpipa ngawl buang a dang khat zongh sim ngawl tu nu hi ci hi.

³¹Tua ahikom amate in Kumpipa Jehoshaphat a mu uh ciangin a vekpi ma in Israel kumpipa sa ahiciang ama sim tu in kiheak uh hi. Ahihang ama hong au keak ahiciang TOPA Pathian in suatak a, ama kung pan a simte kileesak kik hi.

³²Siphu ngalleang ukte in ama sia Israel kumpipa ahi ngawl hunlam mu ahiciang amate in del nawn ngawl uh hi.

³³Ahizong Syria ngalkapte khat ii kap thaltang khat in Kumpipa Ahab ii thikpuan kipeena pan kha luilam hi, “Kei liam khi hi! Ngalphual panin kiheam in!” ci in a siphu ngalleang hawlpa oksan hi.

³⁴A kido saan lai tengin Kumpipa Ahab sia a siphu ngalleang sungah kikhuangkho in to a, Syria te maingat hi. Nitum laitakin ama thi hi.