Read Siyin Chin 2 Khangtaanghthu 2 Bible Online

2 Khangtaanghthu 2 - Siyin Chin bible

2 Khangtaanghthu 2

¹Solomon kumpipa in TOPA biak natu biakinn khat le ama ii teen natu kumpi inn khat sak tu in khensat hi.

²Ama in vanhte a puak tu in mihing 70,000 le mualtung ngam ah suangkhuk to tu in mihing 80,000 koi hi. Nasepna a uk tu in mihing 3,600 om hi.

³Solomon in Tyre kumpipa Hiram tungah a vaithakna panin: “A kumpi inn sak natu in ka pa David kumpipa tungah cedar thingluangte na zuak bangma in kei taw zong na hong seam ta'n.

⁴TOPA ka Pathian ka patoai natu in biakinn khat ka sak laitak hi. Tua mun sia mun thiangtho hi tu a, keima le ka mite in zing sim nitak sim, Sabbath ni zongh, Thadet Poaite le a dang ni thiangtho nite ah TOPA ih Pathian patoaina in meihal biakpiakna mun hi tu a, tatsat ngawlin ama tungah anluum thiangtho piakna mun, hel namtui, ngimnamtui tuatuamte halna taw ama ka biana mun hi tu hi. Tusia a tawntungin vawt tu in TOPA in Israel te thupia zo hi.

⁵Ih Pathian in pathian dang khat pawpo sangin lianzaw ahikom biakinn lian khat sak tu ka sawm hi.

⁶Ahizong vantung zaina theampo ngawngawn in ama tasak zo ngawl tu ahikom kuama in Pathian atu biakinn sa thei tatak ngawl tu hi. Tuasia ci leang Pathian tungah ngimnamtui hal natu mun ci tung kaan keima in bangbang biakinn khat sa thei tu khi ziam?

⁷Tu in khetlet lim ngelh thiamna nei a, khamh, ngunn, taau le thik a zeamthiam, vancii meal, a sandup le a san puannip a thiam pasal khat hong puak ta'n. Ama in Judah le Jerusalem ah ka pa David ii tealsa khut thiamna nei te taw seam khawm tu hi.

⁸Nangma ii thingvawt nasep thiamzia ka heak ahikom Lebanon panin cedar thing, cypress thing le juniper thingluangte hong puak ta'n. Thing tam tatak vawtkholna ah na mihingte a hu tu in ka mihing puak tu in kinging khi hi,

⁹banghang ziam cile sak tu a ka tup biakinn sia lian tu a, hoi mama tu hi.

¹⁰Na thing atte neak tu in zungtaang tann tulnii, mangtaang tann tul nii, sapittui litre tulzali le olive thau litre tulzali kong puak tu hi.”

¹¹Hiram kumpipa in Solomon tungah lai thuk kik hi. A lai sungah, “TOPA in a mite a it hu in nangma sia amate kumpi hong suaksak zo hi.

¹²Leitung le vantung a bitphua pa Israel te TOPA Pathian pok vun! Tu in TOPA atu biakinn khat le ama a tu kumpi inn khat sak a sawm, heaktheina le thiamna taw a kidim tapa ciim khat, ama in David kumpipa pia zo hi.

¹³Huram kici a ciim le khutthiam mama khat kong puak hi.

¹⁴A nu sia Dan nam pan hi a, a pa sia Tyre khua mi ahi hi. Ama in khamh, ngunn, taau, thik, suang le thing te taw nate koibang piangsak tu ci theampo he siat hi. Ama in vancii, a sandup, a san le puanneal te zongh vawt thei hi. Ama in khetlet thiamna nam tuatuam vawt thei a, ama tungah a kison ngealkhol lim khat pawpo bangin seam thei hi. Na khutthiamte le na pa David kumpipa naseamte taw ama seam khawmsak in.

¹⁵Tua hi a, tu in nong kamciamsa zungtaang, mangtaang, sapittui le olive thaute hong puak ta'n.

¹⁶Lebanon mual te tungah na kisap za cedar thing ih phuk tu a, kopsawm in, phongte vawtin Joppa ciang tuipi tungah kitaaisak tu hi. Tua mun pan nangma in tuate Jerusalem ah na nawn thei tu hi,” ci in at hi.

¹⁷A pa David ii mi simna a vawt bangin Solomon kumpipa in Israel ngam sungah a teang ngamdangmite theampo mi simna vawt hi. Ngamdangmi a vekpi 153,600 teang hi.

¹⁸Ama in tuate sung pan 70,000 sia vanh nawn tu, 80,000 sia mual tungah suang at tu in see a nasep zaw nanak natu in 3,600 te sia naseamte uk tu in panmun pia hi.