Read Siyin Chin 2 Khangtaanghthu 20 Bible Online

2 Khangtaanghthu 20 - Siyin Chin bible

2 Khangtaanghthu 20

¹Tawmvei zawkciangin Moab le Ammon ngalkaphonpite in amate pawlpui Meun te taw Judah ngam sim uh hi.

²Kamtai pawlkhat hong pai in Jehoshaphat kumpipa tungah hi bangin ko hi: “Edom ngalkap honpui khat Tuipi Thi langkhat panin hong sim tu hong kuan hi. Amate in Hazazon Tamar khua la zo hi.” (Hi sia Engedi ii a min dang khat hi.)

³Jehoshaphat patau a, lam a lak natu in TOPA tungah thungen hi. Tua zawkciang ama in ngamsung theampo ah an tanna khat nei natu in thupia hi.

⁴Khuapi sim pan Judah mite TOPA lamlakna ngen tu in Jerusalem ah manlang tak hong pai in,

⁵amate le Jerusalem khua mite Biakinnpi leitual thak ah kikhawm uh hi. Jehoshaphat kumpipa hong pai in amate mai ah ding a,

⁶a ngingin, “Oh TOPA ka taanghpupite ii Pathian awng, vantung le leitung ngam theampo na uk siat hi. Nangma sia a vaanglian a thahat na hi a, kuama in hong nalh zo ngawl hi.

⁷Nangma in koma Pathian na hi hi. Israel na mite hi ngam sungah hong kikhiin ciang, hi sungah a teang mite na nawtkeak a, ngam le lei teng sia na lawm Abraham suan le paal te tungah a tawntung a tu in na pia hi.

⁸Amate hi ngam sungah teangin nangma hong patoaina in biakinn khat sa zo a,

⁹amate daan na piakna in tuasiatna khat pawpo — ngal kidona, a kilaw thei natna ahibuale kialpi — na tunsak ciang amate hong pai in nangma hong biakna hi Biakinnpi mai ah a din thei hunlam he uh hi. Amate in a ngim ngana huvau na tungah thu hong ngen thei a, tuaciang nangma in za in na suatak hi.

¹⁰“Tu in Ammon mi, Moab mi le Edom mite in ko hong sim zo hi. Ka taanghpupite Egypt ngam pan a pusua lai in tua ngamte sung a tum tu oai ngawl na hi komin ka taanghpupite in hi ngamte kiimvealin susia ngawl uh hi.

¹¹Ko tungah amate hong lo kikna sia hi bang hi — nong piaksa ngam pan hong notkeak tu in amate hong pai uh hi.

¹²Nangma in koma Pathian na hi hi! Amate daan pia in. Banghang ziam cile ko hong sim, hi ngalkaphonpite mai ah ka ci ka law uh he ngawl khu hi. Bang vawt tu ci sia ka heak ngawl uh hangin nangma ii nong hu tu lam en khu hi,” ci in thungen hi.

¹³Judah mi theampo a zite a tate taw tualai Biakinnpi ah ding uh hi.

¹⁴Mihonpi sungah a om Levi te khat ii tungah TOPA thaa hong theng hi. Ama min Jahaziel hi a Zechariah ii tapa ahi hi. Ama sia Asaph bee le phung pan hi a, Mattaniah, Jeiel le Benaiah te ii sungsuak, Asaph suan ahi hi.

¹⁵Jahaziel in, “Nangma kumpipa le no Judah le Jerusalem mite theampo awng, na ngalte a tam hangin thinkiamin lau ngawl het tu nu hi, TOPA in hong ci hi. Ngal kisimna sia Pathian ii sep tu hi a, no taw kisai ngawl hi.

¹⁶Zing ciang amate Ziz mualciangh lam hong totto laitakin sim vun. Jeruel nai ngam tawnghtol sang paina leikuam tawpna ah na kisi tu uh hi.

¹⁷Note in hi ngal do kul ngawl tu hi. Panmunte la po vun a, ngak vun; TOPA ii zawna hong piak na mu tu uh hi. Judah mite le Jerusalem mite awng, haisaang heak vun a lau heak vun. Ngalsim tu in kuan vun, TOPA in note hong ompui tu hi!” ci hi.

¹⁸Tuasia ciang Jehoshaphat kumpipa sia a mai lei pha dongin kun a, mipi teng zongh kunin TOPA bia uh hi.

¹⁹Levi te ahi Kohath le Korah ii bee le phungte dingto in a nging tatakin au a, Israel te ii Pathian, TOPA pok uh hi.

²⁰A zing ciang zingtuungin mihonte Tekoa hui ngamsung zuan uh hi. A vaidin uh ciang Jehoshaphat in amate tungah kam vaitha hi: “Judah mite le Jerusalem mite awng! TOPA na Pathian muang vun, tua hile kip takin na ding thei tu uh hi. Ama kamsaangte ii hong sonte um vun, tua hile na ma na tun tu uh hi.”

²¹Mipite thu a kikuppui zawkciang kumpipa in music thiam pawlkhat sia biakna poai vawt ciang amate silh bul puantualte silhsak a, ngalkaphonpi mai ah paisak a: “TOPA pok vun! Ama hong itna kip tawntung hi!” ci in lasa sak hi.

²²Tuabangin lasak a kipat po uh ciang TOPA in ngal a sim ngalkaphonpite tungah patauna tungsak hi.

²³Ammon te le Moab te in Edom ngalkaphonpite simin a suksiat cip zawkciang amate le amate nasia takin kisim uh hi.

²⁴Judah ngalkaphonpi in sennealngamsung tausaang khat a thet uh ciang a ngalte sang a et le amate a vekpi in lei ah thi peakpuk sia mu uh hi. Khat zongh suakta ngawl hi.

²⁵Jehoshaphat le a ngalkapte sia a ngalte vanh laksak tu in pai a, khui, neak le dawn, puansilhte le vanh manpha dangte mu uh hi. Amate in ni thum sung vanhte khawmtua napi tamleih ahikom a vekpi in la siat zo ngawl uh hi.

²⁶A ni li ni in amate sia Beracah Kuam ah kikhawm a, ama ii vawtsa theampo atu in TOPA pok uh hi. Tua ahikom tua kuam sia “Beracah” kici hi.

²⁷TOPA in a ngalte zawsak zo ahikom Jehoshaphat lampui in, a ngalkapte Jerusalem ah zawna le lungdamna taw cia kik uh hi.

²⁸Amate khuapi a thet ciang tengtongh le lemlete tumin Biakinnpi zuan uh hi.

²⁹TOPA in Israel ii ngalte a zawsakna thu a za ngam theampo lau mama uh hi.

³⁰Tuabangin Pathian in a kiim a paam pan ngammuangsak ahikom Jehoshaphat in dai takin ngam uk hi.

³¹Jehoshaphat sia kum 35 a phakin Judah kumpi suak a, Jerusalem panin kum 25 sung uk hi. A nu sia Shilhi ii tanu Azubah ahi hi.

³²Ama mai ah a pa Asa bangma in TOPA muna ah a maan in seam hi;

³³ahihang doai sepna munte susia ngawl hi. Mipite in a taanghpupite ii Pathian biakna sang ah thintak lungtak taw kiheak ngawl lai uh hi.

³⁴Jehoshaphat ii nasep dangte theampo a kumpi maan kipat pan a bo dong Israel Kumpipate ii Taanghthu sungah a kihel Hanani ii Tapa Jehu Taanghthu sungah kiciamtee hi.

³⁵Hun khat lai in Judah kumpipa Jehoshaphat in thusia tam mama a vawt, Israel kumpipa Ahaziah taw kipawlna khat vawt hi.

³⁶Amate in teambaw tawlngakna Eziongeber ah tuipi teambawte vawt uh hi.

³⁷Ahihang Mareshah khua mi, Dodavahu ii tapa Eliezer in Jehoshaphat tungah, “Ahaziah taw kipawlna na vawt hu in na vawtsa nate TOPA in lalsak tu hi,” ci in a kidop natu son hi. Tuaciang a teambawte siatham a, tuipi tungah paisak ngei nawn ngawl hi.