Read Siyin Chin 2 Khangtaanghthu 26 Bible Online

2 Khangtaanghthu 26 - Siyin Chin bible

2 Khangtaanghthu 26

¹Judah mite theampo in Amaziah ii tapa kum sawm le kum luk a pha Uzziah sia a pa ii kumpiza laih tu in teal uh hi.

²(Amaziah ii thi zawkciang Uzziah in Elath khuapi la kikin puua kik hi.)

³Uzziah sia kum sawm le kum luk a phakin kumpi suak a, ama in Jerusalem khua pan kum 52 sung uk hi. A nu sia Jerusalem khua mi Jecoliah ahi hi.

⁴A pa ngamtat zui in, TOPA ii diksak te seam hi.

⁵Biakna vai a thudok Zechariah ii nuntak lai teng Uzziah in thumaan takin TOPA na seam ahikom Pathian in ama thupha pia hi.

⁶Uzziah in Philistine te taw kisim hi. Ama in Gath, Jamnia le Ashdod khuapite uumna luphungte sutham in Ashdod nai le Philistia ngam mun dangte ah kulh taw a ki uum khuapite saat hi.

⁷Pathian in Philistine te, Gurbaal ah a teang Arab te le Meun te Uzziah ii a zaw natu in hu hi.

⁸Ammon te in Uzziah tungah phiangshia pia a, ama vaanglian ahikom a minthanna sia Egypt ngam dong ngawngawn ah kizel hi.

⁹Uzziah in Khuakiing Kongpi, Kuam Kongpi le luphung kiheakna king teng ah ngal vilna tausaangte a sakna taw in Jerusalem uumna kulh sia khosak vaial hi.

¹⁰Ama in ngam taanzauna zongh ah kulh taw a ki uum tausaangte sa hi, nganno tam mama nei ahikom nitumna sang mualpeang le zaangtamte ah tuikhuk tam ma to hi. Ama in lothaw nasep kin ahikom, mualtung ngamte le lei phana theampo tho in sapithuan vawt tu in mite hanthawn hi.

¹¹Ama in ngalsim thei paih tu ngalkap honpui khat nei hi. A thu tepteena teng kumpi zum naseam khat ahi Hananiah khutnuai ah a thuzeakpi ahi Jeiel le Maaseiah in len uh hi.

¹²Tua ngalkaphonpi sia ngalkapbu 2,600 in uk hi.

¹³Amate khutnuai ah kumpipa atu ngalte a sim zo takpi tu ngalkap thiam 307,500 om hi.

¹⁴Uzziah in a ngalkaphonpite sia lum, tei, thik lukhu, thikpuan, thal le thaltangte, le saili suangtangte pia hi.

¹⁵Jerusalem khua ngal vilna tausaangte le khuapi luphung kingte tung pan thal kaap natu le suang liante lot natu in a kisamh na teng ngalhiam vawt thiamte in vawt uh hi. Pathian ii ompui hu in Uzziah sia thahat mama a, mun theampo ah minthang hi.

¹⁶Ahihang Uzziah kumpipa a tha a hat ciang a kisakthei vaial na in ama puksak hi. Ama in ngimnamtui halna biaknatau tungah ngimnamtui hal tu in Biakinnpi sungah a tumna taw TOPA a Pathian melsia hi.

¹⁷Thiampi Azariah le, a hat le a hang thiampi 80 te in

¹⁸kumpipa nalh tu in a nung pan zui uh hi. Amate in, “Uzziah awng! TOPA tungah ngimnamtui hal tu sia nang sep tu hi ngawl hi. Aaron suan thiampite bek sia hi na seam tu in ki aaptuam hi. Hi mun thiangtho nusia in. TOPA Pathian tungah khial zo na hikom ama thupha na saang nawn bua hi,” ci uh hi.

¹⁹Uzziah sia Biakinnpi sung ngimnamtui biaknatau kungah ngimnamtui halna khat toai in ding hi. Thiampite tungah thin uuk ahikom thakhat thu in ama ii talki tungah a kiitakhuai vun natna khat theng hi.

²⁰Azariah le thiampi dangte lau in kumpipa talki salh a, Biakinnpi sung pan hawlkhia uh hi. Ama sia TOPA in daan pia zo ahikom manlang takin pusuak hi.

²¹Uzziah kumpipa sia tua hun pan a nuntak lai teng theampo a natna hu in biakna taw kisai in thiangtho nawn ngawl hi. Biakinnpi sungah tum thei nawn ngawlin ama inn bek ah teangin, a nasep theampo pan kitongsak hi, tuaciang a tapa Jotham in ngam uk hi.

²²Uzziah kumpipa ii kumpi maan sung, a nasep dang theampo sia Amoz tapa, kamsaang Isaiah in ciamtee hi.

²³Uzziah thi a, kumpi thaan huang sungah kiphum ahihang a natna hu in kumpi thaankuul sungah kiphum ngawl hi. A tapa Jotham in a kumpiza laih hi.