Read Siyin Chin 2 Khangtaanghthu 28 Bible Online

2 Khangtaanghthu 28 - Siyin Chin bible

2 Khangtaanghthu 28

¹Ahaz sia kum kul a phakin kumpi suak a, Jerusalem pan kum sawm le kum luk sung uk hi. Ama in a taanghpupi David kumpipa ii ngamtatna phate zui ngawl a, TOPA diksak ngawlte vawtin,

²Israel kumpite ngamtatna zui zaw hi. Ama in thik taw Baal milimte vawtsak a,

³Hinnom Kuam ah ngimnamtui halin, Israel mite maisang a manaw hun lai a, TOPA ii a ngamsung pan a nawkeak mite ii a zak a kiihuai nasepte zui in a tapate ngawngawn meihal biakpiakna in milimte pia hi.

⁴Doai biakna mun mualtung le thinglim nuai theampo ah Ahaz in sangaw biakpiaknate nei in ngimnamtui hal hi.

⁵Ahaz kumpipa mawna hangin TOPA a Pathian in ama Syria kumpipa in zosak a, Judah mi tam mama manin Damascus ah thongtaak tu in paipui hi. TOPA in Ahaz sia Remaliah ii tapa Israel kumpipa Pekah zongh in zosak a, ni khat thu in Judah ngalkap ngalhangbel 120,000 thatsak hi. Judah mite in a taanghpupite ii Pathian, TOPA a nusiat hu in hi bangin piang hi.

⁷Israel ngalkap Zichri a kici pa in Ahaz kumpipa ii tapa Maaseiah, kumpi inn uk Azrikam le kumpipa dom a thunei Elkanah that hi.

⁸Judah mite sia amate ii mipui hi napi Israel ngalkapte in numei le patang 200,000 thongtaak tu in man a, a laaksak vanh tam mama te taw Samaria ah heakpui uh hi.

⁹Oded kici TOPA kamsaang pa khat sia Samaria khuapi ah teang hi. Ama zongh ngalsimna pan Judah mi thongtaakte taw hong heak kik Israel ngalkaphonpi khuapi sungah a tum dektakte taw kisi a, ama in, “Judah te tungah na taanghpupite TOPA Pathian a thin uuk hu in amate hong zosak hi, ahihang tu in tatsia in amate tam lei na thalup uh sia ama in za zo hi.

¹⁰Tu in Jerusalem le Judah ngam panin numei pasalte noma sila na suaksak nuam uh hi. TOPA na Pathian tungah zongh mawna khialna na vawt uh hunlam kihe ngawl nu ziam?.

¹¹Hong ngai tavun! Hi thongtaakte sia na suapuinumeite le na suapui pasalte veu hi. Tha kik siat vun, tua ahibuale TOPA a thin uuk in note daan hong pia tu hi,” ci hi.

¹²Saksang kumpi ngam pan a lampui pasal li ahi Jehohanan ii tapa Azariah, Meshillemoth ii tapa Berechiah, Shallum ii tapa Jehizkiah le Hadlai ii tapa Amasa te zongh in ngalkapte ngamtatna nalh uh hi.

¹³Amate in, “Tua thongtaakte hi sungah hong paipui heak vun! TOPA tungah ih maw zo a, daan hong piak khom natu in a thin ih uuksak zo hi. Tu in ih mawna a khan seseam natu khat sep na sawm uh hi,” ci uh hi.

¹⁴Tuasia ciang ngalkaphonpi in thongtaakte le a laaksak vanhte sia mipite le a lampuite tungah a aap tu le,

¹⁵tuate sung pan puansilhte a thongtaak teng tungah a hawmsak tu in tua mi lite panmun kipia hi. Amate in a silh tu in puante, a thua tu peangdapte le an le tui a khom tu pia in a liammate olive thau noisak hi. Thazawmin lampai zo ngawlte laa tungah tosakin a mat thongtaakte theampo Judah ngam Palm thingkung khuapi a kici Jericho ah kipaipui kik hi. Tua zawkciang Israel mite Samaria ah cia kik uh hi.

¹⁶Edom te in Judah ngam sim kik in, thongtaak tu tam mama man hi, tua ahikom Ahaz kumpipa in Assyria kumpilianpa Tiglath Pileser tungah hu ngen hi.

¹⁸Tua laitak ma in Philistine mite in nitumna sang mualpeang le Judah thangsang a om khuate sim hi. Amate in Beth Shemesh, Aijalon le Gederoth khuapite a laak zawkciang Soco, Timnah le Gimzo khuapite le a kiim ah khuanote la a, tua munah teang suak uh hi.

¹⁹Judah Kumpipa Ahaz in a mite ii a nga tuakte pheltan a, TOPA ii thu nial ahikom Judah ngam ah TOPA in ngimnate tungsak hi.

²⁰Assyria kumpilianpa in Ahaz kumpipa hu ngawl bek dom ngawlin langpanin thinngimna piazaw hi.

²¹Tua ahiciang Ahaz in Biakinnpi, kumpi inn le mipi lampuite inn panin khamh teng la a, tua kumpilianpa pia hi, ahitazong hu nuam tuan ngawl hi.

²²Ahaz sia a thinngimbel hun hong thet ciang TOPA tungah nidang sangin zongh maw zaw lai hi.

²³Ama in ama a zo Syria mite ii pathiante tungah sangaw biakpiakna pia hi. Ama in, “Syria pathiante ii Syria kumpite a hu bangma in, tua sangaw biakpiaknate pia lei leng kei zongh hong hu tu hi,” ci hi. Tuasia hu in ama le a mite tungah tuasiatna tung hi.

²⁴Tua dom ngawlin ama in, biakinn sung vanhzak theampo la in sutham siat hi. Ama in TOPA Biakinnpi khakbil in Jerusalem khua sungah biaknatau sa kawkoai hi.

²⁵Judah ngam khuapite le khua lian theampo ah ama in ngamdang pathiante tungah ngimnamtui hal natu in doai sepna mun vawt kawkoai hi. Tubangin ama in a taanghpupite ii Pathian, TOPA thin uukna ama tung ma ah thengsak hi.

²⁶A kumpi maan hun sungin a dang thupiangte theampo sia a kipat pan a tawp dongin Judah te le Israel Kumpipate Taanghthu sungah kiciamtee hi.

²⁷Kumpipa Ahaz thi a, Jerusalem khua sungah kiphum ahihang kumpite thaan sungah kiphum ngawl hi. A tapa Hezekiah in a kumpiza laih hi.