Read Siyin Chin 2 Khangtaanghthu 3 Bible Online

2 Khangtaanghthu 3 - Siyin Chin bible

2 Khangtaanghthu 3

¹Solomon ii pa David kumpipa in Biakinnpi atu in a mun tu khat kinging khol zo hi. Tua mun sia Jerusalem khua sung Moriah mualtung Jebus mi Araunah ii ancilna, David kungah Topa kilakna mun ahi hi. Solomon kumpipa ii inn sak tu a kipat hun sia

²ama ii kumpi sep zawk a kum li kum tha nii tha sung ahi hi.

³Solomon kumpipa sak Biakinnpi sia metre 27 sau a metre 9 zai hi.

⁴Inn sung tumna mailim inndoi sia Biakinnpi zaina taw kikim a, metre 9 zai in metre 54 saang hi. A inndoi sungsang sia khamh ciitak taw kizut hi.

⁵A inndoipi sia cedar thing taw kidal a, khamh pha taw tuamin palm thingkung limte le a kual kipee limte kisuai hi.

⁶Kumpipa in Biakinnpi sia a hoi mama suangmanpha te le Parvaim ngam pan a kilei khamh taw in zeam hi.

⁷Ama in biakinn pangte, zawlsaute, tumna lampi le kongkhate sia khamh taw tuam hi. A seamte in a pang tungah cherubim limte ngelh hi.

⁸A sungsang inndoi, Thiangthobel Mun a kicina sia metre 9 sau in, metre 9 zai a, Biakinnpi zaina za ma hi. Thiangthobel Mun pangte tuamna in khamh tann 20 vaal kizangh hi;

⁹khamh thikpim vawtna in khamh gram 570 kizangh a, inn tung inndoi pangte zongh khamh taw kituam hi.

¹⁰Kumpipa in a naseamte zongh Cherubim lim nii thik taw vawt a, khamh taw tuamin, Thiangthobel Mun ah a koi natu thupia hi,

¹¹tua munah tuate sia inn sung tumna sang nga in a kicial in ding hi. Khatsim in tha nii veu nei a, a thate khat sia metre 2.2 veu sau a, a thate a inndoi laizang ah a kipha in kiphal hi, tuabangin metre 9 bang a zai a inndoi dim in a pangh lang le lang dong a tha in pha siat hi.

¹⁴A Thiangthobel Mun atu in puanneal le a dang taw puankhai khat kivawt a, vancii, a sandup le a san taw kinimh in, a tungah cherubim lim kisuai hi.

¹⁵Kumpipa in metre 15.5 veu a saang khuam nii vawtsak a, Biakinnpi mai ah phut hi. Khuam khat in metre 2.2 a saang a dawnbawk khat veu nei hi.

¹⁶Khuamte ii dawn sia thik kipheak te le taau taw kivawt talee nga lim zakhat taw kizeam hi.

¹⁷Tua khuamte biakinn tumna panghte ah kiphut a: thangsang a om khuam sia Jachin, saksang a om khuam sia Boaz kici hi.