Read Siyin Chin 2 Khangtaanghthu 5 Bible Online

2 Khangtaanghthu 5 - Siyin Chin bible

2 Khangtaanghthu 5

¹Solomon kumpipa in Biakinnpi vai nasep teng a man siat zawkciangin a pa David ii TOPA tungah a aapsa nate — ngunn, khamh le a dang nazakte theampo biakinn vanh kholna inndoite sungah koi hi.

²Tuaciang Solomon kumpipa in Israel namte le a bee a phungte ii lampuite theampo sia David Khuapi Zion panin TOPA Thuciamna Thingkuang Biakinnpi ah a pua tu in Jerusalem ah a kikhop natu sam hi.

³Amate a vekpi in Buk Poai vawt hunin kikhawm uh hi.

⁴A lampui theampo a cin zawkciangin Levi mite in Thuciamna Thingkuang domto in,

⁵Biakinnpi ah puak uh hi. Thiampite le Levi mite zongh in TOPA ompuina Puanbuk le a vanh theampo Biakinnpi ah tua siat uh hi.

⁶Solomon kumpipa le Israel mite theampo Thuciamna Thingkuang mai ah kikhawm in tuu le khui honpui khat — a kisim zo ngawl za dongin a tam taw sangaw biakpiakna nei uh hi.

⁷Tuaciang Thiampite in TOPA Thuciamna Thingkuang pua in Biakinnpi sungah tumpui a, Thiangthobelna Mun Cherubim nuai ah koi uh hi.

⁸A tha kiphalte in Thingkuang le a puakna molte liap hi.

⁹A puakna molte ii mongte sia Thiangthobel Mun mai santak ah a ding khat pawpo in mu thei a, ahihang mundang pan kimu thei ngawl hi. (Tua molte tuni dongin om lai hi.)

¹⁰Thuciamna Thingkuang sungah, Israel mite Egypt ngam pan hong pai in TOPA taw thuciamna a vawt lai a, Moses ii Sinai mual tung, tualai ah a koi suangpheakte nii simngawl bangma dang om ngawl hi.

¹¹Thiampite a om theampo sia akua pawl akua pawl ci om tuan ngawlin amate le amate kithiansua tek uh hi. Tua zawkciang Levi mi music thiamte — Asaph, Heman le Jeduthun le amate ii bee le phungte sung mite theampo — puanneal silh uh hi. Levi mite sia biaknatau nisuana sang nai ah daalkopsai le tengtonghte taw ding in, amate taw thiampite 120 sia lemle tumin om uh hi. La sate in lemle, daalkopsai le a dang tumtheite taw aw kihual tatakin TOPA pok in lasa hi: “TOPA pok vun, banghang ziam cile ama pha hi, Hong itna kip tawntung hi.” Thiampite ii Biakinnpi a nusiat po ciang tuasia TOPA ompuina khuavak taang velvol sia le a taang meeikaai khat taw thakhatin kidim a, amate in biakna zom thei nawn ngawl hi.