Read Siyin Chin 2 Khangtaanghthu 7 Bible Online

2 Khangtaanghthu 7 - Siyin Chin bible

2 Khangtaanghthu 7

¹Solomon kumpipa in a thunget a man ciangin vantung pan meikuang hong paisuk a, sangaw biakpiaknate kaanghtum in, TOPA ompuina khuavak taang velvol sia Biakinnpi dim hi.

²Biakinnpi sia tua khuavak taang velvol sia taw kidim ahikom thiampite a sungah tum thei ngawl hi.

³Israel mite in Biakinnpi ah van panin meikuang taaksuk le khuavak taang a dim a mu uh ciang a lam totna tungah a lu kunin Pathian bia a, a phatna le a itna kip pok uh hi.

⁴Tua zawkciang Solomon le mite theampo in TOPA tungah sangaw biakpiakna pia uh hi.

⁵Ama in kipawlkhop biakpiakna in khui 22,000 le tuu 120,000 pia hi. Tuabangin ama le mipite in Biakinnpi aapna nei uh hi.

⁶Thiampite sia a kiseena mun tek ah ding a, amate maingat in Levi te dingin David kumpipa ii piak tumthei tuatuamte taw, “Ama hong itna in kip tawntung hi!” ci in lasa a David sawlna om bangin TOPA pok uh hi. Thiampite ii lemle a tum sung teng mipi theampo ding uh hi.

⁷Solomon in Biakinnpi mai leitual laizang a thiansua zawkciang tua munah pumhal sangaw biakpiakna, antang taw biakpiakna le kipawlkhop biakpiaknate panin a thau te pia hi. Hi bang a vawtna sia ama vawt taau biaknatau sia hi biakpiaknate theampo atu in no lei ahihang hi.

⁸Solomon le Israel mite theampo in ni sali sung Buk Poai khaam uh hi. Tua poai ah mihonpi hong pai a, saksang ah Hamath Mualciangh le thangsang ah Egypt ngamngi dong a teang mite ahi uh hi.

⁹Amate in ni sali sung biaknatau aapna vawtin tua zawkciang a dang ni sali sung ma poai vawt thua uh hi. A ni khakbel ni in amate in poai manna vawt a,

¹⁰a zing ciang tha sali tha ni 23 ni in Solomon in mipite inn ah ciasak hi. TOPA ii a Israel mite tung, David tung le Solomon tungah thupha theampo a piak manin amate lungdam uh hi.

¹¹Solomon kumpipa in Biakinnpi le kumpi inn a sak teng man zo a, tuate atu a ngealna theampo pha takin a zaw thiang sitset zawkciang,

¹²ama tungah zanin TOPA kilangh hi. TOPA in ama tungah, “Na thungetna ka za zo a, hi Biakinnpi sia ka tungah sangaw biakpiaknate nong nei natu munin ka saang hi.

¹³Nguatui ka hansak po ciang ahibuale lo ante a ne khawng tu in khaumawte ka paisak po ciang ahibuale ka mite tungah a kilaw thei natna khat ka tunsak po ciang,

¹⁴amate in kei tungah thungenin kisiik kikin a tatsiat ngamtatnate a nungngat le, tuaciang a thungetnate vantung pan ka za tu a, a mawnate maisak in a ngam a lei ngamnuam ka suaksak kik tu hi.

¹⁵Hi Biakinnpi ka mitsuan tu a, hi mun panin thungetnate theampo a za tu in ka kinging tu hi,

¹⁶banghang ziam cile hi Biakinnpi ka tealsa hi a, a tawntungin keima hong kibiakna mun tu in ka thiansua sa ahi hi. Tuasia ka mitsuan tu a, a tawntungin ka hung tu hi.

¹⁷Na pa David ii sep bangin ka thukhamte zui in na tungah kong sawlte theampo seamin thumaan takin ka na na seam le,

¹⁸na suan na paalte in Israel ngam uk tawntung tu hi ci a, na pa David tungah ka son, ka kamciam sia ka len tu hi.

¹⁹Ahihang nangma le na mite in nangma tungah kong piak thukhamte le thupiakte zui ngawlin pathian dangte na bia uh le,

²⁰kong piaksa ngam panin kong heam tu hi, tuaciang keima hong kibiak natu mun tu in ka thiansua sa, hi Biakinnpi ka nusia tu hi. Israel sia mihing theampo in zawnsak vawtin ngaimaw tu uh hi.

²¹“Tu in tua Biakinn nasia takin kipatoai ahihang tuasia a kaantan pawpo in lamdang sa in, ‘Banghangin TOPA in hi ngam le hi Biakinnpi tungah hi bangza in vawt ziam?’ ci in dongh tu uh hi.

²²Mipite in ‘A taanghpupite Egypt ngam pan a pusua pui TOPA a Pathian a nusiat hang hi. Amate in pathian dangte pom in bia uh hi. Tuasia hangin TOPA in hi tuasiatna teng amate tungah tungsak hi,’ ci in zo tu uh hi,” ci hi.