Read Siyin Chin 2 Khangtaanghthu 8 Bible Online

2 Khangtaanghthu 8 - Siyin Chin bible

2 Khangtaanghthu 8

¹Solomon in Biakinnpi le a kumpi innte kum kul sung sa hi.

²Ama in Hiram kumpipa ii a piak khuapite zongh pua kik a tua khuapite sungah Israel mite puakin teangsak hi.

³Ama in Hamath le Zobah ngam la in,

⁴sennealngam a om Palmyra khuapi sia kulh taw uum hi. Ama a ankholna mun tu in Hamath ngam ah khuapite theampo pua kik hi.

⁵Solomon in a nuai a khuapite zongh pua kik hi: Beth Horon Tungnung le Beth Horon Nuainung, (a kikalh thei kongpite a nei, ngal dalna kulh taw ki uum khuapite hi.)

⁶Baalath khuapi, ankholna khuapi theampo le a siphute le a siphu ngalleangte koina khuapite ahi hi. Ama in Jerusalem khua, Lebanon ngam le a ukna ngamsung theampo ah sak tu in a tup a sawm theampo taangtun siat hi.

⁷Israel te ii Canaan ngam a laak lai in a thalup ngawl Canaan mite ii suan le paal teng sia Solomon in zawthawk thu taw sawlin naseamsak hi. Hite sungah Hit mi, Amor mi, Periz mi, Hiv mi le Jebus mite kihel in a suan a paalte sia tu hun dongin sila hi suak lai uh hi.

⁹Israel mite sia zawthawk thu taw na kiseamsak ngawl ahihang ngalkap, ulian, siphu ngalleang uk le siphu ngalkap nasep kiseamsak hi.

¹⁰Inn sakna tuatuamte ah zawthawk thu taw a kisawl naseamte uk tu in ulian 250 om hi.

¹¹Solomon in Egypt kumpipa tanu a zi sia David Khuapi pan ama atu a sak inn sia ah khiin hi. Solomon in, “Ama sia Israel kumpipa David kumpi inn ah teang thei ngawl het hi, banghang ziam cile Thuciamna Thingkuang omna pawpo thiangtho hi,” ci hi.

¹²Solomon in Biakinnpi mai ah a sak biaknatau tungah TOPA atu in sangaw biakpiaknate pia hi.

¹³Ama in Moses Thukham bangin meihal biakpiaknate ni thiangtho ni sim atu in pia hi: Sabbath nite, Thadet Poaite le kum sim a kivawt poai thumte — Tol kisaw ngawl Anluum Poai, Anlaak Poai le Buk Poai te ahi hi.

¹⁴A pa David ii zui tu a vawt ngeinate zui in thiampite ii ni sim a nasep tu le lasakna le a nasepna ah thiampite a hu Levi mite ii a nasep tu sia ama in vaihawmsak hi. Pathian mi David ii thupiak bangin biakinn cingte in a vaipuak neina kongpi tek ah ni sim a nasep natu in pawl khensak hi.

¹⁵David ii thiampite le Levi mite tungah vanh kholna innte le a dangte taw kisai in a thupiakte kheet nei ngawlin kivawtsak hi.

¹⁶Hi hun in Solomon ii nasepna theampo kizo thiang hi. TOPA Biakinnpi tawdap a kiphu pan kipanin a zaw thiang dong nasep theampo ah a kisuangsamh mun om ngawl hi.

¹⁷Tua zawkciang Solomon sia Edom ngam, Aqaba Tuidok hui ah a om teambaw tawlngakna te ahi Eziongeber le Elath ah pai hi.

¹⁸Hiram kumpipa in a khutnuai uliante ii a uk le teambaw naseam thiamsate ii a zui teambawte Solomon puak hi. Amate in Solomon ii uliante taw Ophir ngam ah paikhawmin Solomon tungah khamh kilogramme 15,000 vaal puak kik uh hi.