Read Siyin Chin 2 Khangtaanghthu 9 Bible Online

2 Khangtaanghthu 9 - Siyin Chin bible

2 Khangtaanghthu 9

¹Sheba kumpinu in Solomon kumpipa minthanna za a thudokna haksate taw ama ze et tu in Jerusalem ah haw hi. Ama in a lalangte honpui khat le hel namtuite, suangmanphate le khamh tam mama a pua kalaoh te keng hi. Solomon taw a kimu uh ciang ama in a thu ngaisut thei theampo dongh hi.

²Solomon in tuate zo thei siat hi; ama ii a zo kik tu in thu haksa leih bangma om ngawl hi.

³Sheba kumpinu in Solomon ii ciimna he a, a sak sa kumpi inn zongh mu hi.

⁴Ama in kumpi sabuai tungah a kilui ante, a uliante teenna innte, kumpi inn sung a naseamte omzia le a kibang a puansilhte, poai vawt ni in ama a cing a naseamte ii puansilhte le Biakinnpi ah a piak biakpiaknate mu hi. Tuate ama in lamdang sa in ingh liang hi.

⁵Ama in kumpipa tungah, “Ka ngam panin na ciimna le na thu ka zaakte maan hi!

⁶Keima mama hong pai in ka mu matengin ngual ii hong sonte ka um bua hi. Na ciimna ii a lang zongh a za ngawl khi hi. Ngual hong sonna sangin ciimzaw lai ni hi.

⁷Nangma taw omkhawm tawntungin na hong sepsak mite, ciim kam na pauna a zate sia bang zata in hampha ziam!

⁸TOPA na Pathian pok in! Ama min suangin a uk kumpipa hong suasak ciang nang tungah ama bangza in lungkim ziam ci in hong lak hi. Ama in a Israel mite it a, a tawntungin a kep nopna hu in, thukham le thutang khenna na kipsak thei natu in nangma sia amate ii kumpi hong suaksak zo hi,” ci hi.

⁹Ama in Solomon kumpipa tungah a ken letsongte: khamh kilogramme 4,000 vaal le hel namtuite le suangmanpha tam mama pia hi. Sheba kumpinu ii Solomon kumpipa tungah a piak hel namtuite sangin a phazaw dang om ngeingawl hi.

¹⁰(Ophir pan khamh hong paipui Hiram kumpipa le Solomon kumpipa ii mihingte in juniper thing le suangmanpha te zongh paipui uh hi.

¹¹Solomon in tua thingte sia Biakinnpi le ama kumpi inn keallei vawtna, music thiamte atu tengtongh le liamlo te vawtna in zangh hi. Tua masia in Judah ngam sungah tuabang te kimu ngeingawl hi.)

¹²Solomon kumpipa in Sheba kumpinu ii a nget theampo pia hi. Hite sia Sheba kumpinu ii ama a piak letsongte a thukna in a piakte ahi hi. Tua zawkciang ama le a lalangte Sheba ngam ah heak kik uh hi.

¹³Solomon kumpipa in kum simin khamh kilogramme 23,000 dektak nga a,

¹⁴sumvawtte le sumbukte ii phiangshia a piakte ban ah a nga ahi hi. Arabia kumpite le Israel ngamkhen ukte zongh in ngunn le khamh puak uh hi.

¹⁵Solomon in ngaldalna lumlian 200 vawtin lum khat ciangin a kiseak khamh kilogramme 7 bang taw tuam hi,

¹⁶tuaciang ngaldalna lum a no zaw 300 vawt a, khat ciangin a kiseak khamh kilogramme 3 bang taw tuam hi. Ama in tuate a vekpi in Lebanon Thingtaam Khaanpui sungah koi hi.

¹⁷Kumpipa in kumpi tokhum lian mama khat zongh vawt hi. Tua tokhum khen khat sia saiha taw kituam a, a dang teng sia khamh ciitak taw kituam hi.

¹⁸Tua tokhum tungah a kaa natu in keallei dawl luk pha khat kidaw a, khamh taw a kituam dinpha khat kibel in om hi. To khum lang le lang ah khut ngakna om a, tawpi lim khat veve dingsak hi.

¹⁹Keallei dawl luk te khat sim ii lang le lang ah tawpi lim 12 om hi. Hi bang kumpi tokhum sia kumpi ngam mundang peuma ah om ngeingawl hi.

²⁰Solomon kumpipa ii zak haite theampo khamh taw kivawt a, Lebanon Thingtaam Khaanpui sungah a kikoi vanhzak kuang le keau te theampo sia khamh ciitak veu hi. Solomon hun lai in ngunn sia a man nei in kingaisun ngawl hi.

²¹Solomon in Hiram kumpipa ii teambawte taw a paikhawm tuipi teambaw honkhat nei hi. Kum thum simin ama teambawte hong heak kik ciang khamh, ngunn, saiha, mei nei ngawl zawngpuite le zawngte hong pua uh hi.

²²Solomon kumpipa sia leitung kumpi dangte sangin ciimzaw a hauzaw hi.

²³Pathian ii a piak ciimna thu he nuamin tua kumpite theampo in ama thu dongh hi.

²⁴Amate khat simin Solomon atu letsongte — khamh, ngunn, puantualte, ngalhiamte, hel namtuite, siphute le laate puak hi. Kum khat zawk kum khat tuabangin kizom suak hi.

²⁵Solomon kumpipa in a siphu ngalleang le a siphute koi natu in siphu khawk 4,000 le siphu ngalkap 12,000 zongh nei hi. Tuate pawlkhat sia Jerusalem ah keam in a taanglai teng khuapi dangte ah koi hi.

²⁶Ama sia Euphrates Ngun panin Philistia le Egypt ngamngi dong a om kumpi theampo a ukpipa ahi hi.

²⁷Ama kumpi in a maan lai in Jerusalem ah ngunn sia suang bangin tam a cedar thingkung sia Judah mualpeangte ah a om sycomore thingkung thawthongte bangin tam hi.

²⁸Solomon in siphute Musri le ngamdang theampo panin lei hi.

²⁹Solomon ii taanghthu dang teng sia a kipat pan a tawpna dong Kamsaang Nathan Taanghthu sung, Shiloh khua mi Ahijah ii Kamsaanna sung le Kamsaang Iddo ii Mukholnate sungah kiciamtee a, tua te Israel kumpipa Jeroboam ii kumpi maanna thu taw zongh kizom hi.

³⁰Solomon in Israel ngam buppi sia Jerusalem khua panin kum sawmli sung uk hi.

³¹Ama thi a, David Khuapi sungah kiphumin a tapa Rehoboam in a kumpi za laih hi.