Read Siyin Chin Ezra 3 Bible Online

Ezra 3 - Siyin Chin bible

Ezra 3

¹A tha sali tha in Israel mite a khua tek ah teang siat hi. Tua zawkciang amate a vekpi in Jerusalem ah kikhawm uh a,

²Jehozadak ii tapa Joshua, a thiampi puite le Shealtiel ii tapa Zerubbabel le a beete teng in Pathian ii mihing Moses ii Thukham sungah a ki at hilnate bangin sangaw biakpiaknate a hal thei natu in Israel ii Pathian biaknatau sa kik uh hi.

³Saltanna pan a cia kikte in tua ngam ah a teang mite kiita ahitazong, amate in biaknatau sia a om maksakna mun ma ah sa kik uh hi. Tua zawkciang amate ii a vawt ngei zing le nitak sangaw biakpiaknate tua tungah hal tu in khatvei ma kipan kik uh hi.

⁴Amate in zui tu ngeina om bangin Buk Poai khaam a; ni khat sim atu a kisamh babang tua ni in biakpiakna pia uh hi;

⁵tuaban ah amate in a piak tawntung pum bup meihal sangaw biakpiakna, Tha Thak Poai biakpiakna le a vawt ngengei TOPA biak kikhopna dang teng theampo le TOPA tungah amate thin zawna taw a piak biakpiaknate theampo zongh pia uh hi.

⁶Mipite in Biakinnpi sakkik tu kipan ngawl lai hikale, amate in a tha salina ni khat ni in TOPA tungah meihal sangaw biakpiaknate kipan uh hi.

⁷Mipite in suangciangte le lettamate a piak tu sum khia in, tuipi lam tawnin Joppa khua ah a kipua tu Lebanon pan Cedar thingte the natu in, Tyre le Sidon khuapite ah an le tui, olive thaute pia si uh hi. Hite theampo Persia kumpilianpa Cyrus ii thukimna la in kivawt hi.

⁸Tuabangin Jerusalem Biakinnpi sak natu munah amate a ciakik kum, a tha nii tha in nasep kipan uh hi. Zerubbabel, Joshua le a taanglai ngamsung a mipuite, thiampite le Levi mite, a tatakin saltanna pan Jerusalem ah a cia kikte theampo in sep pui tek hi. Kum kul le a tungsia Levi te theampo Biakinnpi sak kikna ah nasep ki uksak hi.

⁹Levi mi Jeshua le a tapate le a mealheakte, tuaciang Kadmiel le a tapate (Hodaviah ii bee le phung) in Biakinnpi a sak kikna uk khawm uh hi. (Amate sia Henadad bee le phung pan Levi te in hu uh hi.)

¹⁰Inn sate ii Biakinn tawdap a vawt kipat ciang puantual silh Thiampite in a khut ah lemle toai in dinmun la uh a, Asaph bee le phung Levi te in daalkopsai taw tua munah ding uh hi. Amate in David kumpipa hun pan a kihilnate bangin TOPA pok uh hi.

¹¹Amate in hi TOPA pokna la sa kikik hi: “TOPA pha hi, Israel a itna kip tawntung hi.” A kuama po in a tha neiza tek taw au in TOPA pok uh hi, banghang ziam cile Biakinnpi tawdap a vawt kipan zo hi.

¹²Khanghaam thiampite, Levi te le bee le phung lutangte tam ma in a masa Biakinnpi mu ngei zo a, hi Biakinnpi tawdap a kipha a mu uh ciang amate au in kap uh hi. Ahizong tua munah a om dangte lungdamin au uh hi.

¹³Amate aw sa taw ngamlum mama in a khuala na pan kiza thei ahiciang kuama in kaa na aw maw lungdamna aw maw khen thei ngawl uh hi.